L’Angolo de la Wanda – Marzo 1995 – “La poesia… in luto”.

…a cura di Graziano M. Cobelli

gcobelli05@gmail.com

Quatro Ciàcoe: da Verona

“La poesia… in luto”.

Anca la Enrica Gorgeri, presidentessa de la “Panocia” de Schio. la n’à lassado.

Aveimo pregà par un miracolo e ormai se savea ben che no gh’èra altro da far! L’ultima volta che l’ò incontrà a Schio, e no’ è passà che pochi mesi, l’èra ancora un fior de dona, bela, piena de corajo, malgrado ‘na vita travalià come poche, e ancora ativa ne la so funsion de presidente dei poeti de “La Panocia”. La g’avea un soriso che no me podarò desmentegar mai e che, par quanto possa ancora canpar, ogni òlta, nel ricordo, el me farà vègnar el magon.
Come poetessa, la stimavo una tra le mèjo del Veneto e l’èra anca pitrice, scultrice e no’ sò che altro; in ela l’arte la g’avea tute le sfacetadure che la poI ‘verghe, quando che la alberga in te ‘n’anima veramente granda.
È passà poco più de ‘n ano da quando n’à lassà quel che l’è ‘stà, nel canpo de la scultura, el so maestro; l’altro grande scledense Gian Maria Grandesso. Con lu l’avea fato, tra le altre, un bel monumento a Don Bosco. In casa de la Enrica gh’èra semenà intorno diverse sculture, più che belle, oltre a tante altre testimonianse del so incredibile ecletismo. Ma, a me parer, dove che la eceleva propio, l’èra la poesia, specie nel dialeto de la so Schio; ‘na poesia spesso triste, ma senpre splendida e profonda, siora de espressioni poetiche originali e moderne. Par farse ‘n’idea de l’anima de la Enrica, cusì, come che l’èra, basta lesar le so liriche e alora se podarà anca rèndarse conto de che rassa de perdita g’à ‘vudo la nostra poesia l’oto de genar 1995; quando ‘sta voçe la s’à smorsà par senpre.
La matina de mercoli 11 genar, ne la bela ceseta de i Capucini a Schio gh’emo dà in tanti l’ùltimo saludo. A dar voçe ai parenti e i amiçi presenti è stà ‘el presidente che l’avea preceduda, Bepino Losavio, con parole sentide che n’à sbregà el cor. Secondo el desiderio ‘stesso de la nostra Enrica, po’, le corali GES e la VERLATA le à eseguì de le cànte, una de le quale, ‘na splendida nina-nana l’èra stà ‘scrita propio da ela.
Corajo, “Panociari”,… no’ stèghe molar! Par rèndarghe el dovudo onor a la vostra Presidentessa, tegnive tacà fissi al mugoloto: la “Panocia” la gà da vìvar e, nel ricordo de la Enrica, butar anca novi grani.

Wanda Girardi Castellani

de Enrica Gorgeri

Un fià de celo

Quado la Libertà siga
slighela
làssala andare.
El còre
dopo corse scadenà
tornarà lesièro
el se farà metare el morso
el torà-sù el basto
le rèndene
le portarà ancora
drio strosi de russe
e anca i zenociòn
el cantarà.
Contarà storie de strie
de fate, busie:
l’arfiarà ancora
un fià de celo.