L’Angolo de la Wanda – Maggio ter 1994 –”LEANDRO FERRACIN”.

…a cura di Graziano M. Cobelli

gcobelli05@gmail.com

Quatro Ciàcoe: da Verona

“LEANDRO FERRACIN”.

Se podarìa definirlo “pirotenico”! E l’è propio come un “buché” de foghi che se core drio in cel, s-ciopàndo in mile forme e colori, Leandro Ferracin; poeta, pitor comediografo, romansier, colessionista de arte antica e moderna, esperto de musica (quela seria), de antiquariato e… che altro?
Ma fòrsi, a ‘sto punto, sarìa mèio paragonarlo a ‘n diamante… ma tajà a brilante; come a dir, tuto ‘na sfacetadura, una più luminosa e pressiosa de l’altra.
A la pitura, par èssar sinceri, el se g’à viçinà da poco tenpo anca se, come al so solito, I’à brusà tute le tape in quanto, ‘pena ciapà in man i penèi l’è ‘n dà ‘vanti al ritmo de 3/4 quadri al giorno e, sorprendentemente, el rièsse a farli anca boni. EI stile l’è post-impressionista e l’è za in grado de afrontar con maestria oltre che con grinta, indifarentemente, el paesagio, el ritrato, come el tema religioso.
Mi I’ò conossudo nel 1970/’71, quando che ò guadagnà du primi premi, ne le do sessioni, in un concorso de poesia, a Treviso. Da alora è nata ‘n’amicissia che no’ l’è mai tramontà.
Par parlar de sto poliedrico artista, tra le altre laureà in giurisprudensa, tachemo col dire che come poeta, sia in italian che nel dialeto de la so Treviso, I’à dà a le stanpe: “Altro vento” (1969), “La recita continua” (1971), “Per lucidi intervalli” (1983), “EI sangiuto” (1974), “Sporchessi” (1978), “Pirolòti de giasso” (1992). Più i ati unici: “Ultrasuoni” e “Bacheche” (1973) e i romansi: “La stagione inconclusa” (1972), recentemente ristanpà in seconda edission, e “Una ragione di vita” (1989). Altre so opare i è ‘n dà a far parte de svariade antologie e racolte, sparpaià in tuta l’ltalia.
Sia ne le liriche che ne la narativa se pol rilevar ‘na profondità de pensier, ‘na fantasia e ‘na padronansa de linguagio, tali da far metar ‘sto autor, a pién dirito, in prima fila ne la scala valori de i scritori veneti.

Wanda Girardi Castellani