L’Angolo de la Wanda – Maggio 1995 – “Radio… che passion”.

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Radio… che passion”.

‘Na dominica de marso, a spasso par la me Verona, ò scoperto par caso nel salon de la Biblioteca Civica, in via Capel, ‘na splendida mostra intitolà: “Marconi, el mondo de la radio”, organisà dal Radio Club VR. Est – S. Martino B.A..
Ben esposte ne le bacheche gh’èra, fotografie, boli comemorativi, cartoline postali-ritrato, medaje, monede e tanti altri cimeli del grande inventor, magnificà su stanpe, giornai, riviste de l’epoca e parfin su le celebri figurine Liebig de i nostri tenpi. In una saleta attressà ò podù anca gòdarme un’ora e mèsa de film documentario su le tante applicassioni de la radio.
Marconi, in casa mia, l’è stà senpre un personagio de primo pian. O’ sentì me papà nominarlo e esaltarlo, par tuta la me infansia, el m’à insegnà pure a costruir ‘na radio a galena, roba che po’ l’à fato anca con me fioi… al punto che el me primogenito, a 7 ani, dopo aver visto (in pelegrinagio “marconiano”) el mausoleo a Villa Griffone a Pontecchio, ridoto talmente mal che ghe piovea drento, el g’à mandà ‘na leterina a ”Epoca” con çento franchi, invitando tuti i butini italiani a far altretanto al scopo de racimolar i schei par ripararlo. La leterina l’è stà stampà in prima pagina e la radio la g’à dedicà a me fiol ‘na trasmission fasendoghe sentir la voçe de Marconi. Tanti ani dopo, el me Mirko, tegnendo fede a la vecia passion, el s’à diplomà in telecomunicassioni e cibernetica e “Epoca” la g’à dedicà ‘n’altra pagina, ricordando la leterina de’n butin de 7 ani.
La radio, in casa Girardi, la gh’èra rivà nel 1933; ‘na lussuosa Kennedy (pagà co’ ‘na barca de ”farfale”) con tanto de mobileto davanti al qual tuta la fameia la se riuniva a scoltar le trasmissioni. Me ricordo i …”Tre moschettieri” con Nunzio Filogamo a far Aramis, trasmission colegà al concorso de le figurine Perugina e me ricordo el Trio Lescano co’ la so “Tuli-tuli-tuli… pan”, Alberto Rabagliati co’l deoleto par-aria (“quando canta Rabagliati fa così…”) e ci no’ se ricorda “el sassolino ne la scarpa… aih!” o “Parlami d’amore Mariù”, sospirà da De Sica?
Nei ani ’60 in casa Castellani, po’, è scopià la passion par el “barachin” e par el “baracon”. G’aveimo sora i copi, oltre a la “ground-plane”, n’antena diretiva che ciapava quasi tuto el mondo. Mirko el g’avea el patentin ma mi, dopo la mesanote, trasmetevo anca sensa! G’avea un amigo a Cità del Capo; l’èra orbo e paralisà, salvo par la man sinistra. Ma el più belo l’èra el “barachin”, overo la banda citadina! Mi trasmetevo col nome de Idra e me fiol più vecio con quelo de Castore. M’èro fata ‘na fila de amissi che, salvo un par, no’ ò mai conossù de persona come “Igor de le nevi” (el tacava: “Attenda, gentil signora, che mi sfili i guanti e mi levi il cilindro!”). Ogni tanto, causa la me voçe giovanile, gh’èra ci me invitava a “na verticale”, overo, n’incontro, ma mi ò senpre fato le rece da marcante. Uno, a la fine, el s’à deciso a dimandarme “quante spire hai?” (quanti ani gh’èto). Mi g’ò risposto. Beh, dopo qualche minuto de “silensio radio” me son sentì dir: “Son restà de sal”!… e ò perso l’amigo. Me fiol, paraltro, andando a far ‘na verticale con una “voçe feminile, bellissima” el s’à catà davanti un buteleto de 13 ani… e de sal el gh’è restà anca lu. La nostra machina la sfodrava sul davanti do “fruste nere”, una par parte, tanto che la parea un gril. Quanta gente che, grassie al nostro “barachin” avemo conossù in tuta l’Italia! I de più i è stà in Val di Non, ciamà “la val barachina”, dove parfin da i canpanili spuntava-sù le antene, sconte-via da ‘na croçe. Tanti amissi che i n’à iutà a catar strade, alberghi, monumenti e tuto questo, grassie a un italian: Guglielmo Marconi! Nato a Bologna; in via IV Novembre n. 7, el 25 april 1874, Marconi l’à reaiisà la so invension ne l’istà del 1895, quando, un colpo de fusil l’à dà el segnai de l’avenuda ricession oltre la colina dei Celestini; era nata la telegrafia sensa fili. EI 12 dicenbre 1901, po’, Marconi l’à provà che la trasmission e la ricession de le onde hertziane no’ i era limitade a brevi distanse; el segnal lancià da la stassion Poldhu in Comovaglia l’à traversà l’Atlantico e l’è stà da lu ricevù a Saint John’s de Terranova; la curvadura de la tera no’ l’avea impedì la trasmission!
Tanti, da alora, i è stà i salvatagi, grassie al telegrafo. Anca el Titanic, in quel disgrassià apriI del 1912 l’avea lancià I’SOS. Premio Nobel par la fisica nel 1909, Marconi l’è stà nominà Senatore del Regno d’Italia, Presidente del Consiglio Nassional de le Ricerche e de la R. Academia d’Italia, 16 lauree “honoris causa”, 25 onorificense, 12 citadinanse onorarie, ecc…
El 20 luio 1937, a soli 63 ani, l’è morto a Roma e in quel momento le radio de tuto el mondo le à sospeso le trasmissioni par diversi minuti. I è queste le robe da ricordarse par sentir ancora l’orgolio d’èssar italiani; gh’èto ‘vu anca, tra le mejara de altri luminosi ingegni, un Guglielmo Marconi, e dighe poco! Femoghelo presente ai nostri fioi e de spesso!

Wanda Girardi Castellani