L’Angolo de la Wanda – Maggio 1991 – “Seteçento ani fa – Verda da Salizzole: un sogno”.

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“Seteçento ani fa – Verda da Salizzole: un sogno”.

“La s’ avea insognà un can che coi so sbaiamenti l’ avaria impenì la tera… ”

El 1° otobre 1259 el signor de la Marca Veronese, Ezzelino III da Romano ferì dal guelfo Buoso Da Dovara, dopo 33 ani de regno I’à tirà i sgherleti nel castel de Soncino. Propio a la so corte era aparso el primo scaligero, Federico, podestà de Cerea, nele so grassie fin al 1257 quando, ritegnù reo de congiura, l’è stà brusà in piassa Erbe al son de la canpana del maleficio. La podestaria de Cerea l’è pò passà a Mastino che, morto Ezzelino, I’à assunto ànca quela de Verona (1260). Su l’asta è andà a sventolar da quel momento la bandiera de le arti; na croçe d’oro in campo blu, i colori che ‘ncora ‘dèsso i rapresenta la çità. Mastino l, par aver messo pesseta in na, question relativa a la violensa fata a na butela, i parenti de la qual i reclamava la testa del reo mentre lu l’era par le nosse riparatrici, l’è stà copà a cortelade soto el Volto Barbaro el 26-10-1277; el primo de la serie… parché de scaligeri morti nel so leto con tuta probabilità no’ ghe n’è stà gnanca uno.
No avendoghe vu fioi legitimi, gh’è sucedù el fradel Alberto che intorno al 1290 l’à finalmente afermà la signoria. Tri, i è stà i fioi mas-ci legitimi de Alberto l: Bartolomeo, morto giovane, Alboino, morto ànca lu prima de portar le scarpe da vecio e Cangrande, cusì ciamado par la so statura pitosto insolita a quei tempi: un metro e ottantadu, e po’, soratuto, par i grandi meriti politici e militari.
EI papà Alberto, se usa dir che l’è stà malà “del mal de la piera”. De fato, soto el so governo è nata la Domus Mercatorum (1301), la Logia de le Sgarzarie (centro de afari, specie lanieri, in quanto i scaligeri i era marcanti de lane). Alberto l’à po’ contribuì a l’eression de la bela cesa de Santa Anastasia che in origine la dovea èssar intitolà a Pietro Da Verona, martire dominican; l’à restaurà el ponte de la Piera e rinforsà el ponte Noyo; l’à rinovà le regaste S. Stefano e costruì quele de la Beverara (S. Zen); l’à restaurà el çercolo de muri comunali, vèrto porte e strade ecc…
Dopo de lu, sparì i du primi fioi, eco finalmente, investì de tuti i poteri a soli 20 ani, el nostro splendido Cangrande che subito l’à podù, oltre quela del comune, caricarse de l’investidura del Re.
La bandiera de la Domus Mercatorum l’è restà su l’asta ma rènte è volà quela scaligera (scala de 4-5 scalini bianchi in campo rosso, con in più l’aquila imperiale; el santo usel dantesco). “Scala!!!” l’è deventà el sigo de batalia par i eserciti e de gioia par el popolo. Quando però Enrico VII el g’à dà ‘nca el titolo de Vicario de Vicenza è insorta Padova e tuta la parte guelfa de la Marca; l’è stà questo l’inissio de na longa guera contro la ghibellina, scaligera Verona. El 24 agosto 1313 a Buonconvento moriva l’imperador e con lu el sogno de na restaurassion del poter tedesco in Italia. L’ano dopo gh’è tocà a Papa Clemente e a lu è sucedù Giovanni XXII del qual Cangrande no l’à mai godù le simpatie. In quel periodo, col consenso del Principe veronese, s’à insedià ne l’altipian de la Lessinia, a nord de la çità, tra boschi e pascoli quasi spopoladi, de le popolassioni tedesche che tanti i identifica coi famosi Cimbri.
La guera con Padova, de tanto in tanto interota da tratative de paçe, l’à continuà a inperversar, tra vitorie e batoste, spartì pari-e-pata, tra i du contendenti.
El più grande dei Scaligeri: guera, arte, amor.
Nel 1291, seteçento ani fa, prima de metar al mondo el so terso fiol, Verde Da Salizzole, moier de Alberto l, la s’avea ‘nsognà che ghe sarìa nato un can che coi so sbaiamenti l’avarìa ‘npenì la tera. Forsi par questo, a Francesco i g’à ciamà “Can”. Po”anca darsi però che ‘l nome el ghe vegnesse dal Gran Kan, deventà celebre grassie al “Milione” de Marco Polo; un libro che ghe piasea a papà Alberto. Can Francesco I’era biondo, risso, belo, inteligente e simpatico. La so alta statura l’è stà possibile stabilirla el 27 de lujo 1921 quando, in ocasion, del seicentenario dantesco, i à vèrto l’arca, tirandola zo dal portal de la cesa de S. Maria Antica.
La busa scavà nela piera, ‘ndò i avea messo el corpo, la misurava un metro e otanta e Cangrande el ghe stava drento ransignà. Fantasioso e passional, I’avea sequestrà la dona dei so sogni; la bela Giovanna De Svevia, quando, in viajo par la Germania, verso el futuro sposo, I’avea fato tapa a Verona da la sorela Costansa, mojer de Bartolomeo. Par Giovana che I’avea fato andar in fiame el cor del biondo Principe veronese; el viajo, quindi, l’è finì lì.
Paraltro, Cangrande, no”l brilava çerto par eccessiva fedeltà.
Se no”l g’à vu fioi da la sposa, in conpenso el ghe n’à vu òto da altre done çerti… più un numaro ‘nprecisà de “probabili” (almanco a deta del popolin).
A la mensa del Principe, senpre vèrta e abondante, ghe trovava scàno tuti i giorni, 300 pitochi. Le tòle (asse su cavaleti) i le montava e smontava soto la logia de Fragiocondo e pena fora del palasso che ‘nco l’è sede de la Provincia.
So ospite ilustre però l’è stà anca Giotto, rivà a la so corte reduce da l’aver afrescà a Padova la Capela dei Scrovegni. Del so passagio è restà na pitura su un muro e ‘l ritrato del “Signore” su na tòla. Dante inveçe I’à sogiornà a Verona nei ani 1312-13-18-19 ma el gh’era stà ‘nca fra ‘l 1303-4.
De Cangrande, più che ospite, I’è stà consilier, araldo e soratuto, amigo. Se el Boccaccio I’à dedicà al grande Scaligero una de le so novèle nel Decamerone (1,7) Dante, dopo averghene fato riferimento in più punti de la so Comedia, el g’à dedicà adiritura el Paradiso: “memore dunque de’ più volte fattimi benefizi e a pareggiare e conservare l’amicizia, quella sublime cantica della Commedia, la quale è decorata del titolo di “Paradiso”, a voi intitolo; a voi offero, a voi finalmente raccomando” (epist. XIII cap. 1,3).
Fedele ai Asburgo e par questo ostegià dal Papa, quando el 16.3.1317 l’à respinto n’intimassion del Pontefice che’l g’avea disegni politici difarenti dai soi, l’è stà scomunicà. Assolto paraltro da I’acusa de eresìa, de la qual l’era ànca lu parso in udor, quando un so congiunto, Piero Nani (pàr, co l’aiuto de Dante) l’avea tentà con magie e striòssi de far andar a quel paese el Vicario de Cristo.
A difarensa dei so pàri contenporanei, Cangrande l’è stà senpre generoso ànca verso i nemiçi. EI ghe n’à dà prova quando so cusin Federico Dela Scala, conte de VaI Polesèla, nel 1325, ‘profitando de na so malatia, l’à tentà de cavarghe da soto el careghin. Guarido, el signor de Verona el s’à limità, par punir el tradidor, a bandirlo confiscandoghe i beni e butàndoghe zo ‘l Castel de Maran.
Dai 15 ani in sù l’è stà praticamente senpre in guera ma questo no g’à ‘npedì de organisar giostre, tornei e feste memorabili nonché de interessarse ativamente de l’edilissia e de le arti. Intorno al 1322 I’à scominçià na nova cintura de muri intorno a Verona.
L’à fato inoltre na tòre (ancora esistente) in mèso al leto del fiumè (tra Ponte Cadena e del Risorgimento) da la qual vegnea tirà na cadena de sbaramento de la via de aqua, a monte, quando malingreti cambi de guardia e zughi politici i g’à fato ‘ntèndar che l’era ora de guardarse dai feudatari tedeschi, no’ più difensori del ghibelinismo italian.
EI 10 setenbre 1928, dopo ani, finalmente I’à podù entrar in Padova. ‘Dèsso no restava che Treviso, capital de la Marca ma questa, ai primi de lujo del 1329, disperando ne la vitoria e contando sula generosità e giustissia del Scaligero, I’à deciso de vèrsarghe le porte, cusì el 18, i veronesi i I’à passa, sensa colpo ferir .
Ma na febre violenta avea za ciapà Cangrande, forsi dovuda a na congestion par aver beù, sudà, I’aqua de la fonte del convento de Santiquaranta, ‘ndò ‘l g’avea el quartier militar. Fatostà che’l 22, dopo na teribile agonia, l’è morto nel Vescovado de quela çità, ma èla stada po’ na congestion ??? EI fato che nel 1921 el so corpo I’aparisse intato (cavei, onge, pèle) faria sospetar el cianuro; un mèso de moda, a quei tempi, par cavarse dai pie nemiçi e rompitogne, in genere. Conta le cronache che anca Ezzelino III da Romano I’era aparso intiero: “incoròto come un santo” quando Cangrande nel 1318 I’avea fato vèrsar l’urna par rendarghe omagio. Comunque la sia ‘ndà: rivestì de pani orientài, sdraià su un caro tirà da 4 cavai mòri, con la spada sul pèto, el “biondo gigante scaligero” l’è stà portà al so palasso, acolto da i rintochi de tute le campane de la so Verona. Dopo na prima sepoltura, gh’è stà erèta l’àrca sòra el portal de la Cesa de fameia, sula cuspide de la qual, in seguito, i à inalsà la famosa statua equestre; el più bel monumento de l’arte veneta del XIV secolo. El clero veronese, co”l so vescovo, Tebaldo De Fabbri, no’ l’à ubidì a i ordini de Giovanni XXII e ‘l s’à streto ‘ntorno al so amatissimo Principe, morto sensa la revoca de la scomunica, tributandoghe solèni onoranse religiose.
Dopo de lu, morto sensa eredi legitimi, la Signoria Scaligera, pian a pian l’à scominçià a far caolea. “Pronti a la spada… ma al cortel più pronti” (come l’à scrito B. Barbarani) i s’à scanà un con l’altro.
Mastino Il, Alberto Il, Cangrande Il, Cansignorio… Bartolomeo Il copà a cortelà dal fradel Antonio l, Canfrancesco… po’, come I’à scrito, fasendo sue la parole de Amleto, Mario Carrara: “el resto, l’è silensio”… (ròto dal rugito del leon de S. Marco).

Wanda Girardi Castellani