L’Angolo de la Wanda – Luglio ter 1994 – “RITORNA A CASA GIUSEPPE LUGO”.

…a cura di Graziano M. Cobelli

gcobelli05@gmail.com

Quatro Ciàcoe: da Verona

“RITORNA A CASA GIUSEPPE LUGO”.

Èrimo in pochi, a “Villa Vento” de Custoza, e! 25 magio a spetar el ritorno del tenor Giuseppe Lugo: 8 in tuto, con i fedelissimi Pollini, Zatachetto, Antoniazzi e Pezzini. E sì che, dopo el concerto de comemorassion, el 29 april, in un Filarmonico pien come un ovo e dato che el giornal “l’Arena” el 24 magio I’avea stampà l’invito a la mesta cerimonia, gh’èra da spetarse ‘na partecipassion al manco un pel più consistente!
A mesodì in punto el Bepi l’è rivà da Milan, compagnà da la moier Susanna e da uno de i so 5 fioi.
Quante tristissime considerassioni, vardando quela casseta coerta da un drapo rosso; picola, tanto da poder èssar contegnù ne le mane! Ci-sà se ‘l “nostro”, a Milan, in qualche note insone, nei ultimi tenpi, ciapà da la malinconìa par I’oblìo inmerità, dopo tuto quel gran sfolgorìo de luci de la ribalta, I’avarà podù imaginar che’l sarìa un giorno tornà cussì a la so Custoza, in un mesodì de fine magio, co’ ‘l sol a pionbo sul cortileto ingiarà dove che par ani I’avea menà i passi soridendo bonariamente ai clienti tirà in “Vila” più che altro da la sghìa de conòssarlo?
‘Dèsso, pian a pian, in silensio I’emo compagnà al çimitero e in atesa de altra sistemassion, I’emo messo in una capela a cao de la scalinada, andò, sfantà el mortorio, l’è restà ancora ‘na òlta solo anca se finalmente consolà tra le so dolçi coline fodrà de càrghe tirèle che za le inpromete ‘na nòva dorada vandema.

Wanda Girardi Castellani