L’Angolo de la Wanda – Luglio bis 1999 – “TRENT’ANI FA… LA CONQUISTA DE LA LUNA” – (1969-1999)

…a cura di Graziano M. Cobelli

gcobelli05@gmail.com

Quatro Ciàcoe: da Verona

“TRENT’ANI FA… LA CONQUISTA DE LA LUNA” – (1969-1999)

“… quel pié sospeso sóra la luna;
‘na note lónga come nissuna!”

Fin a la metà del 1959 la luna l’èra restà vergine in quanto la conossensa che ghe n’avèvino l’èra ristreta a la so vision traverso i telescopi, no’ ancora satelitari. E no’ l’èra poco se se pensa che èrimo riussì zà a védar particolari de pochi chilometri.
El 12 setenbre 1959 la sonda “Luna 2” sbarà da l’URSS l’à tocà par la prima volta el nostro satelite scominçiando a mandar in fumo le fantasie de tanti poeti e romansieri: Giulio Verne, a parte, che, in “Da la tera a la luna” e “Intorno a la luna” l’èra, za a la metà de l’800, come el so solito, andà viçin a la realtà.
Ma i russi che dopo l’esperimento del 3 novenbre 1957 con la cagneta Laika, el 12 april del 1961, con Yuri Gagarin i à po’ finalmente vèrto a l’umanità la via del Cosmo, i aveva, sempre nel 1959, (el 2 genàr) tentà, sensa sucesso, l’inpresa lunare, quando la sonda l’èra passà a 6000 km da la superfice del pianeta deventando el so primo satelite artificial, subito batesà “Sogno”.
El 10 de otobre, ‘stesso ano, “luna 3”, girando intorno al nostro satelite l’è riussida a fotografarghe l’altra facia sfatando cusì ‘n’altra barca de legende e altre fotografie, ancora mèio, i è stà otegnude nel lùjo 1965 da la sonda “Zond 3”, anca ela russa, destinà a l’esplorassion del sistema solar.
Nel 1962 l’America, pónta sul vivo dai sucessi rossi, l’à tacà a darse da far (ànca par tegner fede a la promessa fata al mondo, un ano prima, dal presidente Kennedy) rivolgendose anca ela a la luna co’ le sonde “Ranger” che le sarìa dovude cascàrghe sóra trasmetendo fin a l’ultimo, sequense cinematografiche. El primo sucesso l’è stà otegnù col “Ranger 7” lancià el 31 lùjo 1964. Dopo altre do missioni, el 31 genàr 1966 eco la “Luna 9” (URSS) con i primi ateragi morbidi, seguì el 2 giugno dal “Surveyor 1” (USA) che ‘l ‘n’à mandà le prime foto lunari riprese da tera (pardon, luna). Finalmente, coline e crateri che avéimo senpre visto da l’alto se podea védarli come normalmente se vede tute le robe de sto mondo.
Da quel momento l’è stà ‘na gara continua tra USA e URSS a ci riva prima… fin a lùni 21 de lùjo 1969 quando l’America, con l’Apollo 11, l’à vinto la gran partìa con el primo ateragio e i primi passi umani sul satelite “dei inamoradi” cantà da meiara de poeti; protagonista de altretante meiara de rosarie. Un ano prima, el 27 marso 1968, Yuri Gagarin, el primo astronauta, l’era morto in volo ne l’esplosion del so aereo.
Ma, tornando a quel 21 lùjo 1969; me ricordo che in quela longa note, a vardar quel primo piè sospeso tra la scaleta e la luna, èrimo in un albergheto soto le Tre Cime de Lavaredo. Avèimo tacà la TV portatile e, con me marì e me fiol più vecio, dopo aver mandà in leto el più picolo (che no’l ne l’à mai perdonà), sentadi sul leto, un ocio al teleschermo e uno al cel che tacava a sveiarse, a le 4,57, col cor che bateva a martel, emo compagnà col respir l’astronauta Armstron nei so primi incerti passi inebiandose i oci de lagrime a la vista de quele peste stranbe a rigoni orisontali. Aldrin, restà sul Lem el stava riprendendo el colega co’ la cinepresa e sul schermo TV, l’omo, serà ne la so mastodontica tuta lunare, el se stajava contro l’ombra proietà da “L’Aquila”, l’aparechio che rapresentava, lì, nel lógo più distante da casa mai ragiunto prima, un ideal cordon de congiunsion co’ la tera.
A le 5,20 i du astronauti, che i s’éra spostà de ‘na trentina de metri, i à finalmente piantà la bandiera americana rinforsà de fero par dar l’ilusion che la podesse sventolar. Oltre a la bandiera a stele e strissie i à lassà ‘na targa con la scrita “semo vegnudi in pace a nome de tuta l’umanità”.
Da sta mission, durà dal 16 al 24 de lùjo de trent’ani fa, Armstrong, Collins e Aldrin i à riportà, oltre al pien successo, e a imagini storiche, maraveiose, circa 22 kg. de rocce lunari.
El soggiorno sul nostro satellite l’è durà 21 ore e 36 minuti.
La storica mission de l’Apollo 11 la s’à po’ conclusa con l’ateragio ne l’Oceano Pacifico, a le 18,49 (ora italiana) el 24 de lùjo.
Dopo de alora gh’è stà un altro alunagio ne l’Oceano de le Tempeste con l’Apollo 12, ne la mission dal 14 al 24 novembre del stesso ano. Tra l’11 e el 17 april del ’70, Apollo 13, inveçe, dal nome quantomai profetico: “Odissey”, l’à tegnùdo col cor sospeso tuto el mondo par ‘na fàla nele tubadure del sebatoio de l’ossigeno; vera e propia “odissea” finida col salvatagio dei astronauti Lovel, Swigert e Haise che i s’avea rifugià nel Lem, girando intorno a la luna par po’ rientrar fortunosamente su la tera. (ghe n’è stà fato anca un film).
Po’, gh’è stà el sucesso de l’Apollo 14, tra el 31 genàr e el 9 febràr 1971, co’ la dissesa dei astronauti ne la zona de Fra Mauro dove Alan Shepard, Stuart Roosa e Dean Mitchell par catàr-su 43 chili de roce i à usà adiritura ‘na cariola.
Altra dissesa: dal 26 lùjo al 7 agosto, ‘stesso ano, con l’Apollo 15.
Nel 1972, in aprìl, l’è stà la òlta de l’Apollo 16 e po’, in dicembre, Cernan, Evans e Schmitt i è alunà con l’apollo 17 recuperando anca ‘na scatola con 5 rati esposti a l’influensa dei ragi cosmici.
Ghe sarà in avenir sicuramente altre imprese più grandi. L’omo el tocarà mondi ci-sà mai quanto distanti ma noialtri che l’emo vissuda, ricordaremo senpre con l’emossion de alora…
“quel piè sospeso sora la luna; ‘na note longa come nissuna”.

Wanda Girardi Castellani