L’Angolo de la Wanda – Luglio bis 1994 – “‘Na vita par la lirica… Al basso Bonaldo Giaiotti el XII premio “Giovanni Zenatello” (17 Aprile 1994)”.

…a cura di Graziano M. Cobelli

gcobelli05@gmail.com

Quatro Ciàcoe: da Verona

“‘Na vita par la lirica… Al basso Bonaldo Giaiotti el XII premio “Giovanni Zenatello” (17 Aprile 1994)”.

EI nome de forte reciamo, abinà anca a ‘na giornada de vento e aqua; ‘na giomada che à tegnù sgonbre le strade del lago e de i monti da i soliti acanidi gitanti dominicài, à fato sì che nel salon del circolo Uficiài de Castelvecio, g.c., za a le 4 de dopodisnar, un’ora prima del scominçio del concerto, ghe fusse tute le careghe ocupà dal più bel publico de le più bele ocasioni. Giachete e sopràbidi i è restà su le spale inveçe de inbugar el guardaroba… ma anca coerti s’à batù brocheta, almanco fin che no’ g’à pensà l’ospite d’onor, Bonaldo Giaiotti, XII premio “na vita par la lirica 1994”, a scaldarne co’ la so splendida voçe. EI saludo de apertura el l’à fato el nostro Nando Tavoso co’ la so solita sinpatica senplicità. Presenti: el dr. Campanella, Vice Presidente de l’Ente Lirico, el novo diretor Mauro Trombetta e altre autorità, civili e militari. A impiturar, da par suo, el personagio Bonaldo Giaiotti, omo e artista, g’à pensà el dr. Carlo Bologna, senpre preparadissimo e soratuto, ciaro e brilante ne le so esposissioni. Giaiotti, otimo basso, 62 ani portà a la bersaliera, friulan de nàssita, ma considerado veronese de adossion par via dei 31 ani de atività nel nostro anfiteatro, su le sène da 37 ani, l’à debutà in ‘Rena nel 63 co’ ‘l personagio de Ramfis ripetù, solo qua, ‘na quindesina de òlte. EI so repertorio, paraltro, l’è vastissimo; ‘na particolarità che g’à consentido de poder calcar le sène de tuta l’Europa e po’ de l’ America; Cincinnati, dove nel ’59 l’à debutà nel “Barbiere de Siviglia” e a New Jork dove che dal ’60, e par dies’ani, l’à cantà ininterotamente al mìtico Metropolitan. ‘Na figura nobile d’omo che à savù nobilitar al massimo i personagi che l’à interpretà.
L’è stà un splendido Alvise Bodoero ne la Gioconda, un memorabile Zaccaria nel Nabucco, un comovente Timur ne la Turandot, un severo inquisitor nel don Carlos ecc…; ‘na voçe che, oltre a èssar de alta classe, siora de professionalità e dotà de ‘n frasegio insolitamente ciaro, la g’à el pregio raro de ‘n’umanità che invòltola e magicamente coinvolge ci la scolta. Carlo Bologna l’à sotolinià infine che ci sa veramente cantar, sa anca “dir”. Nel giudizio de Celletti, ne la più importante enciclopedia de la lirica, tra i tri bassi ritegnù più importanti gh’è propio lu, Bonaldo Giaiotti, par el qual I’à usà parole come: “EI canta ben”, “L’è molto bravo”… “EI g’à morbidessa, estension vocale, facilità e ecelente frasegio”, ecc… Doti che ‘l tenpo, ansiché ridur, par che l’abia, ecessionalmente, arichì. Finì la picola ma interessante conferensa de Bologna, gh’è stà la premiassion de l’artista con la bela, artistica, targa, opera del nostro maestro orafo Angelo Antoniazzi, seguìda dal “clou” de la manifestassion: el concerto del sinpatico festegiado. I brani che’l n’à regalà i è stà 5: “Vi ravviso o luoghi ameni” da “La sonnambula” de Bellini “Vieni o levita”, dal Nabucco de Verdi, “Un lacerato spirito”, dal Simon Boccanegra, senpre de Verdi, “L’Ebreo” de Apolloni e “Di sposo e di padre” dal Salvator Rosa de Gomez. Dopo la prima parte dedicà a Giaiotti, s’à altemà sul palco la soprano Susan Daniel e el tenor Maurizio Saltarin. La prima l’à cantà brani: da la Carmen de Bizet, da la Dannazione de Faust de Berlioz, dal Pirata di Bellini. EI me personale comento l’è quel che altre òlte gò ‘vù modo de far: «ci-sà parché i giovani i tende a cimentarse con robe dificili sora le quali gh’è senpre la possibilità de far qualche sbrission; la sarà forsi la tipica presunsion, propria de i giovani». Quanto al tenor… qua semo ‘ndà meio! L’à cantà un brano da la Messa da Requiem de Verdi, dedicàndoghelo ai martiri de la Bosnia, po’ un altro dal “Ballo in maschera” de Verdi e, senpre de Verdi, uno da la “Forza del destino”. Voce non ancora del tuto coltivada ma pur za ben inviada e siora de promesse.
Un batiman, infine, a la brava e bela prof. Michela Forgione che senpre conpàgna al piano i cantanti con umiltà, ma con sensibilità e altissima professionalità. Personalmente, vorìa che la fusse, ‘na sera e ‘na òlta tanto, solamente èla, de sèna; son convinta che un so concerto el sarìa ‘na roba granda e, par tuti, godibilissima.

Wanda Girardi Castellani