L’Angolo de la Wanda – Luglio bis 1993 – “Pia Tassinari – Na vita par la lirica”

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“Pia Tassinari – Na vita par la lirica”

Gh’è stà assegnà I’XI Edission del Premio «G. Zenatello 1993» al soprano Pia Tassinari.

Ai me bei tenpi, se usava, par combinar «a sorpresa» le copie ne le festine da balo casalinghe, scrìvar su de i bilieti i nomi de copie celebri e po’, ‘na olta formà i muci, uno de òmeni, par le done e l’altro de done, par i òmeni, se pescava. Ci ghe tocava Romeo, se dovea cubiar con Giulieta, ci pescava Rossana, se dovea çercar el so Cyrano ecc… A mi, ‘na òlta, n’è tocà el bilieto con Pia Tassinari e al pèso balarin de la coada. Ferucio Tagliavini; mai ciapà tanti pestoni in via mia!
Valser e tanghi a parte, quela l’èra propio ‘na copia celebre nei ani ’40 e ’50. Lu l’à fato anca un bàito de film dove, sul model de Beniamino Gigli, de solito l’interpretava la parte del grande tenor, pien de gloria ma anca stabilmente scarognà in amor e fodrà de corni pèso de ‘na bogonela.
Pia Tassinari anco la va par i 90 ani ma i me conta che la guida ancora la machina; sveia de mente come una de çinquanta. Purtropo a la festa che g’à organisà el “Zenatello” in Castelvecio, el18 apriI, davanti a ‘na platea piena frasà, ela no’ l’à podù èssar presente parché inciodada in leto da ‘na febre da cavaI. Presentà dal sinpatico e mai straco presidente Nando Tavoso, a parlà de la longa e prestigiosa cariera de la cantante el prof. Carlo Bologna, nostro espertissimo musicologo, come senpre brilante e esauriente orador, che’l n’à anca fato sentir de le bone registrassioni: «Io son l’umile ancella», da l’ Adriana Lecouvreur (Cilea), «Addio o nostro picciol desco» (in francese) da la Manon (Massenet), «Esser mesto il mio Còf» da la Marta (Flotow), po’ un brano da «Le nozze di Figaro» (Mozart), e du dueti con so mari: «Donde lieta uscì» da la Boheme de Puccini e «Lontano, lontano» dal Mefistofele de Boito.
‘Sta ultima romansa la m’à comossa. Me son ricordà che a un çerto momento Tagliavini, sposà nel 1941 con la Pia, più vecia de ‘na diesina de ani, el s’à messo arente ‘na dona giovane che po’, come spesso sucede, l’è finì col ‘andar par i fato sòi. Cussì, ancò, par assìster ‘stò omo malà e inciodà su ‘na carega a rudele, è tomà in sèna la vecia moier. «Meditate, òmeni… meditate!»
Scoltando quel «lontano… lontano… lontano» che se smorsava a pian, fin a morir ne l’arfio de ‘n’ultima nota de violin, m’à parso propio de vedar ‘sti do veci sposi, come do rotaie che a I’infinido le finisse co’ I’incontrarse, far I’ultimo trato de strada insieme, tegnendose par man. L’altra, o le altre, che, al par de comete i è passade e po’ tramontade nel cel de Tagliavini, no’ le conta più e forsi no’ le à contà veramente mai.
Pia Tassinari I’è nata a Modigliana de Forlì e I’à debutado a Casale Monferrato nel 1929, a vint’ani. Ieri sera è stà contà un anedoto curioso, a riguardo de una tra le romanse più ligade a la so notorietà: «Mi chiamano Mimì». Quando la g’avea 25 ani l’è stà ciamà a sostituir ne la Boheme ‘na soprano che era stà protestà. Purtropo el tenor, che’l g’avea el vissio del goto, subito dopo «Che gelida manina» l’è croà-zo sul palco, imbriago spolpo e quel che I’à dovù sostituirlo I’à preteso de scominçiar dal 2° ato… cussi a la Pia gh’è saltà la romansa del 1°.
In Arena ghe I’emo avù nei ani ’36 e ’37 e po’ nel ’54 in Aida.
Ma l’è stà aclamà ànca nei più grandi teatri d’Europa, de I’America, de la Russia, del Giapon. Grande interprete, soratuto verdiana e pucciniana, I’à podù afrontar, grassie a la particolar estension de voce binà a ‘na grande versatilità recitativa, indifarentemente, parti da soprano e da mesosoprano (vedi Amneris e Carmen, personagio, el primo, interpretà ànca in ‘Rena nel ’54). L’è stà’ grande ànca in opere dificili come «Il giuramento» de S. Mercadante, el «Vortice» de R. Rossellini, «El favorito del re» del veronese Veretti, e la «Messa» de G.F. Malipiero.
EI premio anbitissimo (trofeo artistico in argento, opera del Maestro orafo Angelo Antoniazzi) l’è stà consegnà, in assensa de I’artista, a un so incaricado, el Maestro Rino Savini.
Dopo la premiassion, s’à svolto el tradissional concerto. Tra le interpreti, tute soprani, Loredana Putzolu (lirico), Maria Grazia Montanari (leggero) e Josella Ligi (drammatico); aplauditissime, ànca se gh’è da dir che un punto sora la ghe I’à ‘vu la Ligi, fòrsi, in parte, par la selta del repertorio. La Montanari, de le tre, la m’à parso la più “novissa”, ànca se la promete ben.
Quanto a la sarda Putzolu che la s’à presentà con romanse poco note e longhe un “pàssio” (fin a 17 minuti a I’una) a efèto camamila concentrada, l’è stà la manco seguida. I era za le 19 passà e la “seduta” la durava ormai da quasi tre ore. Se ogni tanto no’ l’avesse sigà forte, saressimo andà tuti in brasso a Morfeo. Dio-grassia, la brava Ligi, in final, la n’à sveià e delissià con un magistral «Ritorna vincitor» de I’Aida del nostro inpagabile Verdi.

Wanda Girardi Castellani