L’Angolo de la Wanda – Luglio bis 1991 – “Don Fabiano Del Cengio – UN SANTO A LA BONA”

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“Don Fabiano Del Cengio – UN SANTO A LA BONA”

“Fora da la porta de la canonica gh’era un campanel, un batòcio e na campanèla; quando un visitador el vegneva a la porta, in base a qual de i tri el sonava, don Fabiano el se regolava”.

Son tornà a Santa Margherita de i Lessini dopo quasi tri ani da la morte de don Fabiano. La cesa l’è senpre quela, moderna e sugestiva, progetà da G. Solaro e R. Bonfigli, bianca, con quela vela che sveta in alto a simbolegiar la preghiera verso Dio, ma l’interno l’è un fià difarente; sparì tute le robe senplici che ghe fasea da ornamento!
In fondo a destra de l’altar gh’è la tonba de don Fabiano za incoronà da qualche coresin “par grassia ricevuda”.
De la canonica, inveçe, no resta che i muri esterni. EI resto l’è çenar; i ricordi del bon Pàroco, el quadro de Santa Margherita in blu-jeans, ciapà a bastonade dai S.S., dai marines, dai squadristi ecc… picà sòra la porta de la cusina, la biblioteca, de la qual no resta che qualche libro sisolà dal fògo, tra careghe scheletride, teie ‘ntorcolade, travi neri croàdi zo e scheie de mobilia.
Vardando da la finestra tuto quel disastro m’è vegnù el magon, pensando a le ore passà con un gòto davanti a ciacolar con don Fabiano, specie de la sacra Sìndone de la qual l’era devoto anca lu.
Zo da la colineta piena de siresari in fior, ànca la vecia ostaria I’à cambià el “Iook” trasformandosse in un bel ristorante, paraltro senpre a bon presso.
Don Fabiano mi I’ò conossùdo verso el 1975 e son ‘ndà po’ a trovarlo periodicamente. EI g’avea la fama de santo anca da vivo e più de uno el giurava de averghe ‘vùdo na grassia par la so intercession, come quel giovanoto che, mi presente, l’è andà da lu a piànsar la so motocicleta cronpà con ani de sacrifici par andar a laorar e po’ robada da qualche giorno. Don Fabiano, batendoghe su na spala el g’à dito: torna a casa, te vedarè che la to moto te la cati su la porta!… e cusì l’è sta.
L’era devotissimo de l’ Assunta e quando se ghe dimandava na benedission el te la dava davanti a la statua de la Madona, forsi l’unica roba çhe s’à salvà da l’incendio. E la Madona la se l’à tirà in paradiso proprio el giorno prima de la so festa! – I contadini de la zona i m’à contà de miracoli grossi come quel, a quela dona che la faseva tanta assistensa a la pòra gente. La s’avea malà a le gambe e nissuna cura la l’avea messa in pié. Na sera, desperà, l’à ciamà in aiuto don Fabiano morto da poco: “Jùteme ti… se no, no’ posso più jutar ci ghe n’à de bisogno!” – La matina dopo l’è saltà zo da’ ‘l leto completamente guarì e ‘dèsso la dise che no la va a balar solo parché la se ne vergogna, essendo vedova!
Me lo rivedo ‘ncora davanti, co la tònega curta e slisa, la bareta nera e el so can Nanù, al seguito. Sto can, rancurà in na sera de fredo e de piova, el ghe fasea da aiuto sagrestan. EI stava sòto l’altar fin che don Fabiano el diseva la messa e se qualchedun rivava in ritardo o el disturbava ciaciarando, l’andava a criàrghe, rusando a pian. – A ci ghe dimandava come mai gh’era un can in cesa, el bon Pàroco el ghe rispondeva: 1°, l’è anca lu na creatura de Dio! 2°, cusì no se podarà mai dir che a messa da mi no gh’è gnànca un can! –
Portarghe roba da magnar, da vestir ecc… gh’era pericolo de vedar ripartir tuto in man a qualche poareto, gnànca diese minuti dopo.
In cambio, el te donava de le ceramiche de Bassan. A me nuora, sicome che’l se ne avea desmentegà, el g’à corso drio zo da la colina con una bròca in man.
A Santa Margherita, don Fabiano l’à ‘nca fato na capèla par i morti in Russia e i despersi. In sta capèla el diseva messa e li gh’è ànca un libron ‘ndove che tuti quei che no à visto tornar i so cari da le sterminade pianure inevà de quela tera distante, i è ‘ndà a scrivar un nome, spesso macià de lagrime.
Ma don Fabiano l’è sta anca un combatente! Par ani l’à dimandà un cimitero par la so parochia sensa poderlo aver. Quando è morta so mama, par rispetar el so ultimo desiderio de dormir viçìn a so fiol, de note l’à ciapà sàpa e baìl e l’è ‘ndà a sepelirla drio la cesa, drento a na vècia cassabanca; po’ l’è ‘ndà in Palestina. Nel ritorno, naturalmente, el g’à ‘vù grane co’ la giustissia… quela dei omeni, spesso par gnente “giusta”. – Ci à conossù sto santo prete no’ ‘l podarà desmentegarlo più. –
Un giorno o l’altro l’andarà a la gloria de i altari, ma ne la gloria del cel… el gh’è za.
Ne l’andar via, verso Chiampo, ò dito mentalmente el rosario e m’à parso che a rispòndarrne, bisbijando nel vento de primavera, el ghe fusse lu; don Fabiano Del Cengio… un santo a la bona. Sì, son sicura che’l m’era a rènte e conto propio che’l sia lu, col so soriso bon, a vegnerrne a tor quando che vegnarà la me ora.

Wanda Girardi Castellani