L’Angolo de la Wanda – Luglio 2001 – “2001”- LA CASTELLANIA DE SUAVIA L’À COMPÌ TRENT’ANI

…a cura di Graziano M. Cobelli

gcobelli05@gmail.com

Quatro Ciàcoe: da Verona

“2001”- LA CASTELLANIA DE SUAVIA L’À COMPÌ TRENT’ANI

A Soave, la matina del 20 magio 2001, par la prima volta in trent’ani, emo “intronisà” più “Spadarini” che “Castellane”!
N’altra novità: gnente processión dal bel paese medioevàl al castel scaligero, forsi parché noialtre castellane de la prima ora semo tute veciote e a far quela longa scarpinà in pontara e a maròcoli no’ ghe la femo più.
Alora; tute su co’ la machina e ci è rivà dopo le diese l’à dovù far i sequeri par catàr un buso andó infilàrse.
Ale 10,30 s’à formà la sfilada, dal ponte levatoio al grande cortìl del pósso. Oltre un çentenàr de cavalieri, dame, sbandieradori, cantanti, balarini, musicisti ecc…, tuti in lussuosi, sfolgoranti costumi del tempo scaligero. Mi, nela me consueta, ormai ventenàl, veste de araldo, m’èro zà pareciada al me posto, sóra la scalinada che porta al salón d’onór del castel, insieme ai me trombetieri. Ale óndese è scominçià el spetacolo, ‘st’ano particolarmente belo e vario e, verso mesodì, anunçià dal sóno dele trombe e co’ l’acompagnamento de’n vento vilàn che me sparpaiava i fòi e me intorcolava la mantela, ò scominçià el cerimoniàl, scrito nela metà del 1200 da l’Imperatrice Dela Scala, moiér de Federico, cusìn de Cangrande, par premiàr co’ le ciave del castel le dame più meritevoli dela só corte.
Le dame che in ‘sto ano le à ricevù dale mane de l’Imperial Castellana, Nenè Lovat, la ciave co’ la tracola damascada, i è stà la dotoressa MAUD JOAN ARKESTEIJN VAN VILLIGEN, olandese de NAARDEN, docente a l’università de Amsterdam de pedagogia, filosofia, sociologia, psichiatria e, tra le altre alte incombense, Membro del Comitato esecutivo per le “cità murade”, dele quali fa parte Soave.
La seconda dama l’è stà’ ORNA CSILLA’G. Enologa in Israele. Direttrice dele relassioni internassionali del Municipio de Tel-Aviv. Fondatrice de vari movimenti giovanili per i diriti civili e la pace.
Terza Dama: PATRICIA GUY. Notissima esperta nel setór vinicolo, la colabora a importanti testade de stampe mondiali. Autrice de volumi sul comercio de vini e liquori nela Londra vitoriana de Sherlock Holmes.
Quarta dama: GISELLA ORLANDI. Colaboratrice de Maria Teresa de Calcutta dela quàl la seguita, con umiltà e carità, l’opera.

SPADARINI:

Prof. Dott. FABIO DOSSI. Uno tra i più conossudi e stimadi chirurghi oculisti. L’è stà’ el primo a operàr la cataratta con un metodo rivolussionario. El primo a praticàr in Europa la cheratotomia radiale secondo Fjodorov, el secondo in Italia a usàr el làser ad Argon ecc… El so curiculum l’è longo come el pàssio e no’ gh’è riga che no’ la g’abia enorme importansa.
Secondo “spadarìn”: BEDONI PAOLO. Presidente dela consulta Economica veronese, Socio fondatór dela Fondassion par l’Arena e el Teatro Filarmonico, componente del Consiglio de Aministrassion de l’Ente Fiera e de ‘na barca de altre Associassioni, una più importante de l’altra.
Terso: Dott. MASSIMO FERRO: Sindaco de Caldiero, Presidente dela Camera de Comercio de Verona, Presidente del nostro aeroporto “Valerio Catullo”, del Centro Estero Veneto e de l’Associassion Italiana Gestori Aeroporti aderente ala Confindustria.
Quarto: dott. ALEARDO MERLIN. Segretario Comunale de diversi Comuni dela Provincia veronese. Presidente ANCI-Veneto e componente de l’esecutivo de l’ANCI nassional.
Dal 1999 l’è Presidente dela Provincia de Verona.
Quinto: Prof. GIANCARLO VOLPATO. Laureado in lingue e leteratura straniera.
Diretór dele biblioteche de l’Università de Verona. Giornalista. Diretór de dó riviste scientifiche e autor de sete volumi monografici e de ‘na quarantina de articoli scientifici.

Wanda Girardi Castellani

(*) andàr in “spadina”. Sensa soprabito, in pani legeri. I “scaligeri” quando i andava a spasso, in “borghese”, i portava, al posto dela spada la “spadina”.