L’Angolo de la Wanda – Luglio 1993 – “Cultura e poesia no’ i è più de moda”

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“Cultura e poesia no’ i è più de moda”

Qualche tenpo fa, s’à svolto a Verona la cerimonia de premiassion del concorso par “la più bela letera d’amor”; concorso organisà da l’Assessorato a la Cultura e dal Club Giulieta.
La deta premiassion, fata nel bel cortil de casa Capuleti in via Capel, l’è onorà da la presensa de n’altra celebre Giulieta; la Masina, moier de Federico Fellini e da le autorità (quele ancora a pié libero). E fin qua, tuto ben, a parte la rabia de i organisadori par la “sifolada” de qualchedun al giornal “L’Arena” el qual l’à dado anpiamente notissia de i risultati, che i dovea star segreti fin al momento de la cerimonia, za el giorno prima.
Ma l’aseno (se fa par dir) l’è cascà quando ch’è stà leto el “parto” del primo premio, “fadigosamente” selto fra altre 1900 letere d’amor, rivà da tuto el mondo… e ‘sto qua l’è risultà ‘na robeta da quinta elementare (domandando vènia ai alunni de ‘sta classe). Ecolo:
«Lo amo par via de la giacheta che’l se mete quando che ‘ndemo fora a cena (ma se ùsela ancora?) e parché el me conta la so giornada (cissà che goduria!). Lo amo par la casa de canpagna che sta vegnendo su, tòco par òlta con el camin e i àlbari de intorno (el se inacorsarà quando che ghe riva le tasse!) Lo amo par la “brioches” de la matina, (e qua ghe scapa la publicità!) parché el me conpagna a vardar le vetrine del centro (speremo… co’ ‘l portafoio a fisarmonica), parché ghe piase farse vedar in giro con mi” (pia ilusion, spece se te lo meni a boteghe).
Par conpletar l’opera, l’autrice de cotanto capolaoro, intervistà da ‘na giornalista l’à dichiarà che no’ l’è miga inamorà e la letera la l’à scrita su misura par el concorso, come a dir, par nissuno e che no’ la g’à propio intension de maridarse, ne ‘dèsso, ne mai ! A la facia de Giulieta Capuleti, de Romeo Montecio e de tuti i romantici come mi.
Questo m’à fato vegnar in mente ‘n altro concorso de San Valentin, un par de ani fa, a Bussolengo. I avea racimolà 3/4 meiara de “frasi d’amor” e su tuta ‘sta massa de roba i à premià un buteleto de 7 ani par: «L’amor l’è… el papà e la mama ch’i se sposa”. Anca qua po’ gh’è stà la solita còmica final del papà che, intervistà, l’à dito: «Ma se sémo sposà za da ‘na barca de ani!” Cusì è cascà anca la bela rosaria che se tratasse de ‘na copia clandestina. Ma che rassa de giurie ciàmeli a giudicar de cultura? “Cultura”… ma no’ l’è più de moda gnanca quela, basta scoltar la TV e lesar giornai e riviste; tinèi del cativo gusto e de insulsagine. Quanto a la poesia, finiremo co’ ‘l credarse de i marsiani, noialtri che ghe volemo ben, specie dopo sentì la “letera” più sora riportà; letera che ne fa sospetar che anca l’amor, come “fiorido sentimento” el sia finì sul granar del Papa, insieme co’ ‘na scariolà de altre robe del bel tenpo andà. L’unica sodisfassion l’è stà quela che almanco a ‘sta “Giulieta 1993”, parmigiana e studentessa de letere (del curucucù), cussì poco inparentà co’ la me sfortunà concitadina, no’ i g’à dà la solita barca de milioni che se usa dar in premio a le monade, ma solo ‘na pena che, visto le premesse, la ‘ndarà a finir in fondo a ‘n càlto.

Wanda Girardi Castellani