L’Angolo de la Wanda – Luglio 1991 – “PAESI DA VISITARE – I TESORI DE CHIAMPO”

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“PAESI DA VISITARE – I TESORI DE CHIAMPO”

Sculture tacà casa a volte desmentegà.

Se màsena çentenara de chilometri pa’ ‘ndar a vedar robe in cao al mondo e magari no lo savemo che qua, a gnànca un’ora de strada, gh’è da passar na giornada splendida, tra tesori unici al mondo.
Chiampo l’è in provincia de Vicensa. Noialtri da Verona ghe rivemo passando da Monteforte d’Alpone (profitando par bear un goto de quel bon), po’ da Roncà e via par S. Margherita dei Lessini a dirghe n’orassion par Don Fabiano Del Cengio. Quindi… par na stradèla sfaltà che la còre tra prà e siresàri, zo, a la citadina.
Li, svoltando a sinistra drio na indicassion bela ciara, se va al convento francescan dove che tàca un scampolo de paradiso.
A mèsa strada dal vialeto incassà tra i albari secolari, gh’è la riprodussion parfeta de la grota de Lourdes, opera de fra Claudio, un grande scultor del qual gh’è in ato la causa de beatificassion.
Davanti a la grota, a l’aperto, se poI scoltar la messa.
A destra, un po’ prima, i à da poco inaugurà na stupenda Via Crucis, in parfeto acordo con el spirito e la tradission dei frati de S. Francesco che dal 1220 i è custodi dei lòghi sacri in Palestina.
Sta Via Crucis la presenta un percorso ascensional de m. 560, con 15 fermate davanti a grupi statuari de bronso alti da m. 2 a m. 2,30, firmadi da sete grandi scultori, tra i quai tre frati francescani: Pierluigi Sopelsa (Venessia) – P. Tito Amodei (Roma) – Fra Silvio Bottes (Trento) -Renato Ischia (Trento) – Franco Biàsia (Vicensa) – Padre Nazareno Panzeri (Brescia) – El sepolcro, parfeta copia de quel de Gerusaleme, con tanto de ruda de piera che scòre eletricamente a serar la porta (q. 32) el tien al so interno uno tra i più bei “Cristi” che abia mai visto, opera de Fra Claudio. (Cristo de la Sìndone). De proposito al prinçipio e nela 11°, 12° e 13° stassion, tra i personagi del drama è stà inserì San Francesco d’ Assisi.
Particolarmente belo e sugestivo, el grupo dela XII stassion, andove che ai pié del Cristo inciodà in crose, oltre a l’ Adolorada gh’è San Francesco che’l presenta un lebroso, sìmbolo de l’umanità decaduda, implorando dal Redentor misericordia e salvessa.
Prima de entrar ne la Via Crucis, l’è consiliabile cronpar la guida (L. 2000) par poderse mèio orizontar .
Finì sta passegiada… in preghiera, amirassion e meditassion, se poI visitar el bel museo che’l contien, oltre a material portà da le missioni, la più bela racolta de fossili che se possa imaginar e tute le opere de Fra Claudio riprodote in gesso. De Fra Claudio gh’è ànca i strumenti da laoro e la so càmara.
La vìsita l’è gratis. Tuti i giorni, manco el vènardi.

Wanda Girardi Castellani