L’Angolo de la Wanda – Giugno 2004 – “LA CANSON DE BALDO ZALON”

…a cura di Graziano M. Cobelli

gcobelli05@gmail.com

Quatro Ciàcoe: da Verona

LA CANSON DE BALDO ZALON

Me mama la g’avèa n’amiga che la vegnéa da Ciosa (Chioggia). La staséa de casa propio sul stesso pato de casa mia e l’èra el me rifugio quando che me pare, par castigarme de qualche lasaronada, el me corèa drio par darme ‘na bela rata de sculassoni. De solito, par consolarme, la vecia ‘Nita la me contava ‘na legenda dela só çità, quela che me piaseva tanto: “La storia de Baldassare Zalon”.

Dunque… l’èra el 24 giugno del 1508 quando che a Ciosa è scopià ‘na tempesta cusìta forte da far pensàr che’l mar el g’avesse la bruta intensión de coèrsàr tuta la çità e i ciosòti spaentà a morte i s’à dimandà se’l Padreterno l’avesse deciso de castigarli pà’ i só tanti pecati. Verso sera però è parso che tornasse la calma e alora un vecio ortolàn; Baldassare (Baldo) Zalon el s’à ris-cià a ‘ndàr darghe n’ocià ai só orti che i se catava da le parte de le foci del Brenta a poca distansa da Sotomarina che a quei tenpi la se ciamava Ciosa Minór.
A un çerto momento l’à sentì ‘na voçe che lo ciamava e òltàndosse l’à visto ‘na dona vestida de nero come in luto streto, sentà su un sòco che le onde le avéa butà su la spiàia. L’èra la Madona e la g’à dito: Baldo, va dal Vescovo senò Ciosa la finirà soto aqua! Pò, montà su ‘na barca che l’èra lì, pronta a riva, la g’à mostrà Cristo, só fiol, morto, desteso sul fondo, diséndoghe pura: védito Baldo, come i me l’à ridoto i tó conçitadini?
El vecio alora l’è corso dal Vescovo Bernardino Venier che subito l’è andà sul lógo de l’aparissión tiràndose drio tute le autorità e la gente dela bela çitadina marinara. Rivadi, i à catà el sòco segnà co”na croçe color del sangue e i à visto anca la barca uda che subito l’à ciapà el largo, sparèndo ai oci de tuti.
Sul lógo de ‘stó miracolo i à costruì, in seguito, prima ‘na ceseta e pò ‘na cesa più granda e su la porta de questa ‘na matina i à catà inpiturada, no se sà da ci, l’imagine de ‘na Madona in luto, proprio come che’l l’avea vista l’ortolàn, lì a ricordarghe ai ciosoti de rigàr driti… senò…!!

Ancò la cesa no’ la gh’è più ma sul lógo dove che l’èra, l’amiga de me mama la me diséa che gh’èra restà un capiteleto de teracota, la stessa pasta co’ la quàl i usa ancora a far le famose pipe e che çerti sacri çimeli, ligà a ‘sta legenda, i è ancora custodidi nela basilica de San Giacomo.

Ela vera… no’ èla vera?… mah…!!

Comunque… nel 1948, a 17 ani, ò scrito ‘sta poesieta in ocasión dei 50 ani de la ‘Nita, par dirghe, a la me maniera, “grassie!”, dela protessión e dele só rosàrie:

Wanda Girardi Castellani

“LA CANSON DE BALDO ZALON”

Vintiquatro de giugno; il quel de Ciosa
cala su la marina ‘na tompesta
che la sberla de bruto tuto quanto.
Se sgasa e se descoèrciola le case
i scuri mena sgnàcare sul muro
e ciama la canpana, la, par-aria
nel scuro dela cela canpanaria.
Baldo Zalón, le spale come un gobo,
drento el tabàr che sgola a barbastrèl,
core ai só orti a un fià de s-ciaransana
e in riva al mar che urla come un lóvo
forte ‘na dona in luto la lo ciama.
“Baldo, la dise, varda in quela barca
me fiol l’è morto, va contarlo a Ciosa,
i è stadi lóri e se no’i fa giudissio
te l’ dise la Madona che i va a fondo!”
Córe i ciosòti e ‘l Vescovo Venier
rènte a quel tronco andove gh’è ‘na croçe
che la sluse de sangue ne le sìte (site=saette)
fin che la barca lenta la sparisse
uda… ne l’orisonte che trà al rosa.
Gh’è a ricordarlo ancora un capitèl
e i veci pescadori ghe la conta
ai mostri scalsi intorno al fogolàr (mostri=monelli)
quando che’l sol va in leto involtolado
ne la só coerta rossa de coràl
e in ‘st’ora le canpane… la rosària
ripete da la cela canpanaria.