L’Angolo de la Wanda – Giugno 1993 – “I òmeni de la val Cembra”

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“I òmeni de la val Cembra”

Conta ‘na barseleta che un sior, in marcia su le Dolomiti, incontrando un montagnar el g’à dimandà quanto ghe mancasse al rifugio. Quelo, testa bassa e bareta fracà, el g’à risposto suto: «Camina… camina!», Ostrega, che vilan!, l’à pensà l’escursionista tornando a rancar par la pontara. Ma dopo’ na vintina de metri el s’à sentì sigar drio: «Par lu… de quel passo li, a rivar ghe manca almanco tre ore»! Beh, la stessa roba la m’è tocà a mi quando che, rivà a Segonzano, in Val de Cembra (nel Trentin) g’ò dimandà a un nativo quanto me g’avarìa volù par visitar le famose piramidi de tera: «Par ela… almanco do ore, anca se la guida la parla de tri quarti d’ora!» E no’ ‘l g’à sbalià po’ de tanto.
EI scominçio de la passegiata l’è un fià prima del paese. Lì gh’è un bar, ma ve sconsilio de bear vin parché gh’è da rancar e tanto. Un bel sentier de salesi, finì nel 1989, el ve farà pensar ai proverbiài quatro passi ma, su e su, ghe n’è par ‘n’oreta. Ogni tanto se cata de i cartèi che spiega el fenomeno che s’è invià a vedar, cussì se g’à almanco l’alibi par far ‘na sosta. A un çerto punto, ahimé, se incontra ‘na brigola de scale che va in diverse diression. Sora, da de le bele piataforme coredà de banchete, se poI finalmente amirar e fotografar i vari grupi de piramidi de tera; un fenomeno che g’à esenpi in tuto el mondo ànca se quele de Segonzano i è le più bele e le più stranbe. Colone alte fin a 40 metri con su la ponta, in precario càlibrio, ‘na spece de còpola da compare Turiddu, tanto che, viste da distante, ‘ste costrussioni de la natura le par più che altro de i giganti in marcia par ci-sà ‘ndove. Vardàndole, se capisse el parché le abia fato fiorir tante legende, tante rosarie, guadagnandose, a seconda del logo, i nomi più vari e fantasiosi. Qua, i ghe ciama “òmeni”, in Francia i ghe ciama “fèe” (fate), in val d’ Aosta “muralie del diàolo”, in Brianza “fung de tera”, “grore” nel bressian ecc… EI termine “piramidi de tera” i ghe I’à dà inveçe i siensiati. Come s’àle formà? I dise, par assion de I’aqua su ‘n teren morenico, costitui da argila, limo, sabia e material grosso; sassi, e massi porfirici, con esclusion de i calcari dolomititici. EI material fin el g’à dà I’impermeabilità, mentre quel grosso I’à ridoto la plasticità, dàndoghe robustessa. ‘Sto impasto, po’, el presenta un bel color gialo-oro che ‘l varia a seconda del grado de umidità e de la luce, le gosse de piòva, colpendo el teren, le smòe le scaiere, creando ‘na ragera de russeleti che co’ I’andar del tempo i lassa ‘l segno, in forma de incisioni, coni, pinàcoli, calanche, greste, colone, castèi. Naturalmente, I’assion creatrice de I’aqua la finisse quando che la cata la base che, essendo porfirica, la ghe fa da piedestaI.
Piòve modeste e ben spartide in pochi giorni de l’ano e venti costanti i à fato el resto par pareciarne sta maraveia che te conpensa ben de la fadiga fata par andarle a amirar.
Al ritorno (stando ben atenti a no’ metar le ciape in tera con qualche sbrissiarola) se gà la sodisfassion de incontrar quei che, alegramente ignari, i ranca in su par el sentier, convinti che tuta la fadiga la consista in quel, e l’è un ato de carità cristiana trategnerse dal dirghe «Forsa che si solo al prinçipio e ‘l belo el vien dopo!»… senò ci-sa mai quanti i voltaria galon, perdendo ‘na gran bela e rara esperiensa.
In finis ‘na òlta rivà al bar; ancora gnente vin che si tuti sudadi. Ma un panetin co’ ‘l salame e magari ‘na bireta (beùda a pian) quei ve i concedemo che ve li si merità.

Wanda Girardi Castellani