L’Angolo de la Wanda – Gennaio ter 1995 – “Rodolfo Valentino, i cent’ani de… l’idolo de le none”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Rodolfo Valentino, i cent’ani de… l’idolo de le none”

Se’l fusse ancora al mondo el g’avaria, giusti, çent’ani el 6 de magio del 1995 e ‘l podaria averghe l’aspeto che, grassie al truco, el presentava ne la parte del papà (ma el fasea, in dopio, primo ne la storia del cine, anca quela del fiòl) nel “Figlio dello sceicco”, girà pochi mesi prima de morir.
RODOLFO, ALFONSO, RAFFAELLO, PIERRE, FILIBERTO GUGLIELMI, in arte RODOLFO VALENTINO, fiol de’n ex uficial de cavaleria laureà in veterinaria, nato nel 1895 a Castellaneta, dopo èssar passà prima da’n colejo a l’altro po’ da la “Sapiensa” de Perugia, scartà par deficensa toracica da la scola Machinisti navài de Venessia, el s’èra diplomà in agraria a Genova, fermo restando che l’èra più esperto a misurar la metrica de i versi che non le pèrteghe de teren. El scrivea a “maneta” poesie d’amor e, contrariamente a le malelengue, specie recenti, l’è sicuro che gh’è senpre piasù le done, almanco quanto che lu el g’à piasso, senpre, a lore. Paraltro, visto che, tra la vita de boheme a Parigi e “capèle” varie, risultava che’l g’avea poca voja de laorar, ‘pena che l’à conpì i disdot’ani, so mama, con 4000 dòlari in man e la so benedission, la l’à spedì a far fortuna in America ando che l’è sbarcà dal piroscafo Cleveland el 23 dicenbre del 1913. Ma par un tòco gnanca par el nostro Rudy l’America no’ l’è stà ‘n’ America! L’à laorà come agrimensor, po’ a le dipendense del proveditor de i parchi de New York e po’ come “taxi-dancer” al Maxim, par veciote piene de schei, grassie anca a l’esperiensa maurà tra i “apaches” parigini. L’è stà propio nel periodo “Maxim” che l’à cambià el nome in “Valentino”. Quando è scopià la guera mondial I’à çercà de aruolarse in aviassion, ma l’è stà scartà par un ocio difetoso: un strabismo che ‘l dovea in seguito èssar una de le frece mèio a l’arco del so fàssino. Nel mondo del cine el gh’è rivà nel 1918 co’ ‘na partesina de conparsa in “Alimony”. A quei tenpi, par un ator latin, nel novo mondo ghe podea èssar solo parti da “villain”, cioè da cativo, ma quando finalmente è rivà ‘n ruolo più consistente in “La sposa vergine”, Valetino el s’à ribelà de dover interpretar un conte italian, pitosto farabuto. «No’ te vorè miga che’l sia american?», el ga dito el regista Flynn. «Nò… (el g’à risposto), quando mai s’à visto un conte american?». Giusto in quel periodo I’à sposà ‘na çerta Jeans Acker; un matrimonio che, finì za a la prima note, I’à alimentà in seguito ‘na caterva de brute ciacole, sicuramente false. Valentino, contrariamente a la magior parte de i coleghi de alora e de adesso, I’èra de ‘na discression comovente, par via de done, e la verità su ‘sto matrimonio falì no’se I’à savù mai anca se se pòl far ‘na congetura, tegnendo presente che’l “nostro” I’èra in fondo un teron, vissù, par zonta, in tenpi quando che la verginità I’èra un “sine qua non” anca par noialtri veneti. Subito dopo, paraltro, I’à conossù e amà la Natacha Rarnbova; ‘na dona pitosto navigada, che oltretuto, ne la vita come ne la cariera, l’à g’à fato più mal che ben. El film che l’à reso celebre in tuto el mondo l’è sta “I quattro cavalieri dell’ Apocalisse”, dal bel romanso de Blasco Ibanez. In ‘sto film Valentino el fasea de tuto: el gaucho, el balarin de tango, el patriota. Un altro film trato da’n romanso de Blasco Ibanez, l’è stà “Sangue e arena” (1922). Nel 1921 l’èra stà la volta de’n cèlebre romanso de E.M. Hull, “Lo sceicco”; quel che più de tuti à fato sognar le nostre none. Valentino, sul so cavaI bianco (po’ inbalsamà e messo a guardia de la tonba del paron), con el turbante e ‘l baracan a righe nere, ancora , desso da le vece foto el fa inbastir sogni a la grande! A lu ghe dovemo l’idea de farghe el basaman a le done, drento al palmo inveçe che sul dòrso (‘na roba da far vègnar i sgrisoloni su e zo par la schena anca a la più maràntega de le vece) e l’è stà pura lu a lanciar l’orolojo da polso anca par i òmeni. In total i film che l’à interpretà, dal 1918 al 1926, i è stadi 32. L’ultimo, “Il figlio dello sceicco”, nel 1976, a 50 ani da la morte del divo, l’è stà riproposto nei cine de mèso mondo. Nei ultimi tenpi Valentino l’èra andà zo de corda, anca par la guera che i ghe fasea i giornalisti americani, incassà de bruto che ‘n italian el g’avesse tanto sucesso, specie co’ le done. Non podendo tacarlo come ator, i lo tacava come omo con insinuassioni velenose, la più picola de le quali l’èra che’l se profumasse e incipriasse come ‘na dona e lu, par riscatarse davanti a l’opinion publica, el ghe n’avea parfin sfidà un a duel. «Voria morir par ‘verghe ‘n’anima», el ghe scrivea, desperà, a l’amigo Florey el 15 agosto del 1926, 8 giorni prima de morir. EI 23, Valentino, operà sensa sucesso de peritonite, el pregava che no’ vegnesse sbassà la tenda de la so camara; el volea luce, tanta luce, presagendo za el scuro eterno! EI giorno dopo, martedì 24 agosto, el giornal “L’Arena” el ghe dava ai me concitadini la notissia con quatro parole: «L’ator cinematografico Rodolfo Valentino, amalà in ‘sti giorni de peritonite, dopo l’ultimo tentativo de i dotori de salvarlo con ‘na trasfusion, ieri l’è morto». Su la stessa pagina, un articolo longo 4 volte par un camarier che l’avea vinto 360.000 franchi al loto e ‘n altro, longo altretanto, par ‘na dona che la s’avea fulminà col fero da stiro, più un articolon de’n quarto de pagina sul barbier del Duce. La notissia “bonba” de quel giorno l’èra stà, infine, la dissesa, a 520 metri ne la Spluga de la Preta, de la squadra capitanà da Giovanni Cabianca! Giovedì 26, po’, l’Arena la liquidava in maniera telegrafica el funeral de l’ator: «New York, 25 agosto. Malgrado la piova diròta, meiara de persone, inportanti e non, in prevalensa done, le à spetà che i vèrsa la capela ardente dove che gh’èra esposto el corpo de Rodolfo Valentino. Tante done i è svegnude; più de 10.000 i messagi mandà a l’ator durante la malatia. L’inpresario del divo, Joseph Schenck l’à dichiarà che Valentino el guadagnava fin a un milion de dòlari a l’ano». EI resto de la pagina l’ èra praticamente ocupà da i risultati de la “batalia del gran” a la cui trebia avea partecipà Mussolini. Gh’è da dir che al fassismo Valentino el ghe piasea poco, se non altro parché l’avea rinuncià a la citadinansa italiana par quela americana. «Me sònti conportà come un piumin da cipria?», el g’à dimandà Rudy, soridendo par l’ultima volta, al chirurgo che l’avea operà. Nel testamento el g’à lassà tuto al fradel, a la sorela e a la zia de la Rambova; signora Wernef: a Natacha, solo un dòlaro. A Pola Negri, l’ultimo amor, gnanca quelo! A la notissia de la so morte s’à scadenà un uragan de desperassion. Qualche dona la s’à adiritura suicidà. Fin a pochi ani fa, me ricordo, i giornài a l’aniversario de la morte, i riportava la notissia de ‘na dama misteriosa, velada de nero che la ‘ndava a portar un masso de rose rosse su la tonba del divo che à fato sognar le nostre none. Tanti i è stà i libri, le comedie (parfin musicali) e i film girà su la so vita. Tanti i so imitadori, tra i quai: el cantante Alberto Rabagliati, el fradel de Valentino, Albert, e parfin Marcello Mastroianni, ma nissuno l’à savudo, come lu, infiamarne la fantasia: bele, brute, giovani, vece, siore, pitoche, colte o ignoranti che fussimo, tute comunade ne l’eterno sogno d’amor.

Wanda Girardi Castellani