L’Angolo de la Wanda – Gennaio bis 2001 – “LA STORIA DE VERONA NEI DISEGNI DE GIANNI AINARDI E VERONA ROMANA NEL PLASTICO DE PAOLO BORSATO E GIUSEPPE ANTONIAZZI”

…a cura di Graziano M. Cobelli

gcobelli05@gmail.com
Wanda Girardi Castellani

Quatro Ciàcoe: da Verona

LA STORIA DE VERONA NEI DISEGNI DE GIANNI AINARDI E VERONA ROMANA NEL PLASTICO DE PAOLO BORSATO E GIUSEPPE ANTONIAZZI

El maestro Gianni Ainardi (Nane), apassionà amante de la nostra Verona; çità come poche, carga de storia e de belessa, da un saco de tempo, su ‘stó tema, el colabora con vari giornai, periodici, riviste ecc… ma, soratuto, el se dedica a studi de ricostrussioni storiche, disegnando mappe, itinerari, depliants, cartoline e manifesti. Alpin, l’à colaborà ale publicassioni ANA, ilustrandole con senpre splendidi disegni. L’è uniformologo e scultór.
Personalmente, pur avendoghene senpre sentì parlàr e conossendo le só opare, fin a luni 27 novembre no’ g’avéa gnancora ‘vú el piasér de strénsarghe la man. L’ocasión la s’à presentà quando son andà a védar la mostra organisà dal Dr. Luca Bajona, Assessorato ala cultura del Comune, nel salón d’ingresso dela biblioteca civica in via Capèl.
El Maestro Nane, vecio amigo de Angelo Antoniazzi, l’à volù farne da Cicerón traverso l’itinerario che va dale testimonianse storiche del primo picolo nucleo abitativo nato su le pendici del còle ancó dito “de San Piero” intorno al primo secolo a.C., ai ani de l’ultima grande guera, rapresentà con un inpressionante disegno de la Çità soto ai bonbardamenti “aleati”.
Gnanca se se inacorse del tenpo che passa, vardando i bei, parfeti disegni comodà, co’ le só dóte didascalie, drento le vetrinete. Come in un film, scóre drio el rodolar dei secoli le varie dominassioni straniere, da quando Verona l’è deventà e restà par ben Çinquessento ani, “romana” par po’, finì el dominio medioevale dela Signoria Scaligera e el curto passagio dela famèia dei Carraresi, cascàr soto la sata del león venessian, dal XV al XVlll sec. E èco che nel 1797 riva un nóvo parón: Napoleón Bonaparte che a só volta, nel 1814, el g’à passà, anca se malvolentieri, la bala ai cruchi che subito, come da só abitudine, i à tacà a far de Verona ‘na Çitadela militàr, fissa de forti, toresèle e muralie. Diograssia, nel 1866 finalmente Verona l’è stà’ anessa al regno d’Italia.
Tuto questo nei disegni de Nane Ainardi; ‘na mostra cronologicamente ordinada nele quatro grandi epoche: romana, medioevale, venessiana e austriaca.
A meio arichìr la interessante mostra; a opara de Paolo Borsato, esperto costrutor (anca de presepi), un grande plastico ricostrutivo de Verona romana (1° sec. d.C.), mt.3.00 X 2,25, con el só reticolato stradàl in pianta tipicamente romana (come se pol ben vèdar anca ancó, dal piassàl de Castel San Piero) e i monumenti più importanti: el Capitolium, el Comizio, la Basilica e la piassa del Foro, el teatro, l’anfiteatro (‘stó ultimo opera del fiol de Angelo Antoniazzi; Bepino), le porte urbiche e i ponti su l’Adese dei quai almanco uno l’è rivà fin a noialtri: el bel ponte Piera. Sul plastico se distingue anca, ciaro, le grandi strade consolari che rivava e partiva da Verona: la Postumia, la Gallica e la Claudia Augusta Padana.
La mostra, inaugurà el 17 novembre, purtropo l’à serà i batenti el 2 de dicembre ma gh’è da speràr che, visto el sucesso, la se possa ripètar al più presto. Sarìa anca ‘na roba bela e giusta che se avanti un serio editór (magari qualche banca o, meio, el Comune) a riunìr in un volume tuto ‘sto interessante materiàl, opara de ‘na vita spesa amando, in maniera splendidamente fativa e tangibile, la nostra bela Verona.

Wanda Girardi Castellani

↓