L’Angolo de la Wanda – Gennaio bis 1995 – “Lètara a ‘n’amiga”.

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Lètara a ‘n’amiga”.

La sera del 22, Carla Zanini Ferrari, una tra le i de la poesia più conossude e amade de Verona, la s’à sfantà in te ‘la fissa nebia de Novenbre.

Miga senpre, Carla, semo andà d’acordo, mi e ti! Ma a vardar ben la causa de le nostre bèghe i è stà i altri; le solite lengue velenose che no’ le manca mai in nessun anbiente, gnanca tra quel de i poeti.
Quando semo conossude? Stàvimo nel stesso rion, a du passi una da l’altra e anca da butelete avemo zugà, insieme, a pice, al çercolo, a la pèta; noialtre e i nostri marì; quatro dei “mostri” de Veroneta, co’ ‘na eterna fame aretrata, zugàtoli pochi, ma fantasia a scariolàde.
‘Pena finì la guera i me disea che te stavi dàndote da far co’ le sinistre, forsi par rendarghe giustissia a to papà che ìn tenpo de fàssio l’avea passà le sue, tra oio de rissin e manganelàde.
Par la to atività, anca umanitaria, in seguito el to amigo, presidente Pertini, el t’avea da do onorificenze de so inissiativa.
La nostra amicissia però la s’à consolìdà nei ani ’70. Ti te trasmetevi a la radio Antares e mi fasea el “Tinel” co’ i trovadori a Televerona; l’emitente televisiva de la stessa scuderia de Bauli.
Quante robe è sucesso da alora! In pressia, massa, massa in pressia, semo restade sole a tirar avanti la baraca, tute do co’ un fiol che ‘l g’avea ancora dà farse la so strada; prima è ‘ndà el me Severino, po’ el to Dario, du destini che i parea fati a ricalco. I t’à ciamà l’”uselin dela radio” par via dei tanti ani de trasmission a la radio Tartaro de Poveglian, mì alora trasmetevo a Radio Verona e spesso semo ospitade una con l’altra.
Quante recite ch’émo fato! Quanta gente émo divertì, interessà, comosso, in tuti ‘sti ani e i è tanti! Do rotaje del stesso binario, in aparensa destacà ma, a l’infinido, intorcolà come ‘na tressa! ‘Desso me inacorso che tra tuti i amiçi, spesso passà via come comete ne la me vita, solo con ti, me son sempre podù intendar, confidar. Mi e ti g’avemo ‘vu in comune la capacità de entusiasmarse, de amar, ma soratuto quela de capir che amar l’è ‘na parola che rima solo con “dar”. Eco parché, pur avendoghene sentor fin dal prinçipio, quando che ò capì che ‘l destin el te stava portando via me son desperà, rendendome conto, tuto d’un colpo, de quanto grando el fusse el ben che te volevo, che solo con ti avéa podù parlar sensa màscare parché, come mi, te sentivi che ‘l cor de’n poeta el g’à senpre 18 ani con tuti i sogni de ‘na primavera eternamente in fior.
T’ò vista, fin quasi a l’ultimo, piena de la to granda vòia de vivar, del to corajo, andar incontro a la “messora”; avaria vossù starte arente de più, poder far qualcosa, ma ò podù solo pianzar in silensio, par ti, par mi, drio la màscara insulsa de ‘na pietosa, quanto inutile, busia, strucandoghe ‘na man a quela santa creatura de to fiola Francesca che la t’à assistì fin a l’ultimo con un amor, ‘na passiensa, ‘n’abnegassion uniche.

La to amiga Wanda