L’Angolo de la Wanda – Gennaio bis 1994 – “Insoma co’ sti bòti…”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Insoma co s ti bòti…”

Come tuti i ani, za da i primi de novembre e infin a tuto aprile (tegnendo presente che dopo Nadal e ‘l primo de l’ano, scade el carneval e po’ la Pasqua), i cartolari e i tabacari i taca a vèndarghe a la “mostralia”, fòghi, mortareti, petardi e coete de vario tipo e dimension; scominsia cussì l’anual ronpimento de scatole de i bòti dapartuto e a tute le ore. I te li sgiaventa nei pie, i te li sbara de drio la schena quando manco te t’i spèti. I veceti i ris-cia l’infarto, le mame le perde el late, i cani i scapa come spussoli, ci-sà ‘ndove, magari sòto ‘na qualche automobile, i gati i se ràmpega sui rami piassè alti, i rati i torna a la chiete de la campagna e mi cònio sacramenti novi e maledissioni sempre più fioride e l’indirisso, prima de i sudeti cartolari e tabacari (che i podarìa contentarse de far schei in qualche altra maniera), po’ de i genitori che finansia i fioi a l’aquisto de ‘sto material cussì poco didàtico e soratuto a l’indirisso de i deti fioi che i aprofita infin de la nàssita e de la morte de Cristo par combinar ‘na vera e propria pre militare. Epure me risulta che gh’è ‘na lege in proposito che parla ciaro, anca se le legi in Italia se ga da coniugarle tute e sempre al condissional: “ghe saria, se dirla, se dovarìa, ecc…” Alora tachemo col Testo unico de le norme de publica sicuressa, Regio Decreto del 6 magio 1940, n. 635 (ancora in vigor) dove che l’è previsto espressamente da l’art. 110, coma 3° de le norme de publica sicuressa, nonche da l’art. 82, punto 4 che: «i sbari, le esplosioni e le acensioni diverse da quele contemplà nel primo coma (foghi e iluminassion par festività civili e religiose, par i quai è prescrita la licensa prefetissia) del presente articolo, no’ se poI farle che in lòghi distanti da la gente in maniera da no’ provocar dani o infortuni».
Ma volendo abondar… citemo anca l’art. 703 del codice penaI riferì a “acensioni e esplosioni pericolose”: «chiunque sensa licensa de le Autorità, tacà ai lòghi abitadi o longo ‘na publica via o in so diression sbara armi da fògo, impissa fòghi d’artificio o tira rassi o inalsa aerostati con fiame o, in generaI, fa accensioni o esplosioni pericolose o de disturbo, l’è punì con l’amenda fino a L. 40.000 (ma la cifra, oviamente, l’è raportà ai valori de ancò).
Se po’ el fato l’è comesso in un lògo dove ghe sia adunansa o concorso de più persone, la pena la sarà de l’aresto fin a un mese».
Par completar el quadro… tachemoghe drio anca l’art. 659 del Cod. Pen.: “disturbo de le ocupassioni o del riposo de le persone”.
«Chiunque, traverso schiamassi, rumori o esplosioni, overo abusando de strumenti sonori o de segnalassioni acustiche, o provocando o non impedendo strepiti de bestie (cagnare), disturba le ocupassioni o el riposo de le persone, o spetacoli, o ritrovi o tratenimenti publici (partìe de balon, concerti, recite ecc…) l’è punì con l’aresto fin a tri mesi e con l’amenda fin a L. 120.000 (raportà anca questa ai valori de ancò»>.
Come avemo dito, le legi le gh’è… ansi, “le ghe sarìa”, ma i è tute, o quasi, a far la pòlvar sul granar de Papa; unica ecession, quela comunal sui divieti de sosta. Quindi, da bravi “pegoròti” che soporta tuto: multe, tangenti, imbròi e tasse “selvage” comprese, parecemose, con l’elmeto in testa e ‘l bombaso ne le rece, anca a le delissie “esplosive” de le feste de Pasqua; unico setor andò no’ se nota el general tiramento de sengia; come dir i bòti no va in crisi.

Wanda Girardi Castellani