L’Angolo de la Wanda – Gennaio 1994 – “Epifania… TUTE LE FESTE LA PORTA VIA”

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“Epifania… TUTE LE FESTE LA PORTA VIA”

EI nome de la Befana, che spesso le mame veronesi le confonde con santa Lussia, el deriva da “l’aferesi” de latin “Epiphania” che ‘l deventa, prima Pifania, quindi Bifania e a la fin Befana; tentativo evidente de cristianisar sto personagio misterioso, trasformandolo ne la personificassion feminil de la festa del 6 genar.
EI parché po’ se g’abia d’aver sèlto ‘na stria par celebrar l’avento de i Re Magi, l’è ‘n altro mistero-misterioso!
Gh’è da dir che in diversi posti se fa giustissia brusàndola o segàndola, come a Goito (Màntoa) andò che al sonar de l’ave Maria se impissa el “borièl”; un falò parecià con legna, ramaie, paia e castagne che, al contato de la fiama le s-ciopa come de i petardi.
La mucia la pòl rivar anca a 7 metri. Sora i ghe mete la “vecia” fata de strasse e de legno e ‘l falò el gà da servir, oltre che par sugar i panesèi del bambin Gesù, par s-ciararghe la strada ai Re Magi.
Ma la vècia che brusa la podarìa sinbolegiar Madre Natura che, rivà a la fine de l’ano, stracanpida e seca, la va distruta par farghe posto a ‘na nòva stajon.
Prima de finir in fumo, la lassa però, dolsi e regài che altro no’ i è se non la somensa da la qual nassarà la primavera.
In çerte nassioni europee, fin a pochi ani fa, nel giorno de l’Epifania vegnea eleto “Re de la fava” quel che l’avea catà sto legume sconto in ‘na torta.
A so volta el Re el podea nominar ‘na Regina butàndoghe la fava nel bicer.
Stante i pitagorici, la fava la sarìa stà el simbolo del rebuto che nasse da la morte; un sinbolismo che, nel caso del “Re de la Fava”, l’è ‘na ciara alusion al rinovamento de l’ano e de la vita.
Ma, tornando a la Befana, gh’è un bel riferimento a la so “segadura” anca ne la “scala de la vita” (1852) de Luigi Crisostomo Ferrucci.
La “vecia” l’era spesso rapresentà con el fuso e la canòcia e l’era impenì de ua e fighi sechi, caròbole, pomi, peri, ecc…
La cesa l’avea aversà ste usanse par secoli, po’ la ga ‘vu l’idea de ritualisarle in ciave quaresimal, come testimonia Michelangelo Buonarroti, el giovane, membro de l’Academia de la Crusca, in ‘na so celebre sigalada sul “processo a la stria”.
EI personagio, par serti el vien dal mondo de l’inferno, tanto che anca el Pinelli ne le so bele incisioni el ne lo mostra, oltre che vestì de nero, con tanto de màscara.
La tradission, comunque, l’è antichissima con radise rituali pagane, che và de peso da la festa e da i riti de i morti.

I Re Magi

Matteo el se lìmita a riferirne che i Magi, dei quai no’ ‘l specifica el nùmaro, i è vegnù da l’Oriente, guidadi da ‘na stela, par adorar el Cristo e ofrirghe “oro, incenso e mira”.
‘Sto episodio, par la cesa rigorosamente autentico, l’à scadenà ‘na brìgola de legende, una più colorida de l’altra, che però le contien qualche riferimento storico; par esempio, uno de i Magi, ciamà nei vangeli apocrifi Gaspar, l’è vissù propio in quel’epoca.
El se ciamava Vindhapharna, Re de ‘n teritorio tra l’atual Afghanistan e l’India, mago, astrologo, astronomo e alchimista, come che ‘l spiega Mario Bussagli.
Nel vangelo apocrifo arabo-siriaco de l’infansia, se conta che: «Vennero in Gerusalemme dei Magi, come aveva predetto Zoroastro».
In quel armeno, se ghe cata pura i nomi dei Re che qua i è tri, mentre nei altri testi el nùmaro no’ l’è precisà; tri fradèi: Mlkon (persian) Balthasar (indian) e Gaspar (arabo).
Sti Magi pararia proprio ch’i fusse stà eredi spirituài de Zoroastro; ‘na compagnia de sacerdoti che i se tramandava de pare in fiol un scrito de Seth dove se profetisava l’aparission de ‘na stela che i avarìa menà al Salvatore.
A Seth, fiol de Adamo, vien atribuida l’invension de la siensa astrologica e par sto motivo in Oriente i lo identifica in Zoroastro.
Anca ste legende i è fruto del processo sincretistico che tendea a cristianisar le tradissioni religiose de l’area mesopotamica e iraniana.
Magi, Mago… voI dir Mag: leteralmente, “dono”; el particolar valor religioso del qual se parla ne le “Ghatha de l’Avesta” i libri sacri del zoroastrismo.
I Magi i vegnea da ‘na tribù de l’etnia de i Medi e i era po’ ‘na casta sacerdotale iranica (persiani, afgani, armeni, osseti e curdi).
I era boni de interpretar i sogni e i conossea astronomia e astrologia.
Gh’è da dir po’ che l’aspetativa de ‘n Salvatore la gh’èra in tuta l’Europa e l’ Asia, fin al Giapon, a partir dal 2° sec. a.C. fin oltre al 3° d.C.
Quanto ai “doni”: ne l’oro, l’incenso e la mira, i autori cristiani i ghe vede: nel primo l’essensa divina del Cristo, nel secondo el Cristo che col so sacrificio el s’à messo tramite tra el Padre e i òmeni, mentre ne la mira i prefigura la passion e la morte del Redentor.
Belissimo l’episodio che ‘l conta Marco Polo nel “Milion”: «I dise quei del lògo che tanto tempo fa tri Re de la so religion i è ‘ndà a visitar un profeta , pena nato portàndoghe tre oferte de oro, incenso e mira par poder riconossar se se tratava de ‘n Dio, de ‘n Re o de ‘n sapiente.
I pensava: se ’l tol l’oro, l’è un Re, se ‘l ciapa l’incenso l’è un Dio e se ‘nvesse el sèlie la mira l’è un sapiente.
I l’à adorà, i g’à oferto i so doni e ‘l butin el I’à tolti tuti tri».
Infine, el fenomeno celeste che i Magi i à visto eseguì, l’è stà ‘na congiunsion de Giove con Saturno ne la costelassion de i pessi.
Sto avenimento, del qual se parla in vari tratati de astronomia, l’è stà visibile a quel’epoca e par ben tre volte, giusto nel cel de Gerusaleme.
No’ risulta ‘nvesse, al tenpo, nessun passagio de comete, manco che manco la Halley.

Wanda Girardi Castellani