L’Angolo de la Wanda – Febbraio bis 1993 – “RESTAURI – Nòvo “look” par l’Arcangelo”.

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“RESTAURI – Nòvo “look” par l’Arcangelo”.

Vegnendo a Verona drio la statal da Venessia, prima de entrar in çità da la porta Vescovo, se incontra San Michel. EI stradon che lo separa da Verona, noialtri lo ciamemo “el meiar”.
San Michele extra, ‘na òlta el gavea ‘na gran bruta fama tanto che se usava dir che là se ‘mpiantava i fasòi co’ ‘l s-ciòpo. I conta anca che Napoleon Bonaparte (ladro da parte sua) a la testa de’ ‘l so esercito, dopo aver passà San Martin, decoràndolo (par via de la bela acoliensa) de’ ‘l tìtolo de “bon albergo”, rivà in vista de San Michel el s’à oltà ai sòi sigàndoghe: “Spronate i cavalli e attenti ai bagagli!” Tute ciàcole!… e ci le va a spopolar i gà ‘desso a che far co’ ‘l “Sanmicheleto”, overo… l’Arcangelo San Michel, tornà, restaurado e con tanto de spada sguainà, su la so colona in piassa de la cesa, giusto l’ano passà.
EI “Sanmicheleto”, dunque, de ignoto autor, el ga origini antichissime, tanto che el storico don Basilio Finetto (1840-1905) el dise che la statua l’èra za vecia nel 1520 quando no’ l’avea gnancòra traslocà da la ceseta de le benedetine. In piassa i ghe l’à messa nel 1892 dopo diversi altri “samartin” (traslochi).
Durante l’ultima guera l’arcangelo l’avea perso parfin le aIe, ritrovade ‘dèsso interà nel giardineto a piè de la colona e ritacade con perni de aciaio zingà. Tra smog e varie vicissitudini el “Sanmicheleto” el s’èra carolà pèso de ‘n vecio armaron abandonà in càneva. Gà pensà el grupo dei marciadori del paese con l’arsiprete don Lorenzo Molinaroli a rimetarlo in sèsto, afidàndoghe la delicada opera a un esperto; el padovan Giordano Passarella che za l’avea restaurà altre statue in Castelvecio.
Quela dominica, dunque, dopo la messa ghera stà la cerimonia del “descoèrtamento” de la statua, ma la plastica che la dovea sbrissiàr-zo dolçemente, ‘pena tirà la cordesèla, la s’à ‘nbroià ne la spada e gà vossù ‘na scala e un longo smorsamòcoli par smòarla. Beh, dopo la “suspence” finalmente gh’è stà la benedission e la poesia de pragmatica del poeta sanmichelato comm. Reggio, subito premià da un colombo, “antipoeta” e maleducà scalso, con un schito da chilo su la schena del vestido bianco de le feste.
Po’ i marciadori i à oferto un lauto rinfresco. L’unico a restar a becosuto l’è stà propio el festegià…, pòro “Sanmicheleto”!

Wanda Girardi Castellani