L’Angolo de la Wanda – Febbraio bis 1992 – “La poetessa volà via da ‘n camin”.

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“La poetessa volà via da ‘n camin”.

“Trentauno… i è stà i ebrei veronesi morti nei canpi de sterminio nasisti e i so nomi i è ricordà ne la lapide a destra de l’ingresso de la Sinagoga, viçin al 1° verseto del 4° capitolo de l’Eclesiaste: Eco la lagrima de i opressi che no g’à ci li consòli – Tra sti trentauno, spìca un nome de dona: Lina Arianna Jenna, poetessa”.
El so ritrato, sbusando come na spera de sol la greva nuvola de fumo de uno de i tanti camini de Auschwitz, el ne riva, dolçe, traverso le poesie de la so racolta:
“Preludio”;
“Prova e riprova, èco la me figura;
Son na roba legera, pèrsa in un tùrbine de seda scura,
in na spiuma de merléti… “

E, a giudicar da le poche fotografie che ghemo ‘vu modo de vedar, la d’èra propio “na roba legera”. Magra, flessuosa come na betula!
La gavea le movense de ‘n daino. Senpre elegantissima, forsi un poco stranba nel so vestir da grande atelier. L’èra conossuda, amirà e ben voluda, par la so simpatia e cortesia; da tute le sartine de le sartorie veronesi, tra le quali gh’era me mama e me sìa (la prima e la tersa, in alto de la foto, da destra, soto al capitel de piassa de le Erbe).
Nel ricordo del so bon amigo Lionello Fiumi: “La gavea un viso de cameo dove i oci neri de Ruth e de Betsabea i contrastava coi cavei ciari taià a la “pageto”. Nel so palasso de S.Eufemia, tra stanse grandi, scure, e aredi venerandi, la se moveva come in un senario da romanso de l’800. L’era la regina de la vita cultural del so tempo, in Verona. Nel so saloto se riuniva i più bei nomi de la nobiltà e de l’arte, e non solo de la nostra provincia: Venier D’Annunzio (fiol del Poeta), Umberto Zerbinati, Lionello Fiumi, Renato Simoni ecc… -Al “filò”, oltre a la mama e al papà de la poetessa, partecipava so fradel Ruggero, come ela, po’, deportà in Germania e sconparso in quela tremenda bolgia de bestialità.
La scriveva indifarentemente, in italian, in francese e in dialeto veronese e l’era, par la so epoca, na voçe decisamente moderna. Attivissima ànca ne l’organisassion, con dei amiçi l’avea curà diverse pubblicassioni, afiancà da Berto Barbarani, Renato Simoni, Angelo Dall’Oca Bianca, Lionello Fiumi e altre glorie citadine. Sul finir del 1943, za ne l’ocio del ciclon rassista, l’era stada radià da tuti i saloti, specie da le coleghe veronesi, sempre cussì pronte a savatar de drio a la corente del momento. Nel 1944, in un giorno de giugno, l’era stà fata prigioniera da i tedeschi e deportada ne l’inferno de Auchwitz.
Gh’è ci dise de averla vista ancora viva al prinçipio del 1945…; po’… più gnente!
Quanto èlo durà el so calvario? …e qualo èlo stà?
Se pensa che la so morte la sia avegnuda verso l’apriI de quel stesso ano; el 1945, che à visto Verona croar in fumo, fiame e muri sventradi, soto na scarica de violenti bonbardamenti.
Esenpio grando de amor de fiola, no l’avea volù metarse in salvo co la sorela Marcela che fin a l’ultimo la l’avea suplicà de scapar con ela, par poder restar arente al papà, otantène e malà.
“Po’ (l’avea protestà) par cossa dovaresseli farme del mal a mi che no go mai fato del mal a nissuno?” No savendo, ne la so tranquila inocensa, che par l’assassin in camisa bruna no le gavea più senso le parole “mal” o “ben” e che par la so furia sanguinaria pesava solo in stadera quele poche onse de sangue non arian.
LINA ARIANNA JENNA, morta a 58 ani, l’è stà comemorà nel 1980 ne la sala de la biblioteca de Castelvecio e in quel’ocasion è stà messa, ne la stessa sala, na scultura de Riccardo Cassini, a ricordo.
Senpre in quel’ano, po’, è stà dedicà a la poetessa “volà-via da ‘n camin”, na strada in Borgo Milan. Ànca el pitor Pino Casarini l’à volù, con du bèi ritrati, ricordar sta dolçe figura de dona e de artista, vìtima inocente anca ela del “moloch rassista” che propio in sti giorni l’è tornà a alsar la testa, là, dove 46 ani fà, in na nuvola greva de fumo nero è volà al cel l’ànima de tanta pora gente. Ricordemossela! Mai… , guai, desmentegàrsela! e ricordemo, soratuto, Lina Arianna Jenna, co le parole del poeta dialetal Prof. GAETANO BAZZOLI:

“… e dai camini pontadi contro el cel
come canoni
en de’n silensio grevo
fioriva solo el fumo, denso e nero,
ma el s’à fato più ciaro e più sutìl
quando è passà el to spirito gentil!”

Wanda Girardi Castellani