L’Angolo de la Wanda – Febbraio 1995 – “Mai più la guera! El sacrificio de la Division “ACQUI” nel ricordo de un supèrstite: PIERO MANTOVANI da Legnago (VR)”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Mai più la guera! El sacrificio de la Division “ACQUI” nel ricordo de un supèrstite: PIERO MANTOVANI da Legnago (VR)”

El tenpo, muciando, via-via, la pòlvar su tute le robe, spesso el riesse a farne desmentegar anca quele più inportanti, specie se se trata de avenimenti che no’ avemo vissù in prima persona. Ma inveçe bisogna e, soratuto, farghele saver ai giovani certe barbàrie, fruto de la più granda e teribile bestialità de i òmeni: la guera!
Ma sentimo la storia, na bruta storia, diretamente dal raconto de Piero Mantovani.
«Fedele a la so tradission de onor e de gloria, la Division “Acqui” la s’à imolà eroicamente ne le isole greche de Cefalonia e Corfù e anco, esenpio par tuti, la veja de là del mar Ionio, tra i scoli e le roce; sinbolica guardia purificà da l’olocausto del so stesso sangue.
Dopo l’armistissio de l’8 setenbre 1943, la me Division, ‘bandonà a se stessa oltremar, sensa i aiuti promessi, l’à fato resistensa contro i preponderanti nemiçi tedeschi che i g’avea inposto la consegna incondissionà de le armi par po’ inviarla nei canpi de concentramento.
La nostra l’è stà ‘na corsa al massacro, tanto più che i cruki i podea contar anca su ‘na division alpina fata da ‘na tèpa prussiana pronta a ogni genere de barbarie. Ghe n’emo ‘vù prova ne le 24 ore de carta bianca che’l comando tedesco el gà concesso dopo la nostra sconfita; 24 ore durante le quale i à brusà, massacrà, mitralià, sensa ‘n’onbra de misericordia.
Gò senpre davanti ai oçi i me comilitoni morti; tanti ‘catastà soto i olivi, altri ‘bandonà nudi longo la strada e altri ancora butà su la so propia arma. Anca el çimitero ‘talian de Argostoli capital de l’isola de Cefalonia, l’è stà profanà. I à dissepelì i nostri morti e i l’à butà a la rinfusa tra le roce par farghe posto ai sói. Come se no’ bastasse i à fondà tri nostri mèsi de trasporto maritimo, portandoli in mèso ai sbaramenti minadi con tuto el so carico uman. E qua me fermo!
A cavàrsela semo stà in pochi e quei pochi, come mi, parche scanbià par morti in mèso ai altri massacradi.
Novemila ghe n’è stà, tra sotouficiài e trupa e quatrossento anca tra i uficiài i s’à lassà fusilar par tègnar fede al giuramento de difendar con onor la Patria.
È passà più de mèso secolo, pura no’ gh’è giorno che’l me pensier no’l cora verso quei momenti; verso quele giovani vite martorià, stroncà e ogni òlta me scopia drento ‘na rabia, ‘na desperassion!
Ricordève…, sì, ricordève, che no’ gabia da sucedarghe più de ‘ste robe che ne fa vergognar de apartegnar al genere uman!
Po’, pian a pian, a l’eterno albesar de la speransa, come la musica dolçe de’n violin, nasse dal cor ‘na preghiera:
Che la luce del Dio che l’è risuression e vita, la fassa rinsavir la gente; no’ piansaremo più!»

“Setenbre 1943 Cefalonia”

Novemila crose
e davanti a le crose novemila lumini,
e davanti ai lumini
novemila mame che prega.
A Cefaionia, isola greca
che se specia nel mar Jonio,
la tera g’à tremà,
la pòlvare s’à inpastà col sangue,
el sole s’à sconto
dedrio ai sentenari de osei
co le ale de demonio
che à butà-zo somenza de fero e de fogo.
Le mitràlie
come tante cavalete mate a nùgolo
le g’à sbusà carne e piere;
i canoni s’à passà la parola
squassando òmeni e bestie.
I prà, i olivi, i sentieri,
le çime de i monti
i s’à sposà coi morti destesi in giràndola.
I morti no’ i parla; à parlà I’ànima
e el vento g’à rancurà le anime
par portarle in paradiso.
Dio, Paron del mondo,
fa che quei lumini
no’ i se smorza mai!

Piero Mantovani

da: “Pagine d’universo”

Wanda Girardi Castetlani