L’Angolo de la Wanda – Dicembre ter 1994 – “EL PRESEPIO”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“EL PRESEPIO”

Secondo i evangelisti, Gesù l’è nato ai tenpi de Erode.
Luca el ne informa inoltre che Augusto l’avea ordinà “che se fasesse un censimento su tuta la tera”; un laoro che ‘ndava in òpara ogni 14 ani ne l’impero romano, del qual, tra i altri, faséa parte la Palestina. Par magior precision el zónta che propio alora era governador in Siria (altra colonia romana) Quirino; Publio Sulpicio Quirino. Gh’è po’ un argomento astronomico che’l segna la nassita de nostro Signor: l’episodio dei “Magi”, vocabolo persian che’l stà par “òmeni de siensa o mèio astronomi” (che al tenpo i èra anca ‘stròloghi).
I Magi, donca, i vegnéa da l’Oriente” e gh’è da dir che i orientài i credéa ne l’aparission de’n nóvo astro ogni òlta che nasséa dei grandi personagi. La tradission la parla de na cometa e ultimamente s’è pensà a la Halley. Questa però, visto che l’è na “periodica” (la passa ogni 76 ani) faséndo el conto a ritroso no la risulta èssar stada, né se g’à notissia de altre. L’ultima l’èra comparsa 17 ani prima e la sucessiva l’è passà adiritura 66 ani d.C., e alora? L’è stà Keplero, a fornirne la spiegassion. Infati, el grande astronomo matematico che el 16 dicembre 1603 l’avea osservà la congiunsion de Giove con Saturno nela costelassion del pessi; un fenomeno de grande efèto, l’à calcolà che la stessa roba la sia sucessa, par tre volte ne l’arco de n’ano, giusto nel 747 a.u.c. Sta ultima data po’ l’è el fruto de’n nóvo altro calcolo dopo che s’à stabilì che el monaco Dionigi “el piccolo” l’à sbalià apunto de 7 ani quando che da “A.U.C.” l’è passà al “a.C.”; 747 de Roma e non 753.
Ma tornando ai “Magi”… Gaspare, Baldassarre e Malchiorre, bituadi a studiar el cel, quando che i à visto el scominçio de sto fenomeno celeste i l’à interpretado, a la luce dele conossense astrologiche de l’epoca, come el segno de la nassita de un Re de giustissia, un grande profeta, forsi el stesso Messia, ne la tera de Israele. Infati, i Pessi, i rapresentava Mosè e el so popolo, mentre Giove l’èra la stela dei Re e Saturno quela dei giusti e dei profeti. Eco che alóra no i è miga rivà par caso a la grépia de Gesù, dato che i saveva perfetamente el verséto de la Bibia: “Oh tu Betleme… ecc…”
Ma tornemo a l’argomento in question; el “presepio”.
Tuto g’à da èssar scominçià in un momento dunque de l’ano 747 de Roma quando che Maria l’à ricevù un particolar saludo da l’angelo. Po’ come tuti savemo, gh’è stà el gran evento! Da quel giorno è rugolà-via più de dódese secoli fin che a Assisi un giovane frate incantà dal fato de’n Dio che s’èra fato omo, par smóar la devossion dei cristiani in un’ epoca che par andar in Palestina no gh’èra che du mèsi: el caval o i pié, l’à deciso de rapresentar in casa la Natività nela maniera più realistica possibile. El ghe n’à parlà a Papa Innocenzo lll e dopo avérghene otegnù el parmesso, nel 1223 drento a l’eremo de Greccio durante la note de Nadal S. Francesco l’à organisà na rapresentassion vivente de la nassita de nostro Signor co’ la partecipassion de la popolassion del paeseto reatino. Propio in quel’ocasion l’à pensà de inserir nela grota, co’ la sacra faméia, anca un bo e un musseto e forsi l’idea la gh’è vegnù al Santo dala Bibia; infati, 800 ani prima de Cristo el profeta Isaia l’avéa nominà ste do bestie: “el bo el conosse la casa del so Signor. El musso, anca… inveçe ti, Israele, no!” Inoltre, l’asino l’era el mèso de locomossion dei pitochi e Maria e Giusepe, che sióri no i d’èra, i g’à da èssar rivà ala gròta (o stala) faséndoghene uso.
Quanto al bo, l’èra anca alóra na bestia comune par laorar la tera e el podéa quindi èssar presente nela stala ‘ndove ch’è vegnù al mondo Gesù. L’è pura normal che’l bo e l’asino i abia contribuì a scaldar el lógo; tenpo fa anca nele nostre campagne se passava intiere serade al caldin de l’àrfio de le bestie, nele stale. Eco alóra el presepio e, par conpletar el quadro, gh’è da dir che no deve èssar stà de inverno; Ricordémosse che l’angelo l’è andà a sveiar i pastori e el l’à catàdi che i dormiva co’ i so armenti a l’aperto. Tra l’altro, essendo Betlemme a circa mile metri de altitudine, se fusse stà de dicembre i sarìa stadi al coèrto. La data del Nadal l’è stà sèlta dopo par far coincìdar la gran festa de la nassita del Redentor co’ la festa pagana del sol.
Ma noialtri metémoghe pura nel nostro presepio co’ la grota o la capana, i palassi, el mus-cio, l’aqua che scóre traverso i mulini, el fógo dei bivàchi e i pastori a brassi vèrti de nansi ai angeli che vola intorno a anunciar el feliçe evento…. anca i góli de giasso e ‘n bel tapeto de candido bonbaso che’l fa vègnar i sgrisolóni de fredo a vardarlo slusegar ai sguissi dela fiama dei candelòti in tutù rosso-oro.

Nadàl 1992

TORNAR A CASA

Da ‘na sfésa
nel piombo de ‘sta note
che no’ impromete giorno
impìsseme, Signor,
l’antica stela
a insegnarme ‘l sentier
de la speransa.
Ci-sà quando l’ò perso
su pà’ i sgrémbani
Çercando i fiori strani
de l’insogno
co’ le mane sgrafà
dai spinacristi
che ò lassado coverti
de papavari.
M’è rugolà la saca
drénto a ‘n vaio.
No’ cato più i me agnèi
su la costéra
e son finìa nel scuro
tuto a ‘n colpo
fóra de strada.

Jùteme Ti
co’n lume a la finestra
a ritornar a casa.

Wanda Girardi Castellani