L’Angolo de la Wanda – Dicembre bis 1994 – STORIE E LEGENDE VENETE: “L’ultimo viajo… de S. Marco”.

…a cura di Graziano M. Cobelli

gcobelli05@gmail.com

Quatro Ciàcoe: da Verona

STORIE E LEGENDE VENETE: “L’ultimo viajo… de S. Marco”.

L’è stà verso i primi decèni del 9° secolo che quel s-ciàpo de isolete abità dai veneti l’è deventà ‘na republica ciapando el nome de Venessia. Fin a quel momento gh’èra stado nove Dogi e propio a l’ultimo, OBELERIO ANTENOREO, el s’èra areso PIPINO che, da quel momento, come conta Renier Michiel: «non solo l’à bandì ogni pensier de violar più la veneta libartà, ma l’à parfin desiderà de vegnar lu stesso a farghe omagio e a tratar la pace».
I venessiani i è andà incontro al fiol de Carlomagno, a Malamocco, con tute le so navi e Pipino, in vesti regali, dopo èssar montà su’l legno più grando, l’à butà in mar el sètro d’oro disendo: «Come che ò butà in mar el me sètro, che mai più el tornarà sora, cusì no’ sia mai più che mi g’abia intension de far ofesa a ‘sto Comune. E come che sora de mi (che sensa causa o ragion son vegnù a ofèndarlo) è cascà l’ira de Dio, cusì la possa questa sempre cascar sora tuti quei che ingiustamente nei secoli futuri i dovesse vègnar, come ò fato mi, a ofèndarlo».
Par la cronaca, Pipino l’è morto pochi mesi dopo, nel lujo 810 mentre Obelerio, spodestà quel stesso ano, 21 ani dopo el g’à lassà la zàgola nel tentativo de riguadagnar el caregoto.
Detronizà Obelerio, è deventà Doge AGNELLO PARTECIPAZIO (810 – 827) sior de so fameia da la qual par che g’abia vù origine i Baodèr; n’altra partì a de Mida, tanto che el popolin alora come ancora ‘dèsso l’usa definir ci ga el tacuin a fisarmonica, “pien come el Badoèr”.
Soto el dogado de Agnello è stà conià la prima moneda venessiana co’l nome del novo imperador Ludovico el Pio. Pura soto ‘sto Doge è stà ricostruì el Torcello e Burano, risistemà Rialto, tacà a fabricar de le cese, ultimà po’ dal fiol Giustiniano: S. Severo, S. Lorenzo e S. Zaccaria. Progetà ponti sui canài, verto el Canal Grande ecc… Insoma, à scominçià ciapar forma quela Venessia che la sarìa deventà la perla de le çità marinare.
A la morte de Agnello, donca, (raro caso de morte natural tra i Dogi che de norma o i finìa co’ la testa soto la manara o più senplicemente deposti dopo èssar stà abacinadi) è subentrà Giustiniano (827 – 829). Tra i più importanti avenimenti de ‘sto dogado: el ricupero de le relichie de S. Marco!
Un’antica fola la contava come che’l Santo el fusse naufragà a Rialto mentre che l’andava a predicar el cristianesimo a Aquileia. Proprio a Rialto, tra i legni roti de la so barca, mentre che a nodo el tocava la riva, un angelo de luce el gh’èra aparso disendoghe: «Pace a ti, Marco! Varda che sarà qua che sponsarà el to corpo!».
Secondo i nativi, propio lì, l’avaria dovudo star… e miga a Alessandria d’Egito, dove inveçe da 7 secoli el se trovava, “ospite” de’n convento de frati e mèta de i pelegrinagi de tuti i venessiani in òlta co’ i so comerci pa’ i mari de Levante. A ‘sto punto Giustiniano l’à pensà ben de rèndarghe giustissia a la professìa menagrama de l’Angelo e l’à incaricà del rapimento du marcanti: Buono de Malamocco e Rustico de Torcello. I du “bravi” improvisadi, però, i g’avea da far i conti co’ la sorveliansa de i santi Padri del convento. Naturalmente, anca a quei tempi se podea rivar ando che se voleva, bastava ònsar pulito qualche ruda. In ‘sto caso, le rude i è stade do, e precisamente du frati infedeli e interessadi più a la scarsela che non a le sante relichie. Beh…  par farla curta, S. Marco l’à fato samartin ma no’ l’èra miga tanto facile far passar un corpo imbalsamado da la dogana saracena, specie tratàndose del corpo de n’evangelista cristian. I du “bravi” alora i g’à ‘vu ‘na bela pensada: quala èla quela roba che ghe fà più schifo e spaènto ai musulmani? Ma… el porco, porco-can!
Cusì el Santo i l’à messo in ‘na sesta coaciàndolo ben con de le mesène de porco. In ‘sta maniera i gabelieri i è restà gabelà.
Tra parsuti e gambeti, tra còdeghe e testine, el nostro S. Marco, sia pur dopo ‘na memorabile tompesta miracolosamente scampada, I’è aprodà finalmente nela çità de la laguna, acolto con grandi feste; I’èra el 31 genar de l’828. La relichia, prima traslada soto I’altar magior de S. Teodoro, a fianco del Palasso Dugal (come spiega i bei mosaici de la capela de S. Zen, ne l’atual basilica de S. Marco) la vegnarà po’ tumulada, soto el dogado de Giovanni (829 – 832), fradel de Giustiniano, morto ne l’829, ne la prima césa che ciaparà el nome de S. Marco. EI sinbolo del Santo, infine; el leon alado, dal ‘300 in avanti el sarà l’insegna de la CIVITAS VENETIARUM.

Wanda Girardi Castellani