L’Angolo de la Wanda – Dicembre 1991 – LA QUESTION DEL DIALETO: “El dialeto l’è malà grave”

…a cura di Graziano M. Cobelli

gcobelli05@gmail.com

Quatro Ciàcoe: da Verona.

LA QUESTION DEL DIALETO: “El dialeto l’è malà grave”

Se parla tanto de salvar el dialeto ma ànca l’italian, cedendo el passo, giorno drio giorno a l’inglese, el ris-cia de morir.

Domìnica 27 otobre, a Padova, ò sentì dir che i zòvani no i lese “Quatro Ciàcoe” solo a causa de i argomenti che ‘l trata, un fià stantìi. Sto discorso l’è stà ripetù a Verona, durante el dibatito, dopo la conferensa del giornalista Dr. Amaldo Bellini, dal titolo: “Poesia dialetal: qual futuro?”. In parte i g’à ànca rason, almanco par quanto concerne la poesia, spesso “bròcola” e, salvo ecession, rivolta solo ai ricordi personali, ruminà in versi veci come la ‘Rena, sensa un colpo de ala, gnanca da galina. Ghe n’è de quei ch’i me fà vegner in mente un “vertical” de la “setimana enigmistica”: “le dicono i bambini” (6 scacheti). Dopo essarme ròta el sarvel par mez’ora ò scoperto che i “bambini” i dise le… poesie! Evidentemente l’autor del cruciverba l’avea leto o sentì çerti nostri poeti. Bravi o nò… comunque, i g’à senpre el merito (come i giornalisti de “Quatro Ciàcoe”) de salvar la lengua veneta, tramandando parole che sensa de lori le saria ormai scancelà da la scolorida civiltà de i consumi, òrba de tradission e ‘nvià a vele spiegà verso un mondo unido in un’unica lengua; l’inglese.
Che i nostri fioi no i capissa più el dialeto, l’è risavù, visto che nissun ghe lo parla, gnanca in fameia. Finì la guera contro i nemissi esterni, nei ani ’50 è scominçià quela contro la parlada de i nostri veci. Fin da l’asilo i à fato de tuto par castigarla!
Çerti termini i è sparì da la memoria parfin de i bisnoni. Ò proà a dimandarghe a un pistor: “EI me daga un’eto de bondola!”
EI m’à risposto: la me la insegna che po’ mi ghe la dago! ‘Dèsso i ghe ciama “bologna”… Beh, “el me ne daga un’eto con vinti grami de cesa de san Petronio, a zonta!” Ò proà ànca a dirghe a un droghier: “EI me daga na busta de carbonina” (naftalina), e quel, che na qualche infarinadura de vernacolo el ghe l’avea, el m’à consilià de andarla a çercar dal masarol (carbonàr).
Provè a dimandarghe a un becar che ‘l ve daga de la picàia o del figà, come minimo el ve mandarà a quel paese come se gavessi dimandà a un spissiale “ombre de campanil”. A la me cagneta g’ò messo nome” PICIA” (biglia) ma tuti i la ciàma Pizza… e gh’è na bela difarensa! Son del parer che i temi tratadi, sia in poesia che in prosa, no i cata letori zòvani principalmente parché i fà na fadiga viliaca a lesarlo, pèso del greco e del latin. Comunque, tratandose de la nostra rivista; unica nel so genere e quindi sensa concorenti, convegnaria lassarla come che l’è, se-nò se finisse col far come çerti preti che, nel tentativo de guadagnarse i zòvani, (tentativo con poche speranse) i se “modernisa”, serando anca i oci su un brol de vacade, cussì i finisse co’ ‘l pèrdar i veci che i è quei che ‘ncora ‘npenisse i banchi in cesa.
Ma tornando a la poesia nostrana, bisognaria prima de tuto che la fusse “pensà” indialeto e no tradota a la “vateciava” da l’italian, tanto par cucar premi nei vari concorsi. Dirla, po’, che no la g’à da essar càrga de voli pindarici al punto che la soasa (cornisa) la risulta fine a se stessa e el quadro el possa ànca no essarghe che tanto l’è stesso! La gà da poder farse capir! Insisto nel dir, tra le altre, che la dovaria far pensar, specie de sti tenpi che manco se pensa mèjo l’è. “Cògito, ergo sum”, el diseva Cartesio, ma a sti ciari de luna pararla tuto el contrario, basta vardar el cine italian che pura ai tenpi de De Sica el “neorealismo” l’era su la çima del mondo. Da ani trionfa Troisi, Benigni, Banfi e Pozzetto! E po’… almanco noialtri poeti parlemo de robe nostre, atuali, se-nò diman cosa restarà de sta nostra epoca? Gnente: na busa fonda tra l’eterna nona che scapinava le calse e fasea la polenta sul stagnà e… i viai interplanetari de l’oltre domila.
Par intanto l’è ‘nca vèra che el dialeto se no l’è gnancora morto, el stà mal forte. Ogni malatia, paraltro, la lassa la porta vèrta a la speransa! In quanto a la lengua italiana… proémo a far un picolissimo elenco de i termini che sensa ‘nacòrsarse tuti oramai doparemo (e i è in aumento giornalier):
FAST-FOOD (un bocon de corsa); COMPILATION (na racolta); HIGHT-PARADE (classifica de le meio cansonete); CASUAL (vestito a la “vateciava”); LONG-PLAING (disco a 33 giri); REVIVAL (na rimembransa); HAMBURGER (na svissera); DISC-JOCKEY (quel che mete sù i dischi); SHOW-MAN (presentador); COVER-GIRL (tòco de gnoca da copertina); BOY-FRIEND (moroso); LOOK (vestito a la moda); SNACK (un bocon par tajar l’aria); BREAK (pausa mangiatoria); MEETING (incontro); BAY (ciao); FILING (colegamento, fil); FLIRT (na cota a tiro dù); MANAGER (capòcia); SHOPPING (andar par spese); DRINK (aperitivo); LONG-DRINK (aperitivo inaquà); STAFF (grupo polìtico); TEAM (grupo economico o sportivo); OK (va ben); ICE (giasso); STAR (diva) e… STOP (come albandi; basta!).

Wanda Giaradi Castellani