L’Angolo de la Wanda – Aprile bis 1991 – “Pesse d’April”.
…a cura di Graziano M. Cobelli
gcobelli05@gmail.com
Quatro Ciàcoe: da Verona.
“Pesse d’April”.
Na òlta i veronesi i passava par “tuti mati” in quanto pronti al scherso, alegri, amanti del gòto e de la conpagnia. Ancò, da quando se magna carne pressà e patatine frite, inveçe de polenta e codeghin e se beve coca-cola, forsi la gente l’à perso el senso de l’umorismo. Co’ le guere che fa disastri, i atentati, i rapimenti e tante altre disgrassie no se ride più, che pecà!
Co’ l’ultimo pesse e l’ultimo sguisso de morbin, l’Arena de Verona qualche ano fa l’à fato ‘ncora còrar la gente in Bra par vedar un interessante esperimento; un auto funsionante a aqua! Naturalmente i g’à trovà inveçe un pesse a carateri cubitali.
EI Cenacolo de’ poesia dialetale del “48”, par via de schersi l’è stà al primo posto. I me contava che na note i à tirà su el Prof. Gino Beltramini sul cavaI de Vitorio Emanuele. Va ben che’l Prof. l’èra pele e ossi, ma ‘stesso i g’à da aver fato la so bela fadiga.
Po’ l’è passà a la storia la “sganassevole” guera tra Verona e Vicensa quando noialtri par vendicar el rapimento de ‘l leto de Giulieta gh’emo sequestrà ai vesentini I’armadura de Romeo. ‘Dèsso se parla de ben altri “sequestri”, da ste parte, che i gà ben poco de sganassevole!
Co’ n’arioplan decolà da Boscomantico emo molà su la çità dei magnagati na mota de pele de gato tarmà, cronpà in conceria par un franco a l’una.
I volantini semenà i era cusì concepidi: (traduss. in veronese)
“UDITE, UDITE popolo de Vicensa, cosa che gh’è sucesso ai fioi de San Zen! De far pesse d’apriI, la licensa, el Sindaco à negà! Gnentemanco da l’Alpi a le Piramide, a Cosensa, dal Mississipi al Manzanare al Reno, dal Lussemburgo al Regno del Bao-Dai, simile roba no s’à vista mai!
Par questo, vesentini, mi ve dimando çinque minuti de ospitalità onde sfogar l’anima cantando e presentarve un segno d’amistà; che se l’antico pesse è messo al bando, un gato (ancora par poco in libartà) i baldi veronesi, tuti mati, i ghe regala a voialtri… o “magna-gati”!
In compenso, lassè star GIULIETA… i morti no se i poI spostar; ne me par giusto, a scopo de “casseta”, l’anagrafe dei secoli cambiar , se-no qua podaremo, par vendeta, dir che’l PALLADIO l’è nato a le VOLPARE, e alor la storia scrita dal DA PORTO, la deventarà na storièla de DAPPORTO!”
Le pele de gato (i era 3000 tremila) i è sta crompà su la piassa de Milan (tarmade) e el scherso l’è stà na vendeta dei veronesi verso i vesentini che i n’avea “trafugà” el leto de Giulieta.
(Noialtri po’… paraltro, dopo gh’emo rangià l’armadura de Romeo dal castel de Montecio).
Questo infin che na squadra d’assalto formà dai nostri mejo Rambo, notetenpo l’andava a tacarghene de le altre a cancèi, reticoladi, porte, sése ecc…
Memorabile ànca la storia dei cavai del ponte de la vitoria, coredà de mudandòni par tor de sòia el Sindaco che, fasendoghe concorensa a quel che l’à fato castrar tuti i angeleti a Bergamo alta, (forsi par invidia de “I’abondansa” de Bartolomeo Coleoni) I’avea dado ordine de livelar i sudeti cavai che i dava scandalo sui passanti.
Ma i me concitadini miga i se fermava li… Na òlta i era sempre pronti a tacarghe drio el so bon cartel a tu ti e a tuto: cusÌ… el ponte Garibaldi l’è stà batesà “ponte dei strachi” par via dele 4 figure stravacà ai lati.
La fontana de piassa Vitorio Veneto, pena inaugurà l’è deventà de pàca: “La fontana dei seciari”. El monumento a Paolo Caliari, sentà de sbiego sul fil del sgabel: “Quel de le maroidi”.
Par no parlar de quel pòro omo de Cesare Lombroso che, comodà su na specie de water, co’ la man destra postà su na crapa da morto, lustra dal tenpo, che in distansa la poI passar par un ròdolo de carta igienica, el s’à guadagnà un soranome che par finessa no se po”l dir!
E me fermo qua par no’ tirarla massa longa.
E passà ani o è passà secoli?
Wanda Girardi Castellani
