L’Angolo de la Wanda – Aprile 1998 – “La Gran Guardia de la Bra”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“La Gran Guardia de la Bra”

EI turista che riva in Bra, dopo de aver messo i oci su la ‘Rena e su quela vacada de fontana (bela imitassion de’n porcorisso) che n’ à regalà la çità de Monaco in canbio de ‘na bela statua de Giulieta, (messa po’ sul canton de’n vìcolo), el li volta a la Gran Guardia, el secondo, in ordine de importansa, tra i monumenti de la più bela piassa de Verona.
A dir la verità, da qualche tenpo convien vardarla solo da fora sensa aventuràrseghe par de soto parché, dove che ‘na volta se passava in rivista “al coèrto” le trupe ne i giorni de piova,  dèsso se ghe “còmoda” i sbandà de tute le rasse, specialmente quando fa scuro. EI Comune el fa del so mèjo, mandàndoghe a la matina i spassini ma le inominabili padele e la spussa… le resta, insieme co’ l’afronto che specialmente mi, che adoro la me çità, no’ riesso proprio a pardonar!
Finì ‘sta triste premessa, vedemo de parlar del bel palasso; almanco de quando el g’avea ancora el so lustro insieme col rispeto de la gente, magari parché, alora, a comandar gh’era qualchedun con du boni busi del naso e boni brassi par menar la stropa.
EI 26 de dicembre del 1609, dunque, el “Retor de Verona”, capitano ZUANNE MOCENIGO el ghe scriveva al Doge de Venessia, LEONARDO DONÀ, fasendoghe presente la necessità di averghe in Verona un locale verto dove poder passar in rivista le trupe nei giorni de bruto tenpo e el Doge co’ ‘na “DugaI” del 30 dicembre, in soli 4 giorni, co’ ‘na tenpestività che, a ocio e croçe, no’ g’avea parentele co’ l’aparado burocratico dei giorni nostri, l’à aprovà el progeto.
I lavori i è scominçià ne la primavera de l’ano dopo e i è andà ‘vanti fin al 1614, ano nel qual i è dovù èssar provisoriamente sospesi par ‘na rason, almanco quela, che conossemo ben ànca noialtri; la mancansa de schei.
El disegno del palasso par che’l vaga atribuì a DOMENICO CURTONI, scolar e neodo del grande MICHELE SAMMICHELI.
Par du secoli l’edificio l’è restà incompleto e quando ch’è cascà la Republica Veneta l’è passà al demanio.
Nel 1808, po’, el Vicerè d’ltalia el ghe l’à regalà al Comune de Verona a pato che’l lo finisse-fora ‘na olta par tute, nel giro almanco de tri ani, adatandolo a sede del Municipio.
L’incarìco el gh’è stà dà al grande architeto veronese GIUSEPPE BARBIERI e el preventivo, che’l conprendea anca la spesa de du ospedài ridoti ormai a tòchi, par poder sgonbrar el teren, l’è stà de ben £ 96.528,5… ‘na cifra con la qual, de ‘sti tenpi, te cronpi, si e nò, un par de scarpe, de “bonaman”, sui bancheti del marcà. Ma eco che el 4 de febrar 1814 Verona, finì de far parte del Regno Napoleonico, la casca (da la padela ne le brase) soto la suditansa de i “patani”… overo austriaci. I veronesi, che de eserciti strani i ghe n’avea piene le suste, propio, sora de’n muro de la Gran Guardia, restà ancora ‘na ‘olta inconpleta, i g’à scrito:
«Co’ san Marco dominava, se disnava e se senava. Co’ la santa libertà, s’à disnà e no’ s’à senà. Co’ la croçe de Lorena… no’ se disna e no se sena!”.
Dopo ‘n’altra barca de contratenpi e “tira-e-mola”, la fassada la vien a la fin-fine ultimà… ma semo ormai nel 1820.
Trentasie ani dopo finalmente vien messa in òpara la pavimentassion de piera del sotopòrtego, mentre la bela scalinada esterna la sarà inaugurada, dopo la sistemassion del livel de la Brà, tra el 1838 e el ’49.
Pensemo che la Gran Guardia, fasendoghe concorensa al Domo de Milan, la g’abia un so bon record, in quanto a “gravidansa”: 258 ani!
Desso nei saloni de la Gran Guardia, soto l’egida del comune de Verona, vien alestidi convegni e mostre; memorabili quele dedicade a Emilio Salgari e Pablo Picasso.
Se el sotopòrtego el resta un grosso problema par i motivi soraditi, i saloni interni, quei almanco, i è splendidi e mantegnù come se deve; forsi parché i tien serà le porte e quan che i le vèrse gh’è i guardiani par davanti a far da filtro.

Wanda Girardi Castellani