L’Angolo de la Wanda – Aprile 1995 – “Un padovan tra le piramidi: Giovan Battista Belzoni”.

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Un padovan tra le piramidi: Giovan Battista Belzoni”.

De mestieri, Giovanni Battista Belzoni, un gigante de du metri, padovan de nàssita e de sòca, vegnudo al mondo el 5 de novenbre 1778 “da onesti e agiadi genitori”, el ghe n’avea fati diversi, sensa mai catar quelo giusto: in prinçipio destinà a deventar frate a Roma, I’èra scapà davanti ai francesi. Molà po’ i studi de ingegneria idraulica, I’è stà barbier (come so pare), solevador de pesi, al circo Astley, balarin, marcante, inventor, ecc… Ma la so più granda passion l’è stà senpre quela de viajar. Nel 1800 lo catemo cusì in Olanda e tri ani dopo in Inghiltera. Finalmente, nel 1815 ècolo in Egito, rivà co’ I’intension de vendarghe al Kedivè Mohammed Alì ‘na machina idraulica, de so invension, par solevar le aque del Nilo e irigar i giardini de Subra. ‘Sta qua po’, la gh’è restà in corpo ma, constatade le grandi doti teniche de ‘sto straordinario, ecletico ‘talian, e grassie ancora a ‘n so protetor; el viajador, colessionista e console generaI inglese, Henry Salt, gh’è stà afìdà l’incarico de portar da Luxor al British Museum la ciclopica testa de la statua del faraon megalomane Ramses II. Stando cusì a contato co’ le maraveie de l’Egito, al nostro gh’è s-ciopà la passion anca par I’egitologìa. L’à esplorà Edfu, Elefantina e File. L’à riportà a la luce, ramassàndoghe-via la sabia, el grandioso tenpio de Ramses II, scolpì ne la rocia a Abu Simbel. L’à scoperto la tonba de Sethos I (che la porta el so nome) e I’à fato scavi a Karnak. Ma la roba più ‘nportante l’è stà quela de riussir par primo a entrar nela piramide de Chefren a Gizah; avenimento che I’à descrito lu ‘stesso in un so libro: «Dal 28 de febrar, giorno de I’aparission del primo masso, dopo 30 giorni de laoro gò ‘vu la sodisfassion de entrar, insieme col cavalier Frediani, ne l’interno de ‘na piramide che l’era senpre stà ritegnuda inpenetrabile. Dopo ‘na serie de passagi, uno più angusto e dificile de l’altro, se semo catà a un posso perpendicolar de 15 pie. Adentrandose senpre più fondo, calandosse co’ le corde, procedendo gobi in coridori streti e bassi, quasi inpraticabili, co ‘l fine de rivar al centro de ‘sta piramide, emo incontrà muri coerti de nitro che i imitava, desso le corde, ‘desso la lana de’n agnel, desso le foie de la cicoria. Quando finalmente semo rivà a la càmara centrale, semo anca resi conto che st’àvemo vardando un logo che da meiara de ani l’era stà via da la vista de i òmeni. L’atesa però l’è stà delusa parché intorno no’ gh’èra gnente de quel che se ‘spetavimo, al de fora de’n sarcofago sepelì a fior de tera». (Marso 1818). Belzoni l’à girà in longo e in largo, tamisàndola tuta, la Vale de i Re, anunciando po’ al mondo che, dopo el so passagio, no’ gh’ era più gnente da scoprir. EI gavea, tra le altre, un straordinario senso de la publicità, tanto che a un “Egyptian Hall” in Piccadilly, l’à tirà meso mondo, oltre che tuta Londra, con le copie dele piture murarie de la tonba de Seti.
Belzoni, uno tra i più grandi egitologi del mondo, gloria de la nostra Padova e de l’ltalia tuta, l’è morto po’ distante da casa, nel vilagio de Gwato, da le parte de Timbuctù, nel 1823 durante n’enesimo viajo a la ricerca de le sorgenti del Nilo.

Wanda Girardi Castellani