L’Angolo de la Wanda – Giugno 1991 – “NICOLA ROSSI LEMENI, QUASI UN VERONESE”

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“NICOLA ROSSI LEMENI, QUASI UN VERONESE”

“Veronese, de elession, de studi e de residensa, el più ‘nportante dei “bassi” del dopoguera, recentemente sconparso”.

La matina del 14 marzo 1991 emo savù dal giomal de la scomparsa de sto grande de la lirica: “morto a setant’ani a Bloonington ne l’Indiana (S.U.) dove che I’era docente de canto a l’università de Stato”. 38 ani de cariera coronà da trionfi in tuti i teatri del mondo. 100 opere in repertorio, de le quali certe scrite aposta par lu da Ildebrando Pizzetti, Mario Zafred ecc… Nel 1956 a la Scala I’avea conossù Virginia Zeani e ‘l l’avea sposà; na union artistica e afetiva che no I’à mai fato aqua e che solo la morte I’à podù ròmpar . Mi, NICOLA ROSSI LEMENI (Lemeni, I’era el cognome de so mama, russa de Odessa) me lo ricordo ben! Co’ i soi (so papà uficiale de ambassiata) el stasea a quei tenpi de casa in Veroneta.
Nel 1945, ‘rènte a l’amiga, soprano ANNA FORONI, l’avea cantà in ‘Rena na prima volta in un concerto “prò reduci de guera” e su la locandina l’apariva come “Sign. Nicola Rossi”. EI vero debuto arenian però el ghe l’à ‘vudo nel 1946, a 25 ani, a la 24ª stagion lirica; la prima dopo la parèntesi sanguinosa de la guera. EI so ruolo l’è stà quel de Ramfis ne l’Aida e mi, vardando e scoltando sto po-pò de “basso” che, come senpre sucede a quei che g’à sto particolare tòno de voçe, l’èra un tòco de “marcantonio” a urlo de lupo, gnànca me son inacorta de le 9 ore passà su i scalini còti dal sol.
L’ano dopo (1947-XXVª stagion) son corsa a sentirlo da novo ne la Gioconda ‘ndove che l’è stà n’Alvise memorabile a fianco de na debutante; la MARIA CALLAS, ciamà in ‘Rena da Zenatello al qual l’èra stà presentà in Mèrica propio da Nicola che, con éla e altri coleghi a le prime armi, I’avea formà un grupo par far de i concerti in Cìrcoli e picoli teatri. Sì… me ricordo ben ànca la Callas; na bela Voçe, ma un fisico da “Teresina-de i-baraconi”.
Quel stesso ano ROSSI LEMENI I’à cantà ‘nca nel Faust de Gounod e par la prima òlta ò notà ‘nca le So straordinarie doti de ator .
Par rincontrarlo, è dovù rivar el 1952 (XXXª stagion) quando che I’à cantà nel BORIS GODUNOV in na serada teribile par via de I’aqua a séce roèrse a causa de la qual i à sospeso e ripreso I’opera più ‘òlte. Mi e me papà, pian a pian, da le gradinade in alto semo passà a la platea, visto che mèso publico I’avea fato fete, mòjo, ingiassà. Credo che quel’ano NICOLA I’abia dà el mèjo de la so arte.
E rivemo al 1954 (XXXIIª stagion), i so ruoli quel’ano i è stà quei de Mefistofele ne I’opera omonima de BOITO e de Ramfis ne I’Aida. Mi avevo partorì me fiol Mirko el 16 de febrar e quel sabo de agosto, con tanto de capelin de paja, bòcia in carossina e… 90 chili de quarti adosso, bighelonavo in piassa Erbe. Tuto d’un colpo ò avistà el me “basso” preferito, sentà a un taolin de’n bar. Subito, carossina par davanti e con la me proverbiale facia rota, I’ò abordà dimandàndoghe n’autografo. L’èra un omo sinpatico e gentile; el s’à alsà e el g’à fato ànca na caressa al butin. Beh… quel a l’è stà I’ultima istà che I’à cantà in ‘Rena e spero tanto che la colpa no la sia stà mia!
Nel 1956, el stesso ano del so incontro, la soprano Virginia Zeani, so futura mojer, I’à interpretà Rosina nel Barbier de Sivilia e l’ano dopo l’è stà GILDA nel Rigoleto. L’è po’ tornà, sensa NICOLA, nel 1961 (XXXIXª stagion) ne la Lucia de Lammermoor e quindi, par I’ultima volta, nel 1963 (XXXXIª stagion) par cantar nel Lohengrin.
Come che I’à scrito el giornal, oltre che un formidabile “basso” l’è stà ‘nca un bravissimo ator; qualità pitosto rara tra i cantanti lirici, specie de i tenpi passà.
‘Dèsso, NICOLA ROSSI LEMENI l’è çenar… ma el ricordo de lu l’è come na montagna che pòcia co’ le çime ‘nte le nuvole e mi me lo rivedo inansi, soridente, grando e belo, sovrastante el me metro e mèso e po’ piegà su la carossina a farghe na caressa a me fiol, tra i mile colori ‘ndorà de sol, ne la più pitorica e poetica de le piasse veronesi. .

Wanda Girardi Castellani