L’Angolo de la Wanda – Ottobre bis 1991 – “Na dominica coi Cimbri”.

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“Na dominica coi Cimbri”.

Domìnica 7 lujo a Velo Veronese s’à svolta la seconda festa che ‘l “Curatorium cimbricum veronense” (operante dal 1974) I’à programà de inserir a rotassion in una de le sedi antiche dei 13 comuni de matrice cimbra. Sta manifestassion, presentà dal noto poeta e storico Piero Piazzola, la g’à ‘vù tri momenti particolarmente significativi: la presentassion del novo numaro de la rivista “Cimbri Tzimbar”, quela del libro, postumo, de Gianni Faè, poeta, fondador e, par ani, Presidente del rinato Cenacolo veronese e studioso dei cimbri e, dulcis… la consegna de la 2° medaia al merito cultural e sientifico a Attilio Benetti da Camposilvano, esperto de fama internassional nel canpo de la geologia, paleontologia e tradission cimbra. A coronar la bela giornada scominçià a le 9,30 co’ la messa e la benedission del gonfalon del “Curatorium”, gh’è stà a la sera, dopo na mostra fotografica e na proiession de diapositive, el sbaro dei celebri “trombini” de San Bortolo de la Montagna, na òlta capitanadi da l’indimenticabile Faè.
Presenti: le delegassioni de le comunità cimbre de Roana, Luserna e Val Dei Mòcheni, i fameiàri de Gianni Faè, el Presidente del Curatorium bavarense, Ugo Resch e varie altre autorità.
Par el Cenacolo de Verona à parlà el Presidente Prof. Bepi Faccincani e el segretario Enzo Franchini.

Gianni Faè nel… ciaro grando:

Dai pochi ceni biografici riportà su la patèla de copertina del libro stampà dal “Curatorium cimbricum” e presentà durante la manifestassion de Velo, se gà modo de saver che Gianni l’èra nato nel 1921 a S. Andrea de Badia clavena (VR), in pien teritorio cimbro. Ne l’ultima guera l’avea combatù da sototenente in Jugoslavia e l’avea ànca conossù l’inferno dei campi de concentramento nazisti. Tornà po’ ai so monti l’avea fato el Maestro de scola propio in quel so paeseto de mèsa montagna, ‘ndo, nel 1955, mi, sposeta con un bòcia de un ano, gò ‘vù modo de trasformar, durante na vilegiadura poareta, la conossensa “a le larghe” fata in Cenacolo, in na bona amicissia.
Da quela catedra no’ çerto intarsià nel ròaro, Gianni però no l’à solo despensà l’ A.B.C. L’è stà giornalista, Presidente de Pro Loco, Vice Presidente de la Comunità de la Lessinia, membro del Bacino Imbrifero, Sindaco de Badia Calavena, diretore, de la rivista “Vita Veronese” e de na casa editrice, la “COREV”, quela dei me du primi libri (“Pena e Scoa” e “Vanesa del cor”). Po’, fondador e Presidente de l’atual Cenacolo (con mi a farghe da segretaria), studioso de la cultura e de la lengua cimbra… talmente a fondo da poderse servir de sto antico idioma par scrivar saggi, poesie ecc…
Si… Gianni l’è stà tuto questo ma soratuto l’è stà un poeta, bon, autentico. De lu me ricordo in particolare la massa de libri ne la so casa, i dispiaseri, tanti e grossi, che ‘l me contava, l’amor par so moier; na dona dolçe, gentile e fina, del tuto degna de lù, che no la ghe mai mancà a l’apelo fin sul meàl de l’eterno e me ricordo le so maniere signorili. Ci l’avaria mai dito che ‘l fusse nato tra gente umile? EI pareva un conte; sempre elegante, cerimonioso, un fià compassado. L’unico difeto che g’ò riscontrà l’è stà la totale mancansa de malfidensa e na çerta arendevolessa davanti a le voçi grosse.
Poco prima che ‘l mancasse so’ ‘ndà a catarlo a l’ospedal. EI g’aveva za nei oci la serenità de ci sta par destacarse da la tera! Gò portà un “portafortuna”; un cuneleto de pèssa che ‘l strensea ‘ncora in man quando che l’ò saludà, andando fora, par l’ultima òlta.
Pòro Gianni… scùseme se domìnica 7 lujo a Velo son mancà a la to festa; l’ò savuda a robe fate! Capita!!!
De quel Cenacolo che, in casa tua e mia, emo sognà e progetà insieme ghe n’era solo du e de n’altro scalion. Picoli dispiaseri dei quai a ti, par fortuna, no’ riva più gnanca l’èco afievolì. ‘Dèsso te si nel “CIARO GRANDO” ma no in quel de la çità, là in fondo; amara calamita, sirena busiara, destesa ai pie de le to montagne poarete sensa çime ‘nevade. Te si in quel “vero”, co’ la to anima piena de autentica poesia, non solo lassà scrita…, vissuda!

EL CIARO GRANDO (de Gianni Faè)

Limpida sera d’istà,
che te slusi su la sima de i monti
co’ na gran dressa de stéle
che fa pi’ strovi i i boschi e ciare
le case e i progni,
par mi tardiga el sono
e no riesso a catar ben.

Da i alti muci del fen segà
ne i pré carghi de tristessa,
çento profumi se alsa
e canta i grij,
ma el rossignol el tase
spetando la luna tendra su la vale.

EI cor a mi me dise su
la solita filagna e ruma
sempe pi’ fonda la malinconia
de la me pora vita che se ingruma;
a forsa de tajare e de limare
co’ la prea anca el fero se consuma.

Voria, ma no son bon a sera
corgandome desmentegare tuto,
come che fa i malghesi
su i bàiti de Malera:
drento me ròsega,
cofà un castigo o ‘na maledission
el ciaro grando che infoga el célo
ladò distante, sora la çità.

Wanda Guardi Castellani