L’Angolo de la Wanda – Dicembre bis 1991 – MOZART: “…la voçe de Dio da dosento ani e par sempre”.

…a cura di Graziano M. Cobelli

gcobelli05@gmail.com

Quatro Ciàcoe: da Verona.

MOZART: “…la voçe de Dio da dosento ani e par sempre”.

“Çerte sere de inverno, da le parte de la Binastrova, el vento el te porta a le rece le note ciare de un organo…”

Credo che MOZART el sia stà el più grande conposidor de tuti i tenpi, ma par rendarmene conto, gò messo ani-anòri. ‘Dèsso, quando scolto çerti so concerti, le note tormentade del “Don Giovani” o la maraveiosa “Messa da requiem”, lasso la me carcassa su na carega e volo via, distante, ‘ndove no gh’è che puressa, belessa e parfession. Me se struca el cor quando penso a quel’òbito poareto; el cavaI co’ la schena ‘ngobà sòto la piova batente, le rude del caro che fadiga a girar, fondà nel paltan, el prete che brontola, moio negà, mastegando in pressia le rèchie, i bechini ‘ngiassadi che tira de longo co’ na gran voia de andarse a cassar in qualche ostaria calda co’ ‘n bocal de bira in man. L’era el 6 dicembre 1791, dosento ani fà. Volfango Amedeo Mozart, a soli 35 ani, l’era morto a le una del giorno prima lassando ancora in cantier quel che par tanti l’è stà ‘l so capolaoro: el requiem d-moll KV 626.
Propio par quel bruto tenpo nissun l’avea conpagnà al çimitero o forsi solo ‘l solito can, come risulta dal disegno de A. VIGNERON che l’è stà de proprietà de Beethoven. Ma secondo n’altra version, quel giorno inveçe a Vienna gh’era solo un fià de nebieta. Alora, come mai sto ‘bandono? Come mai un personagio cussì, conossù e amà in tuto el mondo, l’è stà sepelì in na busa comune, incartà ‘n t’un saco, sensa na lapide par sora, quasi che ghe fusse la neta volontà de far sparir cissà mai quali prove de cissà qual delito?
De vero, nel (paraltro stupendo) film de M. Forman “AMADEUS”, gh’è poco e za la storia da tanto tenpo l’avea assolto el nostro grande legnaghese ANTONIO SALIERI da qualsiasi responsabilità, ansi, l’è notorio che propio SALIERI l’è stà l’unico a starghe vissin e a giutar po’ la fameia, istruendoghe parfin i fioi. MOZART l’era ligà a fil dopio co la massoneria e a quei tenpi la Cesa e le grandi case regnanti no le gavea la man legera co’ i segnà da la squadra e dal conparso. Basta pensar a la fine de Cagliostro. Tante le congeture, comunque, ma gnente de sicuro. De cossa che MOZART el sia morto, come e parché, no se l’à mai savù, ne se podarà saverlo mai dato che de lu, coerto da la calce viva, no è restà più gnente. Par conpletar l’opera, so moier, Costansa Weber, na doneta da poco che la l’à crùssià senpre con senade de gelosìa e batùe de cassa, l’à molà par tera el calco de gesso ricavà da la facia del conposidor, subito dopo morto, mandando in fregole l’unico vero ritrato.
Cussì de Mozart no è restà nissun segno teren. Gnente de gnente! Ma al de sora de le miserie de la distrutìbile materia, de lu è restà la so musica, quela che ga fato dir a Salieri nel film de Forman: “L’è la vera voçe de Dio…”
Nel genar 1770, durante una de le trasferte organisà dal so incontentabile pare Leopoldo, dopo Bolzan e Rovereto, Mozart, viçin ai so 15 ani, l’è stà anca par 10 giorni a Verona. EI giorno 5 l’à fato el so primo concerto ne la sala grande de l’ Academia Filarmonica co na bela “sinfonia d’introdussion” conposta da lu e proseguendo po’ con de le sonade a prima vista, come che se pol lesar su la Gazeta de Mantoa del seguente 19 genar. Ma, tra i altri concerti, i più bèi i è stà fati ne la cesa de S. Tomaso su un armonio che se poI ancora amirar e che’l porta in t’un canton el so autografo: W.S.M. (Wolfang-Salisburgo-Mozart). Gh’era presenti tute le fameie più importanti de la çità e tra queste i marchesi Carlotti e i conti Giusti Del Giardino che i se l’à disputà, tiràndoselo a sonar ne le bele “avite magioni”. Ma la cesa de S. Tomaso, par i so concerti vèrti ànca al grosso publico, la s’à ‘npenì come un OVO! Grando, l’entusiasmo, specie da parte del popolin, du esponenti del qual, prima ancora che ‘l buteloto el se metesse a la tastiera, i l’à solevà in alto come na bandiera parché tuti i lo vedesse! Ne la me çità l’è stà ànca insignido de la carica de “Maestro de capela onorario”, na onorificensa che la risulta evidente da un quadro de Saverio Della Rosa, fato su comission de Pietro Lugiati, so ospite qua e amigo.
Me nona la me contava che in çerte sere de inverno, quando l’Adese ‘ntabià, sensa più n’ala de cocài, el core rusando tra i so àlsari, passando da le parti de la Binastrova, el desgrassià rion distruto da la piena de l’82, el vento el te porta a le rece le note ciare de l’organo de S. Tomaso. “Eco… (diseva i veci) l’è Mozart che sona!” E giuraria de averlo sentì ànca mi, dal ponte Novo, vardando na sera de dicembre la granda, cupa fassada de la cesa ‘ndo l’ocio spalancà, da Polifemo, del roson, tuto d’un trato e par un atimo, drio le dolçi note de l’organo el s’era iluminà. .

Wanda Girardi Castellani