L’Angolo de la Wanda – Settembre bis 1994 – “Palmarino Zoccatelli… l’ultimo crociato”.
…a cura di Graziano M. Cobelli
gcobelli05@gmail.com
Quatro Ciàcoe: da Verona
“Palmarino Zoccatelli… l’ultimo crociato”.
I giornài, le radio e le TV i se ne sta ocupando da ani. Ci lo amira, ci lo trata da esaltado, ci lo tol in giro… ma, infondo-infondo, l’obietivo che Palmarino Zoccatelli (veronese, da San Giorgio in Salici, i ani de Cristo, sindacalista, sposà e papà, de tri butini ancora picoli) el s’avea prefisso l’è stà parfetamente centrà!
L’Associassion che l’à fondà nel 1989 al scopo de promòvar la difesa de la fameia e dei princìpi morali, ancò la ga aderenti in tuta Italia e parfin fora, tuti ragiunti dal boletin trimestral che ‘l porta el nome de l’Ass. stessa: “FAMEIA E CIVILTÀ”.
1989… 1994; quasi quindes’ani de batalie ingagiade con fermessa, passion e, soratuto, con coerensa ai prinçìpi cristiani che ne vien da i insegnamenti del Vangelo; un libro che ancò el pararìa bandì da le case de i più, o relegà in qualche polvaroso e sconto canton de la càneva.
Ne l’89 la neonata associassion l’è ‘n dà subito in canpo, a lancia in rèsta, contro el programà concerto de “Madona”, in ‘Rena e quela sagra de cativo gusto i è riussì a farla saltar.
Subito dopo l’è stà guera contro tuto el “rock”, ‘na musica che, come ‘I dise Palmarino, la poI indur i giovani a la violensa, e indirissarli a la droga, (a parte procurar la sordità e ‘n rinbanbimento che i è spesso le cause pricipali de i incidenti del sabo sera) infin a portarli adiritura al suicidio.
“Fameia e civiltà” I’à po’ contrastà con tuti i mèsi a so disposission, la volgarità e la pornografia dilaganti, ne la stanpa, a la TV, al cine ecc… Entrando in polemica diretamente con l’on. Jervolino, I’à anca conbatudo el progeto (par adesso insabià) de l’educassion sessuale ne le scole, specie se pianificà e esclusivamente “tecnica”. Guera, po’, e de bruto, contro l’omosessualità sbandierada come un fior a la patela, sensa contar la vacada, za in ato in çerti loghi par la risolussion del parlamento europeo, de parmetarghe el matrimonio, darghe le case popolari e consentirghe adiritura l’adossion; la famèia la ga da èssar “naturale”; fondà da un omo e ‘na dona!
Ma za i novi crociati de Cristo i s’avea batù, fasendo volantinagio, contro el convegno promosso nel magio ’93 da l’Arcigay, a la Letteraria!
Un’altra inissiativa de l’Ass. l’è stà quela de schierarse, con un altro volantinaggio (40.000 foieti, arancione come le schede usà nel referendum) contro la depenalisassion de l’uso de la droga. Salvo che par i riconossudi miliardari, l’è evidente che ci tol droga el ga da deventar, par ‘na question de streta necessità, un spaciador, a meno che no’ ‘l ròba.
Tra interventi TV, conferense, proteste publiche, volantinagi e via discorendo, Palmarino Zoccatelli con el so grupo i à anca dà a le stampe nel ’92, ano de le manifestassioni par la scoperta de l’America, un interessante volumeto su lacristianisassion de ‘sto continente da parte de i missionari. Titolo: “La cristianisassion de le Americhe, un’epopea de la fede”. (Nelson Fragelli -suplemento a “Famiglia e civiltà” n. 4 genar 1992). Al libro, che ‘l porta in copertina’ na bela imagine de la Madona de Guadalupe, è seguì de le conferense, senpre su l’ argomento.
Dopo la nota guera al film de Scorsese: “Le tentassioni de Cristo”, recentemente el grupo de Zoccatelli el ghe n’à messa in canpo una nova, contro un altro ritegnù anticristian: “Per amore, solo per amore”, overo S. Giusepe; ‘na storia che se anca vista da ‘n’otica laica no’ se poI dìr però, almanco a me parer, che la smentissa la version evangelica. Sparì, comunque, quasi del tuto da le sale cinematografiche, el film in question l’è riaparso, in sordina, in quela de videonolegio. Ma tornando a ‘st’ultima batalia, gh’è da zontarghe che Zoccatelli l’è ‘ndà diretamente in polemica co’ ‘l regista del film “censurà”, Giovanni Veronesi, cussì tuti i giornài i à ‘profità par farghe sora el so “scoop”.
Dèsso, Palmarino; l’ultimo crociato in ‘sto mondo de gente menefreghista, interessà e senpre più e poareta de ideali, el gà in programa ‘na letera a tuti i neoeleti da ‘ste ultime elessioni.
EI ghe dimanda l’impegno de aderir a le inissiative tolte par preservar la fameia, tanto più che propio a questa l’è stà dedicà nel 1994. La nova classe dirigente italiana la dovarà portar avanti çerte tematiche, par ‘sta fameia in crisi, operar al meio ne le questioni fiscali, ne l’istrussion de i fioi che no’ la gà, come el dise Palmarino, da èssar un apiatimento. Bisognarà decìdarse a jutar solo ci nel studio ga i meriti; par i altri, con risparmio de schei e guadagno par la società, podarà essarghe ‘na promossion del lavoro, magari artigianal.
Dise Zoccatelli che un butin a l’asilo nido el vien costar al Stato ‘na diesina de milioni a l’ano; alora demoghe inveçe un aiuto a le mame parché, almanco par i primi ani che i è importanti e formativi, le possa restar a casa a “far le mame”!
Da Palmarino, d’altronde, gh’è la prova ciara e lanpante che ‘na dona la pòl far la massaia sensa binar traumi, ansi, realisandosse al mèio ne le so funzioni de mama e de sposa. La signora Zoccatelli, bela e gentile ospite ne la so casa che la podarìa far da sinbolo a l’istitussion che’l marì el sta difendendo, oltre a badar ai fioi e a tuto el resto, la ricama, la cuse, la lese libri e la ghe dà, soratuto, sostegno morale al so straordinario omo.
Par chi volesse notissie e informassioni più in largo, rivolgiarse a: Palmarino Zoccatelli, Ass. “Famiglia e civiltà”, Via Celà n. 53 -37060 S. Giorgio In Salici Verona – tel 045-609508 (Ndr).
Wanda Girardi Castellani
