L’Angolo de la Wanda – Settembre bis 1993 – “Al campo profughi de Kozina”

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“Al campo profughi de Kozina”

Dovea èssarghe anca mi, qualche tenpo fa, co’ la delegassion in viajo par el canpo profughi de Kozina, in Slovenia (ex Jugoslavia), par portarghe a quela pòra gente tuto l’aiuto, in viveri, vestiario e conforto, possibile. Invesse un inproviso inpedimento el m’à trategnù a Verona, anca se ‘l cor el se n’è andà con lori… in fondo a la borseta de la me arniga Carla Zanini Ferrari, una tra le promotrici de ‘sta inissiativa umanitaria, generosa quanto coragiosa.
El giorno dopo, però, ‘pena che la Carla la s’à ricaricà le fòrse dopo ‘na bona dorrnida, son corsa da ela a farme contar tuto.
Eco dunque el diario de la giornada, da le so ‘stesse parole: “Emo fato tapa a Trieste dove gh’è stà un incontro co’ i responsabili SPI del lògo che i à colaborà a l’inissiativa veronese. Da lori s’à cusì savù, de prima man, el stato de particolare disagio de i pròfughi del canpo de Kozina.
Dopo i saludi emo proseguì par quela località che l’è distante da Trieste una vintina de chilometri.
Da drio ‘na foresta de fil spinado, che ‘l n’à riportà a gala, teribilmente vivo, el ricordo de altri fili spinadi bastansa e che pensàvino i dovesse èssar i ultimi ne la storia tribulada de l’omo, emo incontrà i oci spalancà e le face pàlide e spaìse de sentenara de veci, done e buteleti; ‘na picola çità de gente strapiantà de violensa, ospitada in vecie casermete che le stà su co’ ‘l spuàcio!
Buteleti; tanti e i m’à parso cusì bei! I ne vardava incuriosidi e sorpresi come se i se stesse dimandando cosa mai la fusse vegnuda a far, propio lì, sta gente strània; ben passuda e ben vestida. Amiçi, opura no? Un spiansiso de speransa, po’ infondo un lanpo de paura… de dubio.
Avemo consegnà i pachi de vestiario, i dolçi, el material scolastico e tuto el resto, mentre i 2.750.000 franchi racolti tra i nostri associadi i vegnarà usadi per conprar de la biancheria, scarpe e tuto quel che ghe servarà. La roba più necessaria, però, emo constatà che l’è el late e i so derivadi, data la presensa de tanti butini, anca picolissimi.
Quel che soratuto n’à colpido l’è stà la grande dignità de ‘sti profughi che i g’à un solo grande desiderio; quelo de tornar a le so case. Nei notri riguardi i è stà de ‘na grande cortesia e sinpatia. I n’à conpagnà a visitar le so camerade dove che i dorme e i vive, incatastà anca in 15. Gh’èra ordine e parfin un tentativo de umanisar l’anbiente, abelendolo co’ le pòre robete portà via da le case distanti o salvà tra mèso le macerie.
Quando che semo ripartidi a saludarne gh’èra un prà de mane alsade, in moimento, come tanti fiori coloradi cunà dal vento e avemo prova la grande gioia de aver podù, almanco un pochetin, dimostrar la nostra solidarietà, anca se ne ponzea ‘na s-cianta la paura d’èssar stà scambiadi, forsi, par un grupo de curiosi.
Çerto che, ‘na òlta a casa, n’à ciapà un altro disagio ben più forte a la constatassion del nostro benessere, de la nostra chiete, paragonà a quel mondo amaro ingabià tra i fili spinadi tornà ancora ‘na òlta a butar come ‘n’eterna tremenda gramegna”.

Wanda Girardi Castellani