L’Angolo de la Wanda – Settembre 1995 – “MARAVEJE TACÀ CASA” – “El Ponte de Veja”.

…a cura di Graziano M. Cobelli

gcobelli05@gmail.com

Quatro Ciàcoe: da Verona

“MARAVEJE TACÀ CASA” – “El Ponte de Veja”.

EI me primo incontro co’ ‘sta maraveja de la natura; pur roba de casa mia, l’è stà a Mantoa (Palasso Ducal), dove, ne la celebre camara de i sposi, incastonà nel bel afresco de Andrea Mantegna: “L’incontro” (1474), se vede anca el ponte de Veja!
L’è uno tra i più importanti “monumenti” naturalistici d’Europa e uno tra i più bei fenomeni càrsici d’Italia; un ponte che dificilmente un architeto el podaria copiar; cusì grando, cusì ardito. EI se trova sui monti Lessini nel comun de S.Ana D’Alfaedo a m. 602 s.m., ndo che se incontra do valete: quela de Crèstena e quela de Penile. Par rivarghe, se ciàpa la strada de la Valpolesèla che taca a Parona, dopo l’ospedal de Borgo Trento e su, oltre Negrar, par Fane, fin al Corubio ndo che, al bivio par s. Ana se ciapa la stradeta de destra lassando a sinistra, zo in busa, el paeseto de Vagimal (da Verona, 3/4 d’ora de strada). Rivà dove che taca el sentier e le scalete che va al ponte, gh’è un ristorantin dove che se magna ben, no’ se spende tanto e gh’è modo de crompar la guida, (Tratoria Lavarini – tel. 045 7545048) ma intorno gh’è pura la possibilità de ‘rangiarse “al saco” con tanto de fontana; tuto a disposission de tuti co’ la speransa che no’ ghe sia i soliti incossienti a inpissar foghi. L’ingresso al ponte l’è gratis. Le roce che lo forma i è: calcari oolitici (i piloni) e el rosso amonitico (‘arcata). Le dimensioni i è ecessionali: l’altessa la va da i 24 ai 29 metri e el spessor de l’arcada el va da 9 a 11 metri. La distansa media tra le basi de ipiIoni la va da i 47 ai 52 metri, mentre la larghessa de i piloni a la base l’è de 59 m. uno e 26 quel’altro. In quanto a la larghessa de l’arcada del ponte sul pian caregiabile la va da 16 a 23 m. Soto l’arcada gh’è de le grande e profonde caverne che ‘na òlta i èra tute verte. Ancò quela principale l’è inveçe recintada e proteta da ‘na cancelada. Me ricordo che in questa, ciamà “de l’Orso”, longa 180 metri e biforcà a la fine in do diressioni, ghe so’ ndà anca mi, quando no’ pativo de claustrofobia. Ai bei tempi, quando soto al ponte corea ‘na ventàla de cascadele e russeleti, l’èra anca facile trovar de i splendidi fossili; amoniti rosse, crinoidi ecc… e parfin qualche ponta de frecia; segno de presense umane antichissime nel logo. L’origine carsica del complesso geologico l’è comunemente acetà da tuti i studiosi. Con tuta probabilità i è stà le aque de i torenti che 40 milioni de ani fa, da l’Eocene superior al Quaternario, le à parecià le basi a ‘sta superba architetura. Ma quando èlo po’ che s’à verificà el crolo de la volta del cavernon che à fini col formar el ponte vero e proprio? Gh’è ci parla del periodo Riss-Wurm (120.000 ani fa) e gh’è ci fa risalir ‘sto crolo final e la conseguente formassion del ponte al teremoto del 1223; comunque, mi no’ gh’èra e quindi ve la vendo come che i me l’à vendù. Intorno al ponte de Veja gh’è boschi e sotoboschi, aque che core, fiori e piante stupende. Ne la grota “de l’Orso” gh’è anca de le incisioni rupestri  interessantissime. Infine, el nome. Veja par che’l deriva. da “vecla-vicla” – acqua, opure “wegla” = vecia. Mantegna a parte, el più antico documento che ghe ne parla l’è scaligero e el porta la data 10 giugno 1325. In ‘sto documento gh’ è scrito: “ubi discurit acqua pontis de Vea”. Par ànca che Dante nel descrivar le Maleborge de l’inferno el se sia ispirà al ponte de Veja (e, essendo stà’ a Verona un bel tòco, gh’è propio da pensar che’l l’abia visto). Tante i è infine le legende ligà a ‘sto capolaoro de la natura e tanti i è anca i deti e i proverbi, esempio: «quando al ponte el se macia de rosso, el diaolo para più aqua nel fosso» ) «ci dal ponte de Veja va a S. Ana, g’à ‘na strada cagna»; «I l’à senpre vardà par maraveia e dopo i l’à ciamà ponte de Veja», ecc… (vedi «proverbi e deti trati da el ponte de Veja» di A. Forti, 1923).
Infine, la caminada l’è curta e facile, tanto che se poI portarghe anca i buteleti picenini che i sarà quei che se godarà de più, in ‘sto senario da rosarie!

Wanda Girardi Castellani