L’Angolo de la Wanda – Settembre 1992 – “Dàghe a le strie!”

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“Dàghe a le strie!”

“LA PRIMA STRÌA L’È STÀ BRUSÀ A TOLOSA. L ‘ERA EL 1274; EL PRINÇIPIO DE ‘N MASSACRO DESTINÀ A DURAR ÇINQUE SECOLI”

EI primo de marso, passando da Rivoltella del Garda, ò visto (ciapà par caso e par i cavei, a I’ultimo giorno) la mostra de i strumenti de tortura in uso nel medioevo; 8 càmare piene de atressi inpressionanti da tòr el sòno e tanti de i quài, secondo i cartèi che li descriveva, i era servì par le strie, acusà de “mercato” con el demonio. I era tenpi che bastava poco a farte cascar sòto el “brasso secolare”. Ancò se la santa (?) Inquisission la fusse ancora in auge, la gavaria da far i straordinari!
Peraltro, sòto la “vergine de Norimberga”, troneti pieni de ponte, pinse par sbregar, seghe par spartir in du e masse, rude, argani, morse, de sicuro se confessava de tuto. EI “Malle us Maleficarum”, compilà da du frati dominicani, l’elènca na barca de ste confessioni, una più fantasiosa e stravagante de l’altra.
Verso la fine del 1500 un çetto Jean Bodin, na bòna lana, autor ànca de ‘n’altro libro da peldòca, “De la demomanie des Sorciers”, I’à eseguì sentense de na crudeltà for de misura. Nel so libro el spiega in longo e in largo parché nel mondo de la stregoneria gh’è assè più done che òmeni. In realtà, de òmeni ghe ne saria altretanti, ma sti quà, essendo tanto più inteligenti de le done, i riesse a scapularla!
Pallade l’è nata dal sarvel de Giove e l’è stà cantà granda da i poeti apunto parché nata sensa màre; cusì l’è dimostrà che la sagessa e l’inteligensa no le poi vègnar da le femene che, par so natura, le se aviçina più a le bestie, tanto che Satanasso el se volta verso de lore, autrici de la rovina de l’omo. Bodìn no’ ‘l meteva gnanca in dubio che la dona la podesse far fioi col diaolo, ansi, el diseva che sti fioi i era facilmente riconossìbili parché senpre sechi come na renga! (eco parché, come ò senpre sostegnù, la gente in carne l’è la più bona. Vardème mi!)
L’odio par la dona, a quei tempi, l’era feroce, tanto che qualchedun l’era rivà a dimandàrghene el sterminio conpleto.
D’altronde, secondo un passo de la Genesi: “I figli di Dio (cioè, i diaoli) videro che le figlie dell’uomo erano belle…” Insoma, noialtre done, preda del demonio e, par so mèso, tentatrici de l’omo.
Anca S. Agostino I’à caricà sta “minestra “L’omo el nasse nel pecato parché so màre la lo concepisse nel pecato!” No commentI!
No gh’è da farse maraveia se pensemo che par stabilir che ghemo un’anima, ga volù un concilio.
Ma tornando a le strìe. Dopo la denuncia, la vegnea portà in preson e tacà-via solevà da tera parché el maligno no’ ‘l podesse giutàrla.
Se no la confessava subito, l’era messa a tortura e ve fasso grassia de i particolari parché gò el stòmego delicado e rispeto par quelo dei letori de Q.C.. Se, dai e dai, la tirava i sgherleti, voleva dir che Satana, l’era vegnù a tòrsela e bonanote!
Par riconòssar na strìa gh’era varie maniere. Se la invitava a piànsar e se no la ghe riussiva voleva dir che la d’era! De solito sta imposission la vegneva dopo che i ghe n’aveva fato àio fasendola piànsar e sigar par ore, fin a ridurghe i oci suti come el cor de ‘n’avocato. Po’, se sepeliva un so ciufo de cavei soto ‘l luàme e se l’era strìa, sti cavei i s’avaria trasformà in bissi (figuremose se in mèso al luàme no se cata bissi!). Altra prova, el diàolo el ghe regalava a le So bèle un piòcio d’argento che, se vardà da un cristian, el deventava un caveo bianco (e l’è pitosto raro che, çercando-çercando, almanco un caveo bianco no se lo càta).
Bisognava po’ controlar che in mèso ai vestiti no ghe fusse qualche òstia o piera magica, cussì se la fasea cavar zo nuda. Anca nei cavèi gh’era pericolo che la s’avesse scrito qualche formula.
Cussì, prima de mandarla a la tortura se la pelava. Tuto questo par impedir che con mèsi diabolici la riusisse a resìstar a la tortura stessa. Senpre a sto scopo, se ghe fasea anca un bon crister parché l’avaria podù evitar i tormenti anca beendo aqua e saòn o late de mama. Gh’è da dir che ‘l diàolo come amante el gà da èssar stà pitosto càncaro e infedele, parché no è mai sucesso che l’abia cavà da le peste una de le so morose. Tutalpiù el riussiva a farghe na visitina in preson par consiliàrghe de torse da le spese da par lore prima che provedesse la santa inquisission; un servissio che, gh’è da darghe ato, el faseva pitosto de spesso.
Pensierino finale: “Ancó ano desgrassia 1992, ne la sola Verona de strìe ghe n’è (riconossude e ben publicisàde) na vintina!”
Da qualche giron de l’inferno, tute quele che tra el 1274 e, el 1700 e passa, i è finì squartàde, brusàde, picàde o altro… cissà come che le se gode! Quei i era tempi scuri… ma a vardar ben, sti qua nostri, no i è de manco.

Wanda Girardi Castellani