L’Angolo de la Wanda – Ottobre quater 1994 – “VERONA VIVA – Placido Domingo, consegnà el premio “G. Lugo-1994″ al tenore spagnolo”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“VERONA VIVA – Placido Domingo, consegnà el premio “G. Lugo-1994″ al tenore spagnolo”

Domìnica 7 agosto ’94, ne la stupenda cornisa del parco de la “Vila Vento” a Custoza, gh’è stà consegnà al tenor Placido Domingo el premio istituido da st’ano dal Comitato par le onoranse al grande cantante veronese G. Lugo.
EI premio, ‘na artistica incision d’argento del maestro Angelo Antoniazzi, su ‘n splendido disegno del maestro Luciano Pollini, no’ ‘l podea andar in man più meritevoli! Tra l’altro, Domingo el festegiava le so nosse d’argento co’ l’Arena de Verona.
Tuti se ricordemo ben quela memorabile Turandot del 20 lujo 1969 ne la qual emo assistì entusiasti e maraveiadi, al debuto de ‘sto grande, par la prima volta in Italia, la prima in un teatro a l’aperto e la prima ne la parte del puciniano “principe ignoto”. L’è stà propio la sera del sbarco de i americani su la luna e quando che ‘l coro el se g’à rivolto: “o facia pàlida”,” i oci del publico, inluminà da meiara de candeline, i s’à alsà al bianco pianeta, protagonista de ‘n cussì grande evento.
Placido Domingo: 25 ani de successi ininteroti! Da i inissi de Tel Aviv, ‘na carelada de trionfi al Metropolitan de New York, a l’Opera de Vienna de Amburgo, de Berlino e via, in tuti i più prestigiosi palcossenici del mondo. 107 le opere in repertorio che le spassia da Wagner a Verdi. EI g’à a le spale 2500 recite. L’è stà, tra le altre, 200 volte Otello, 225 volte Cavaradossi; un artista unico, ritegnù da tanti (mi par prima) el mèio del mondo.
Dominica 7 lùio l’à ànca inaugurà, na nova carriera; quela de diretor d’orchestra, infati, l’à dirèto, e ben, l’Aida.
A çena a Vila Vento, tra l’opera le congratulassioni, l’assalto de i amiradori ecc… el gh’è rivà dopo le 2 de note ma po’ semo stà in conpagnia fin a dopo le çinque de matina. Ghe l’ò avù a la me destra tuta la sera e l’è de ‘n’alegria ‘na simpatia più uniche che rare, cusì pura so moier Marta che l’à leto parfetamente un par de me poesie in veronese.
Del Comitato, formà da Giuseppe Pezzini, erede spiritual de Lugo, generosissimo anfitrion, proprietario del ristorante-museo Vila Vento (‘ndo se magna da Dio), dal maestro Pollini, da mi, da Carlo Bologna e la soprano Magda Olivero, mancava solo ‘sta ultima che, par cause de forsa magior, l’à podù èssar presente solo con un gentilissimo messagio.

Wanda Girardi Castellani