L’Angolo de la Wanda – Ottobre bis 1995 – “Mama… li turchi!”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Mama… li turchi!”

In via S. Cosimo,
a far la guardia
sul porton de ‘n palasso
gh’è do stranbe cariàtidi,
in costume turco,
che noialtri ciamemo:
“i puòti”. ‘Ecove qua
la so storia.

Gh’èra na òlta…

Quando che Sebastiano Venier nel 1571 el g’à dà la supa ai Turchi in quel de Lepanto, tra i delegadi veneti intervegnù a Venessia par i festegiamenti ghè stà anca na rapresentansa veronese: Paolo Camillo Giusti, Gerolamo Canossa, Giulio Miniscalchi e Pio Turco. Propio a sto ultimo, na figura tra le più inportanti de la me çità, gh’è tocà l’alto onor de esaltar con un discorso la grande inpresa de i crociadi. Un poco par questo e un poco parché, varda caso, el g’avea un nome in caratere, ‘pena a casa l’à deciso de comissionarghe al Curtoni, neodo del Sanmicheli (ma su sta paternità gh’è de i dubi) un palasso che ‘l fusse “in memoria” de l’avenimento e ghe n’è vegnù fora na roba che la fasea a pugni con tuti i cànoni rinassimentali, versendo la strada al baroco; un stile miga massa sentì da ste parte, tanto che ‘pena i me concitadini i à messo i oci su le do cariàtidi, ciòsse e in costume turco, i l’à de paca batesà: “i puòti” (i bamboloti).
Naturalmente, sto nome i ghe l’à tacà po’ a tuto el palasso e parfin a tuta la strada. Che i “puòti” i ghe stava sul stomego a tanta gente, i l’à capì i paroni de casa quando na note i è stà svejà da na carga de massade, tali da far balar tuto el casamento. L’èra la matina del 2 de agosto 1579 (poco dopo che ‘l palasso l’èra stà finì) quando che, corsi zo in camisa e papalina, i à scoperto che i g’avea decolà le do pòre cariàtìdi, andando po’ a tacar via le teste, ornà de turbante, soto a la berlina de piassa Erbe, dove che a quei tenpi se usava espor le “suche” de i condanadi a morte (secondo l’uso de la Serenissima).
Le teste, recuperade, i è stà in quatro e quatr’oto ritacà, anca se un poco a la vateciàva, ma la rùsene de i veronesi no la doveva miga fermarse li.
De fronte ai Turco gh’è n’altro palasso; quel de i Vimercati e sti quà i s’à cavà el gusto de castigar i siori inparmè (dirinpetài) par l’afronto de averli costreti a vardar in eterno cotanta brutura, tacando su la ciave del portaI de ingresso, propio de fronte ai famigerati “puoti”, un mascaron co la boca spalancà e la lengua de pingolon, imortalà in na sgogna da fògo. Comunque, passado el tenpo e cargàndose de pòlvar, i puoti i à finì col farse desmentegar da i patidi de arte e de bel stile. A no desmentegàrseli l’è stà invesse el popolo che, se anca sacrificà in na via streta e scura ndo che no filtra el sol gnanca a mesodì, l’à seità, generassion dopo generassion, a portarghe inansi i fioi, par contarghe la so storia con quela de le tre conpagnie de crociadi che Verona l’avèa mandà contro i turchi, partecipando cusì gloriosamente a la vitoria de Lepanto; na memoria che se poI ritrovar anca ne la capela del rosario in Santa Anastasia; la bela cesa gòtica ndo che se conserva pura, picà con de le grosse cadene al sofito ne l’ala de sinistra, (quela, par intèndarse, del “Pisanello”) un timon de nave nemiga che i reduci i g’à lassà a la Madona come ex voto; un timon che, ci-sà po’ parcosa, noialtri veronesi emo scanbià par na massela de balena.

Wanda Girardi Castellani