L’Angolo de la Wanda – Ottobre 1993 – “EMARGINASSION – Le done co’ la sporta”.

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“EMARGINASSION – Le done co’ la sporta”.

I me conta che in ‘Mèrica ghe n’è za ‘n’esercito! Quel paese là, pien de robe macroscopiche; case, richesse, delinquensa, droga, aids e, soratuto, contradission, piàn a piàn, oltre a la coca-cola, i blu-gins, i amburgher co’ ‘l scartosseto de patatine frite, i pop-corn, le ciunghe ecc… el ne passa anca tute le so miserie.
Una de le più desolanti l’è quela de «le done co’ la sporta».
I è sole, sensa fissa dimora e le se sposta de qua e de là con tuti i so vestiti indosso, uno su l’altro, tanto che ‘l me fa pensar a de le seole. Le viaja con sachi de plastica e sporte, ando drento se ghe cata de tuto: coerte, onbrele, roba da magnar, scarpe e magari ànca i resti de ‘na vita manco grama.
Quando el di ‘l se cava da torno le ultime onbrìe de la note, da drio el canton, no’ se sa da ‘ndove, ècole che le càpita con tuta la so marcansìa al seguito. Qua nel borgo, a una, specialmente, da soto la còtola ghe vansa zo, oltre a ‘na grenbiala a scacheti un par de vestiti. Quan’ l’è inverno, de soravìa la ga anca un maion, ‘na giacheta e un vecio tabar. De primavera invesse, spunta fora un inpermeabile de quei che, ‘pena finì la guera, se usava ciamar (par via del bianco slavà) «sfoio de tajadele sensa ovi».
Rivà in piassa, la se còmoda su ‘na bancheta e la speta che le mòneghe de l’asilo le versa botega, par poder far colassion co’ la scudela de late caldo, passà fora dal canceleto.
‘Na domìnica, quando a le sete de matina ò portà-zo la Picia me ghe son sentà vissin e ò tacà boton. Dai e dai, son riussida a capir che la se ciama Cesira. Po’, con passiensa ò scominsià: «Dove dòrmela ?» «… ando càpita. Su ‘na bancheta, se no’ piove. Qualche òlta, se lo cato verto, drento a ‘n porton. A la stassion o soto a la Gran Guardia. Insoma, dove se poI e quando no’ i me paravia». «E, par magnar ?» «… Dai frati del Barana, dai preti o da le mòneghe. Qualche òlta ne le boteghe de pistor i me regala un paneto, magari co’ la bondola o co ‘l formaio. ‘Na òlta ò catà vissìn a ‘n cassoneto ‘na scatola intiera de biscotini, ma lì se pesca de tuto; scarpe, vestiti, paletò, careghe, stramassi, televisori, pomi e naranse; i buta via anca so mare!».
«Ma parcosa fala ‘sta vita. G’ala miga de i parenti, dei fioi?» A ‘sto punto la s’à levà-sù, l’à rancurà i so penati e la m’à voltà el c… sensa altri preanboli.
La giornalara che gh’è sul canton de la piassa, la m’à contà che la Cesira l’è de bona fameia. La ga un par de fioi che i à tentà in tute le maniere de cavarla da la strada metendola a ricovaro. Gnente da far; i la sera-sù e ela, pena che la poI, la se la cata. Ghe piase vìvar lìbera, anca se via da tuti, e sicome che no’ la ghe ronpe l’anima a nissuno, i à finì col lassarla far a modo suo. Ghe saria da considerar che de ‘sti tenpi i è gran pochi i veci rancurà in casa e in quanto a le case de riposo, (quele che no se mèrita la definission de “lager”) amesso che se riessa a trovar posto, i è a livel de ‘n hotel a 5 stele; a Verona le va da un 1.600.000 a 3.000.000 al mese, cure mediche a parte e, naturalmente, ‘pena che ‘l vecio el taca a scantinar de bruto… àida, a l’ospedal! E alora, ogni giorno se sente de ansiani che more soli come i cani a remengo. Par altro, quante altre ghe n’è de miserie molto spesso ignorà? Qua gh’è anca un barbon, sporco e spussolente come un tonbìn; e che, a quanto i vocifera, l’è adiritura un ingegner nucleare. El va in òlta co’ ‘na bici rùsena, piena de strafàntole tacà sora. A scrutàr ben, soto a la giungla de peli incolti e de la rufa, se diria che l’è pura un bel’omo. Çerto che ‘dèsso no’ ‘l gà più pensieri de tasse, politica, burocrassia e ci  più ghe n’à più ghe ne meta; tute quele rogne che a noaltre “persone civili” ne procura esaurimenti nervosi, mal de fegato e de stomego. Lu adesso l’è libero, come i rondoni, de ‘ndar e fermarse andò che ‘l vol. Ma, tornando a le “done co’ la sporta” (un argomento tratà anca in un bel film, proprio da ‘na casa de produssion americana), s’avevimo proprio ilusi, e par tanti ani, che la pitocarìa più nera la stesse sparendo, invesse la marcia a passo de fanfara e con un mar de sfacetadure, sempre pèso, basta vardar tuti quei pori marochini e varia umanità extracomunitaria che, armà de ‘na strassa sporca e un seceto, i stassiona ai stop citadini, netàndote (se fa par dir) diesine de òlte el parabressa, tanto che ci va in òlta tuto el giorno in machina el và a ris-cio de restar sensa veri a forsa de strussamenti o de passar co’ ‘lrosso nel tentativo de svicolar.
Ve li ricordèo i ani ’60… ’70? Beati ci l’à vissudi ma, vardando i nostri fioi e neodi e pensando al so avenir, ‘dèsso gh’è da tremar! Me sa tanto che, tuto somado, la Cesira la sta meio de noaltri; sensa un pensier al mondo! G’ò dimandà: «Cosa ghe ne pènsela de tangentopoli?» Risposta: «Cossa saressela ‘sta roba?».
Più fortunada de cussì!

Wanda Girardi Castellani