L’Angolo de la Wanda – Ottobre 1992 – “EI premio – Na vita par la lirica – a Gianni Raimondi”.
…a cura di Graziano M. Cobelli
gcobelli05@gmail.com
Quatro Ciàcoe: da Verona.
“EI premio – Na vita par la lirica – a Gianni Raimondi”.
Ne la cornisa del salon del Circolo Uficiai de Pressidio, in Castelvecio, el maniero volù da Cangrande 2°, che specia le tori ghibeline ne l’ansa de l’Adese a le rigaste, s’à svolto, dominica 10 magio, davanti a ‘na platea fissa e elegante, la cerimonia de ‘l premio “Na vita par la lirica” oferto ‘sto ano dal Circolo “Giovanni Zenatello” de Verona al tenor Gianni Raimondi.
Tra el publico: el presidente del Circolo ospitante, generaI Boldrin, el vicepresidente de l’Ente Lirico, dr. Stefano Campanella e l’ex diretor artistico dr. Carlo Perucci, el fedelissimo Ruggero Orlando, ecc…
A parlar de l’ospite d’onor è intervegnù, presentà dal sinpatico Nando Tavoso, “deus ex machina” del Zenatello, el musicologo prof. Carlo Bologna, come senpre esauriente e piasoso (piacevole) conferensier.
GIANNI RAIMONDI, bolognese purosangue, el ga ‘Vù el debuto al Comunale de la so Cità nel 1947; l’ano che ‘l regista Carmine Gallone l’à scominsià co’ le so opere liriche “filmade”, recitade e cantade da i grandi de l’epoca: Tito Gobbi (del qual st’ano che vien bisognarà parlar, parché scadarà i 80 ani da la nàssita e soratuto parché l’è stà grande e… veneto da Bassan), la Pederzini, Tagliavini, Bechi ecc… EI primo ruolo de Raimondi l’è stà quel del Duca de Mantova; particolarmente impegnativo! La sua l’è stà na cariera sensa solussion de continuità: Londra, Parigi, Mosca, New York, Montecarlo, oltre ai più prestigiosi teatri nassionai. Nel 1956 l’à cantà, co’ la Callas a la Scala in ‘na memorabile Traviata. Nel 1957 l’è stà da novo el Duca nel Rigoleto verdian a l’Arena de Verona con Virginia Zeani, Ugo Savarese e Giulio Neri. Voçe sostansiosa, la sua, omogenea e nel stesso tenpo brilante; na carateristica che la gà da èssar propria del ruolo del Duca. La voçe de Raimondi, strumento estremamente dùtile, l’à savù ‘verghe passagi, anca sotili, de registro e de frasegio sensa mai, paraltro, pèrdar de forsa; na voçe che la gà ‘vudo e ancora la gà, na grande estension.
Nel 1956, a la Scala, senpre co’ la Callas, l’à interpretà pura la Lucia de Lammermoor (ruolo po’ ripetù in ‘Rena nel 61 con la Zeani soto la diression de Francesco Molinari Pradelli.
Carlo Bologna l’à sotolinià la linpidessa de dission de ‘sto grande interprete; “Na dote essensial par far sentir note, frasegi, coloridure”. Tra le opere de ‘l so repertorio gh’è “La Favorita” de Donizetti, ‘n’altra “scorsa de banana” par tanti tenori che de solito i la affronta con un tono da piagnistèo. No’ cussì Raimondi che ànca in ‘sta interpretassion l’à savù èssar vibrante e viril. Da citar pura la so parte ne “I Puritani” de Bellini dove che l’è spicà con tessidure acutissime ma sensa mai cascar nei falsetti e con solussion, nei momenti “più lirici e de acuto, de rara belessa. Na maniera de cantar che l’à impressionà parfin el grande ma dificile Giacomo Lauri Volpi. Raimondi l’à recità cantando, passando da opere come el “Guglielmo Tell” de Rossini, “La Mignon” de Thomas, el “Don Pasquale” e la “Anna Bolena” de Donizetti, el “Macbeth” e “L’Otello” de Verdi, a Rossini e Puccini, co’ la stessa maestria. “Un attore nel canto”, el l’à definì Carlo Bologna che par dàrnene dimostrassion l’à altemà la conferensa con registrassioni dal “Rigoletto”, “La Lucia”, “La Turandot”, “Madama Butterfly”, “La Tosca” ecc… A premiar po’ con el bel trofeo, opera de ‘l maestro orafo Angelo Antoniazzi, Gianni Raimondi, l’è stà el dr. Perucci, ritomà fra noialtri dopo la grave malatia.
A coronar el tuto gh’è stà quindi un bel concerto lirico-vocale con le voçi de tri fra i più prometenti alievi de ‘l festegià: la soprano Eleonora Paulicchio, el tenor Stefano Montanari e el basso Davide Uberti. Al piano, come senpre, la brava prof. Michela Forgione. In finis, na sorpresa; dopo aver cantà con insospetada forsa, oltre che con sentimento, la canson napoletana “Dicitencello vuie”, Raimondi l’à fato, in dueto co’ la brava Eleonora, el brindisi da “La Traviata” de Verdi.
E sicome tuti i salmi i finisse in gloria; festegiando i amiçi, semo ‘ndà a çena al Tòrcolo, ‘ndó, tra un piato e l’altro, un toscan e ‘n gòto, Gianni Raimondi l’à da nòvo cantà… oltre a contarne na barca de barselete in bolognese… co’ la stessa braùra e vivacità.
Wanda Girardi Castellani
