L’Angolo de la Wanda – Novembre ter 1993 – “ULTIMO SALUDO A GIANMARIA GRANDESSO”.

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“ULTIMO SALUDO A GIANMARIA GRANDESSO”.

La Poesìa Dialetal Veneta, streta intorno ai “Panociari” de Schio, la pianse uno de i so “grandi”.

Luni disdoto otobre, a le 4 de dopodisnar, la più bela tra le cese de Schio, S. Francesco, l’era stracolma de gente vegnù da tuto el Veneto par darghe l’ultimo saludo a GIANMARIA GRANDESSO, poeta dialetal, ator e scultor de ciara fama, scomparso ‘nprovisamente la matina del 15 de ‘sto mese.
Belo e comovente el discorso del salesian don Luigi Fantinato che l’à ricordà la bontà, l’alegra vitalità e l’ecletica arte de ‘sto nostro amigo, del qual emo za tracià el ritrato in un articolo aparso su Q.C. nel n. 2 del febrar 1987.
Quando, sòto la piova, l’emo visto andar via, sul sfondo de i monti inçercolà da le nuvole basse che le se sfilaciava a pian come un longo pianto, tuti emo capì con sgomento che ‘n’altra colona de la nostra arte l’èra croà. In un tremendo zugo de birili, un drio de l’altro i poeti dialetali veneti i va-zo e, purtropo, no’ gh’è ricambio con sangue novo.
Noaltri te ricordaremo e te gavaremo sempre nel cor, GianMaria, ma… dopo, ci restarà e, soratuto, cossa restarà in ‘sto mondo frenetico che se piatisse e se descolora ogni giorno de più?
Nel to studio, tra le tante bele opere, gh’è ‘na grande “deposission da la croçe”, tragica, intensa… piena de la to arte e de la to grande fede; l’avarìa dovù finalmente catar la so giusta colocassion proprio in ‘sti giorni e l’èra uno tra i to più grandi desideri; speremo che ‘dèsso no’ vaga tuto in desmentegon.

Wanda Girardi Castellani

Al Grupo “LA PANOCIA ” el nostro senso de cordolio più vivo e un “tegnemose streti”.
La Redassion