L’Angolo de la Wanda – Novembre 1995 – “‘NA CAROSSA NE LA SERA (e la comunità ebraica veronese)”
…a cura di Graziano M. Cobelli
gcobelli05@gmail.com
Quatro Ciàcoe: da Verona
“‘NA CAROSSA NE LA SERA (e la comunità ebraica veronese)”.
“A mezzanotte in punto/ a l’aria scura/ fin che in silenzio dormono gli uccelli/ del cimitero ne varcai le mura/ e guardo intorno a questi muti avelli./ Cerco la tomba dove dormendo stà/ l’amato del cuore/ idolo di beltà”
Cusì cantava me mama nel contarme la legenda de la dama che ogni sera la riva davanti al cimitero ebraico de via Badile (Borgo Venessia) dove che par tuta la note la và in çerca, sensa mai catarla, de la tonba del so perdudo amor. Po’, apena che a l’orisonte se profila el primo s-ciantiso de l’aurora, a passi legeri e precipitosi la rimonta su la carossa nera che, con un sigolìo sinistro de rude, velocemente la sparisse longo la strada dove le onbre pian a pian le se ransigna a drio i cantoni, al botesar de le canpane dei “5 borghi”.
Questa la bela e triste legenda che ancora qualchedun ghe conta ai neodini, spassesàndoli a ciapar el sol par via Badile, su l’erba verda de le vanesèle che guarnisse l’ingresso del cimitero israelita. La costrussion la risale a la fine del 18° secolo quando è stà desfà quel’altro de via S.Francesco in Canpofior; el più antico de Verona. Longhi viài de cipressi, lapidi rosegà dal tenpo, vialeti bianchi dove el silensio l’è a malapena sgrafà dal piolar dei useleti e dal rusar de le ave. La strada l’è streta, de poco passagio e gh’è intorno ‘na paçe granda che conduse a pensieri de poesia.
La comunità ebraica a Verona la se g’à inpiantà nel primo “400” e la so atività l’è stà subito quela dei prestiti su intaresse, quindi unanimemente mal vista tanto che à tacà fiorir çerti modi de dir, sul genere de: “ludro come n’abreo”, “l’è piassè abreo dela mama de san Piero”. In seguito, sicome tanti i è stà de casa in via Pigna, par darghe de l’avaro a uno se ghe diséa “te sì de la pigna”.
Verso la fine del “500” la Republica Venessiana, su pression del vescovo Valier, l’à istituì el Ghèto. Stó logo, prima l’èra in vicolo Crocioni e po’, nel 1600, l’è stà delimità tra via Peliciài e via Massini, drio la Domus Mercatorum ( in corte Spagnola), dove che è stà costruì anca la bela Sinagoga. Da prinçipio tra ebrei e cristiani gh’è stà ‘na çerta toleransa ma nel periodo de le Pasque veronesi, nel 1797, el ghèto, acusà de èssar un nìo de giacobini, l’è stà ciapà d’assalto da la popolassion. G’à volú i edìti napoleonici par consentirghe ai ebrei de poder abitar ndo che i voléa, anca fora dal ghèto, tanto più che verso la fine del secolo, tante de le so case, ritegnù malsane, i èra stade demolide. A completar l’opera, è vegnù po’ el fassismo nel 1924, a sventolar de bruto la vargognosa bandiera de l’antisemitismo.
Gh’è da dir che a far casòto parché fusse demolì definitivamente el ghèto, se g’àvea messo prima anca i futuristi, con Marinetti in testa… ostacolà, paraltro, da tanti… prima fra tuti Matilde Serao, a quel tenpo colaboratrice del giornal locale.
La comunità ebraica veronese la g’à vù nomi ilustrissimi: Cesare Lombroso, Lebrech, Achille Forti, la poetessa Lina Arianna Jienna (de la qual emo zà parlà su Q.C.) ecc…
Durante l’ultima guera, con le persecussioni, la cesa veronese l’à jutà e protèto mèio che l’à podù la so comunità ebraica ma me ricordo de aver visto par le strade, ridóti a far i spassini, avocati, dotori, ingegneri, siensiati ilustri (tra i quai un caro amigo de casa mia… che quando me papà el l’à visto con tanto de ramassa a netar via Cantarane, el sà messo a piànsar). Espulsi da tuti i circoli e associassioni, scole e via-diséndo, censuradi ne le so pubblicassioni, a seguito de le legi antisemite del 1938, tanti, tra el ’43 e el ’45, i è anca finì, stipadi nei cari bestiame, verso la tragedia dei lager da dove i più no’ i è ritornà, come la nostra Lina Arianna Jenna, la dolçe poetessa volà via da ‘n nero camin.
Wanda Girardi Castellani
