L’Angolo de la Wanda – Novembre 1993 – “Robar in cesa”.
…a cura di Graziano M. Cobelli
gcobelli05@gmail.com
Quatro Ciàcoe: da Verona.
“Robar in cesa”.
Quando che la religion, l’onestà e la morale no’ i èra solo de i nomi stracampidi, sepelì in qualche pagina del vecio “Melzi”, par definir la pèso tra le lasaronade se usava dir: «l’è come robar in cesa». Ma in ‘sti ani emo tocà el fondo, tanto che gnanca i furti ne le cese no’ i fa più notissia. Epure, è passà solo vint’ani da quela domìnica matina del 17 giugno 1973 quando i veronesi, rinunciando parfin a la fatidica gita sul lago, dopo aver leto el giomal i à fato capanei par tuta la çità, comentando incocalidi el furto de l’anta de sinistra de la pala d’altar de la basilica del san Zen. L’opera, rafigurante i santi Piero, Paolo, Giovani Evangelista e ‘l nostro Zen, un ano prima l’era stà in trasferta a Mantova par la mostra del Mantegna che, propio lì, tra l’altro, el n’avea onorà de la so arte rafigurando “in ‘te ‘n afresco de la “camara dei sposi” al palasso Ducal, el nostro bel ponte de Veia. Beh, la pala de san Zen, pa’ ‘sto viaio, l’èra stà coèrta da ‘n assicurassion de tri miliardi; ‘na cifra, naturalmente, simbolica.
El furto l’è avegnù ne la note tra el 15 e ‘l 16 giugno, tra el vènardi e ‘l sabato. I ladri sacrileghi i è entrà in cesa, segando le bare de ‘na finestrela che dà ne la cripta ‘ndò gh’è le relichie del Santo. Da lì, scavalcando la cancelada, i è ‘ndà a la parte de sòra de la Basilica e montando su l’altar magior, usando come scala un grande legìo i à sfilà dal tritico l’anta de sinistra. Po’, sensa dificoltà, i à scardinà ‘na porta e rivà in via Orti de Spagna i à caricà el quadro su un furgonçin, telàndosela cissà ‘ndove. Ne la Basilica, come in quasi tute le cese, no’ gh’èra sistemi de alarme cussiché el sagrista Adelino Sboarina (in pension ma ancora saltuariamente in servissio) el s’à ‘nacorto del fato solo a la matina drio quando “ninando el gropo de le ciave, in man” (come l’à scrito Barbarani) l’à scominçià el so solito giro, versendo le porte a turisti e fedeli. L’èra evidente che sarìa dovù, prima o po’, rivar la richiesta de riscato, parché de vendar ‘n opera cussì nota no’ l’èra gnanca pensabile. Infati, dopo ‘na prima “sbarada” de 280 milioni al giornal locale, telefonada che po’ la s’à rivelà del solito mitomane, el 25 del mese gh’è rivà finalmente quela bona a l’avv. Rossi, Pres. de i Ist. Ospedalieri, tutori del tritico robà e la cifra richiesta l’è stà’ de soli 8 milioni. L’apuntamento co’ i rapidori l’è avegnù quela sera ‘stessa in un’ostaria in provincia de Padova, dopodeché el “Mantegna ” l’à podù ritornar in patria.
Ma de furti ne le nostre cese ghe n’è stà diversi. Tanto par scominçiar, da la bela cesa de S. Mauro de Saline, al monte de S. Moro, è sparì tuto, ma propio tuto: statuete antiche, ex voto e parfin i çercoli (ceppi) che i carceradi i èra usi, ‘pena fora da la “gatòi”, portarghe a S. Leonardo de Limoges e che i vegnea messi, durante la sagra de S. Matteo, intorno a la testa de i “passienti” par farghe passar l’emicrania. Da ‘na capela setecentesca de Colognola ai Colli è sparì ‘na pressiosa Madona co’ ‘l Gesù bambin, un comò del ‘700, de i candelabri e parfin ‘na diesina de careghe. Da S. Giorgio in Braida à ciapà el volo do bele tele ovali catalogade a la Sovrintendensa ai beni artistici de Venessia. Nel 1988, altro furto in cesa a Grezzano de Mozzecane e ‘n altro a la cesa de S. Martin de Salizzole. Idem a Torri del Benaco, ne la cesa de S. Antonio e al santuario de la Bastia, a Isola de la Scala e a santa Maria de la Pergolana, a Lazise, a Romagnan, e via discorendo. De tute ‘ste opere pressiose, solo de raro è tornà ‘ndrìo qualcossa.
Gh’è da conclùdar che, come risultato de ‘sta situassion, tute le cese, salvo ne le ore de funsioni, le resta sprangade.
E pensar che un tenpo la cesa l’èra un rifugio ando çercar paçe e ristoro in tute le ore del dì e de la note. ‘Dèsso anca ne la “casa del Padre” se g’à da ‘spetar l’orario de apertura e andar fora da le sgàlmare a quel de chiusura.
Wanda Girardi Castellani
(incocalidi = allibiti/costernati)
(stracampidi = decrepiti/obsoleti)
