L’Angolo de la Wanda – Novembre 1992 – “Verona… prima de Guernica”.

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“Verona… prima de Guernica”.

“Bonbardamento del 14 novenbre 1915 in Piassa Erbe a Verona”.

Za da prima matina, tra el via-vai de le done a far la spesa, se alsava sora i ombreloni intasseladi, alesando in mèso ai banchi, el profumo de i maroni, de i peri còti e de la sucabarùca spenelà de oio vecio. L’èra na dominica come tante e i piassaròti, che a quei tenpi no’ i gaveva l’òbligo, ne la voia de tegner serà i banchi de festa, i seitava a riciamar i clienti, a contratar la merce, a frìsar ne l’oio i bomboloni, ridar, schersar, barufar par na stadera de dubia precision un chilo de pomi con drento el “paron de casa”. La guera, scopià in primavera, no la s’avea gnancora fata sentir in çità, salvo che par i tanti òmeni che avea dovù partir e che ‘dèsso i èra inpegnà su l’Isonzo o ne le fornasi ardenti de le grandi Alpi e del Carso da ‘ndò l’eco de i canoni el rivava, involtolà de tricolor e de gloria, solo ‘traverso le letere dal fronte.
Na matina del novembre 1915, na dominica d’inverno come tante, fata su nel tabar de pano e che, lassà da banda le pianèle e le sgàlmare, l’avea tirà a pàtina, do setimane prima, in ocasion dei “morti”, i veci polacheti ornà a le sóle da qualche bol.
Ma… èco che da la tor Lamberti, tuto d’un colpo vien-zo, come smartelà su le doghe de na bote sbusa, a larghi rintochi… la voce del “Rengo” e subito… par n’atimo, se smorsa el farmento… i sighi, le sganassade, el ciasso de i butini!
Là, su nel cel sbiavo, tri arioplani austriaci i sta volando su Verona… neri come aIe de corvi.
AI rintocar de la campana se smissia i bòti de le baterìe antiaeree e, el strèpito de i mitra e de i fusili, in un concerto tremendo quanto inutile. (30 ani dopo, l’antiaerea veronese, impegnà, col stesso risuJtato de la prima, ne la seconda guera mondial, la se guadagnarà el soranome de “TOSCA “… “non feci mai male ad anima viva”).
EI grande oroloio de la piassa el segna le nove! Qua e là, precedù da ‘n sìbilo sinistro, tàca a piovar le bombe. La gente, in magioransa done e buteleti, i core a rifugiarse soto ai pòrteghi o drento ai portoni ma gh’è più curiosità che paura… i più i vede i arioplani par la prima òlta e i resta a vardarli a boca vèrta.
Pura, par do ore i “pirati de l’aria” (come el I’à definì un cronista del tempo, A. Pomello) i sèita a voltegiar su Verona. I se sconde drio le nuvole co’ ‘n’ardita cabrada… po’, riaparendo a I’improviso col rusar de ‘n batalion de mosconi, i ripiomba zo, in pichiata, quasi a farghe el pel a la tera.
Le bombe, sganciade “a man”, i è stà na trentina, cascà in vari punti del centro ma el bersalio più colpì l’è stà la piassa Erbe, propio rènte ai portegheti de la Camara de Comercio dove che tanta gente I’èra ‘ndà a rifugiarse. Na strage de òmeni, done e buteleti; na trentina e più de morti, 48 i feridi.
Come tante pùe de pessa, rote, scancanà, somenade in òlta; cussì i è aparsi ai oci dei primi socoridori… tra ogeti e sporte sventrade da le qual era rugoladi fora fruti e verdure a ‘npastarse co’ ‘l sangue, le vitime de quel 14 novembre! Su i scalini e su i marciapié de la storica “domus mercatorum” parea fusse scopià la fine del mondo.
Tra i primi a çercar de portarghe socorso ai feridi, prodigandose fin al sfinimento, gh’è stà el paroco de santa Anastasia, don ADOLFO BASSI; un prete tanto caro ai veronesi, morto nel 1957 e al qual è stà dedicà na via (ex vicolo sotoriva), oltre a un famoso premio “de la bontà” (premio don Bassi) istituì, dopo la morte del santo prete, da I’avv. Walter Marognolli, con un grupo de giovani.
El bombardamento del 14 novembbre 1915 el s’à svolto in do riprese: dale 8 aIe 9,15 e dale 9,30 aIe 10.
Nel secondo periodo un nostro arioplan el s’à alsà in volo contro i tri “taube” inpegnandoli a colpi de mitralia. A le 10, però, i tri “assassini”, sensa aparenti dàni, i è finalmente sparì verso setentrion, lassando Verona imersa nel fumo, ne le rovine, ne la morte.
‘Dèsso, a l’imboco de via Peliciai un monumento de bronzo rafigurante Verona, co’ la spada levà al cel, la ricorda quela tragica matina.
EI monumento, opera del scultor Egidio Girelli (dito “la tetona “, par via de ‘n seno fora) fato, grassie a na sotoscrission tra i çitadini, l’è ‘ndà a sostituir la corona che ‘l Comune l’avea fato metar a la prima colòna de la Casa de i marcanti, de fronte a la piasseta, da ‘lora ciamà “14 novembre”. Nel mèso de sta corona gh’èra scrito: “A le vitime de l’assassinio austriaco – 14 nov. 1915, sinché el marmo el ghe ne possa eternar la memoria”.
Trent’ani dopo Verona là dovù subir ben altri bombardamenti; ben più gravi disastri e i morti i è stà meiàra! ! Ma i nostri veci i se ricorda ancora quela “prima òlta”, forsi parché la morte, alora, l’èra piombà, caìna, su gente ignara, fiduciosa, bituà da senpre a vardar al cel, no come ala boca nera de ‘n sepolcro, ma a la porta serena e dolçe del paradiso.

Wanda Girardi Castellani