L’Angolo de la Wanda – Marzo ter 1993 – “GIORGIO ZANCANARO AL ÇIRCOLO “ZENATELLO””

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“GIORGIO ZANCANARO AL ÇIRCOLO “ZENATELLO””

L’èra un bel tòco che lo spetàvimo.
Altre òlte I’èra mancà a I’apèlo a causa de i tanti inpegni de laoro che lo tièn quasi senpre distante da la so Verona. Ma dominica 10 genar, finalmente l’è vegnudo a cantar al Circolo Uficiai del Presidio, in Castelvecio, par i soci del “Zenatello”.
GIORGIO ZANCANARO, veronese de sòca, ‘dèsso rèduce da I’enesimo sucesso, ne la “Traviata” a la Fenice de Venessia, dopo aver stravinto nel 1969 el concorso al Novo de Milan e l’ano dopo quel del “Verdi” a Busseto, el g’à ‘vu el debuto nel 1971, infilando subito ‘na colana de alori nei massimi teatri nassionai, mentre el primo sucesso internassional el se I’à guadagnà nel 1977 a Amburgo, nel “Trovador”. Po’… via, a ale spiegade a metar in bandiera, co’ ‘l melodrama italian, el nome de Verona nel resto del mondo. Ne l”81 I’à infine scominçià a cantar a la Scala deventando uno tra i più stimadi e richiesti interpreti del maestro Riccardo Muti.
Quanta strada che I’à fato, trionfalmente, da la partensa nel Coro arenian andò el cantava a far da contorno a “solisti” che ‘ncò I’à superado, in forsa, braura e professionalità!
Nel concerto in Castelvecio I’à magistralmente afiancà la Soprano Liliana Levis in vari dueti, po’, in final, el n’à dà un “Nemico de la Patria” da l’Andrea Chenier, da far saltar-su da le careghe tuta la sala, piena-frasà fin ai bordi.
Oltre a lu e a la brava Levis, à cantà el tenor Renato Zuin che st’ano sentiremo da nòvo in ‘Rena.
Dopo el bel dopodisnar, dato che “tuti i salmi i finisse in tòla” (più che in gloria) semo ‘ndà a çena e l’è stà’ un gusto sentir sto celebre baritono parlar in veronese s-ceto, citando versi de Berto Barbarani, co’ ‘na cica ne la drita e ‘l goto ne la sanca. Bravo Giorgio…: sinpatico, a la bona e, par zonta, un “tòco de fusto de ròaro”, cusiche, oltre al piaser de scoltarlo, gh’è anca quelo de vardarlo; vece… sì, ma miga gnancora òrbe!

Wanda Girardi Castellani