L’Angolo de la Wanda – Marzo bis 1994 – “Un masseto de mimosa – (Un giorno de festa in più con la mimosa)”.

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Un masseto de mimosa – (Un giorno de festa in più con la mimosa)”.

I à fato de tuto, in sti ultimi ani, par trasformar anca la giornada de la dona in ‘na sagra del consumismo e intanto ghe n’è andà quasi in desmentegon la sostansa e ‘l vero significato.
In Italia s’à scominçià a celebrar ‘sta ricorensa nel 1945 par inissiativa de le done de l’UDI, de ispirassion socialcomunista, che giusto l’8 marso de quel’ano le s’à riunì ne la sala del Museo Visconti a Roma co’ le catoliche del Centro Italian Feminile, vedove de caduti, partigiane e sindacaliste, par compilar un ordine del giorno che le à mandà po’ a Londra dove la rapresentansa de 20 nassioni riunide a la Albert Hall l’à firmà una “carta dela dona” par el sacrosanto dirito al laoro, a la parità de stipendio, la possibilità de rivar ai posti diretivi e de partecipar in tuto a la vita nassional e internassional, fianco a fianco de i òmeni. Paraltro, solo un ano dopo ‘sta giornada l’è stà celebrà con tuti i crismi e propio alora, in te ‘na riunion a Roma, è nata l’idea de metarse indosso un fior che ‘l podesse caraterisar la festa, come el garofolo rosso pa’ ‘l 1° maggio. Ghe volea dunque un fior marsolin che, pur umile, el fusse significativo e che ‘l gavesse da costar poco; s’à dunque pensà a la mimosa che, oltretuto, la sinbolegia el passagio da la morte a un stato de luce; rinassita e vitoria sul scuro! In America, el primo “Woman’s Day” el risaI al 3 magio 1908 e ‘l s’à tegnù a Chicago.
Nel 1910, po’, le socialiste americane i è partì par Copenaghen par propor anca là sta giornada intemassional de la dona; un afar, però, che lì no’ l’à miga tacà.
Invesse, Clara Zetchin, delegada del partito socialdemocratico tedesco, portandola sul so giornal la g’à ‘vù ‘na barca de consensi, tanto che l’ano dopo, el 19 marso la giornada l’à podù svòlgiarse.
Miga tuti i paesi europei, però, i à acetà sta data, preferendo, ci el 1° magio, ci el 13 de marso, ci el 9. L’è stà po’ la rivolussion russa à inpor l’8 de marso, in ricordo de la prima manifestassion de le operaie de Pietroburgo contro el zarismo.
Falsa l’è la storia che la giornada de la dona la vègna dal ricordo de le 129 operaie che in quel 8 marso del 1908 le sarìa morte brusà ne l’incendio de la fabrica americana ‘ndò le se savea sarà, in siopero, par çercar de otegner de le condissioni de laoro più giuste.
Infondà l’è anca la legenda secondo la qual la data la ricordaria el siopero de le operaie tessiJi de New York, represso brutalmente da la polissia.
Probabilmente a l’inissio de i ani 50 nei nostri paesi i à sentì l’esigensa de destacar l’8 marso da la storia sovietica.
Par quel che concerne l’Italia, tuto quel che è stado otegnù da le done ghe lo dovemo ai sforsi de l’UDI.
Associar l’8 marso al martirio de le done operaie americane significava però vèrsar l’orisonte de la celebrassion a un mondo non comunista, atribuendoghe ànca, de chela via, un caratere sacro.
In quanto a la mimosa, “fior umile” che i fioristi par l’ocasion i fa rivar co’ ‘l presso a le stele, da simbolo de la dona l’è deventà ‘n’altra maniera par far spèndar schei!

Wanda Girardi Castellani