L’Angolo de la Wanda – Marzo bis 1993 – “PUNTI DE VISTA – Question de serte difarense”.

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“PUNTI DE VISTA – Question de serte difarense”.

Go leto che anca Gianfranco Funari (60 carati abondanti e ‘na dentiera malfata) l’à molà la moier (facente funsioni) par una da 32 ani. Antonioni,… 80 “inverni”, el ghe l’avea da 40 e Leroy uno da manco par no’ parlar de Maurizio Costanzo che, pur essendo contro tute le tentassioni, el sèguita a passar da ‘na bela stròpa a ‘n’altra, tute, varda caso, inamorà come pite.
Mi, ‘ste done che se mète con uno che’l podaria èssar so nono, le capisso fin a un serto punto. Gh’è da dir che se trata sempre de “noni” artisti, giornalisti, capitani de industria, siori sfondà, re, principi e comunque “celebrità”. Guai-Maria che ‘ste butele le se vaga a pèrdar par qualche “vecio” camionista o “vecio” murador, impiegato, ferovier, camarier, pistor, ecc…
A ‘ste categorie de lavoradori stajonà, par via de “conquiste”, la ghe va maloto! Naturalmente, sucede de raro che a far cubia co’ ‘n giovane la sia ‘na dona vecia.
Par bràa artista, o bràa che altro, che la sia, se l’à passà i “anta” ghe convien a star co’ ‘l marì, pura se ‘l ga la pansa al nono mese, la pelada e le culate che spengola come quele de i lionfanti. Se po’ le resta vedove, le gà da rassegnarse; volendo propio riaver conpagnia, le se deve adatar a uno de ‘na vintina de ani più maùro e pitosto “anonimo”.
Uniche ecessioni: la Borboni con el poeta Vilar; ‘na storia che à scandalisà el mondo e de la qual se parla ancora, e la Silvia Koscina con Sgarbi (ma quelo el conferma la regola in quanto el serca solo de “ròmpar” e de èssar difarente da i altri).
E sì che de solito el gentil sesso l’usa tegnerse ben, industriandosse de scòndar via i ani, roba che ‘l sesso forte ‘nvesse no’ fa, convinto d’èssar belo e “sexi” comunque e sempre.
Penso che el motivo de ‘ste enormi difarense el vaga risercà ne la frase acuta e inteligente che à dito Giorgio Albertazzi, recentemente, ne la trasmission “Harem” presentà da quela lòfia de la Caterina Spak: “I òmeni i se inamora del corpo e le done del sarvèl”. Questo me fa vègnar in mente ‘n’altra frase celebre sfornà dal nostro Dino Durante: “I dise che ne la dona l’è più importante la cultura del resto, mi però no’ ò mai visto preferir ‘na veceta inteligente a ‘na bela fiola, magari oca. EI che staria a dir che val più un bel pèto de ‘n ragionamento filosofico”. E, a ‘sto punto, zontemoghe pure, in final, ‘n’altra bela frase che ò catà scrita no’ sò ‘ndove, ma che par mi l’è Vangelo: “El sesso, par i òmeni l’è un fine; par le done, ‘na conseguensa”. Naturalmente gh’è sempre, come diseimo, l’ecession; da ‘na parte costituì dai poeti (tipo Vilar) che, Diograssia, par via de sentimenti i ne someia, e da quel’altra da le “cicioline”.
Ghe sarìa po’ da tègnar presente che la dona la çerca nel so omo el “capo”. Nel regno animaI, par la femena el “capo” in question l’è el più forte, el capo-branco, quel che l’è bon de mandar fora da le tògne tuti i altri pretendenti. Noialtre, invesse, dotade de ‘n’inteligensa superiore, podemo individuar el “capo” anca in altre maniere, belessa e età a parte, pur che ‘l vansa-su; el mèio: ne le arti, ne le professioni e parfìn nel mal, tanto è vero che serti delinquenti i à ricevù e i riceve tuti i dì in galera un bàito de letere de done. Ma qua scata anca altre mole come quela de la “maternità” che se portemo drio da la nassita, co’ le cadene de la pietà e la speransa romantica de far redimar el “cativo”, trasformandolo in un angeleto. Comunque, tirando i remi in barca, me par che da tute ‘ste robe se possa spiegarse el motivo de serte stranbe çelte da parte de noialtre. I dise che semo conplicade, ma no’ l’è miga vera… semo solo difarenti (e forsi mèio).

Wanda Girardi Castellani