L’Angolo de la Wanda – Marzo 1994 – “La peste”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“La peste”

Sòto el ventesel de ‘n vinti de marso, Verona, ne l’ano 1630 la se stava sveiando tra ‘n sbàtar dei scuri e ‘l ciassar de i mostri, la in strada in çerca de legna par far bòiar l’aqua de la polenta.
Propio in quel momento in ‘na càmara d’afito a S. Salvador in Corte Regia stava tirando i ultimi un soldà; çerto Francesco Cevolini. L’era el primo caso de peste in cità, ma prima che fussa individuà el mal è dovù andàrghene drio altri tri; la parona de casa Lucressia Isolana, e le so do fiole.
L’esperiensa de quel’altra epidemia scopià a Verona 55 ani prima, nel 1575 con 13000 morti, l’avaria dovù spaentar inbisogno la popolassion, inveçe i dotori Gratioli e Giordani che i s’à dà da far par informar del pericolo, racomandando de disinfetar tuto con l’esédo, i è stà tòlti a sgogne (sberlefi) parfin con sbatimento de coèrcioli e pignate rote!
Tri giorni dopo però, quando altre sedese persone che avea ‘viçinà le Isolane i è stà portà al Lasareto, la gente l’à capì che tirava aria cativa e l’à scominçià a mètar in pratica i consili de i dotori de la sanità, afidandosse ai rimedi e a le prevension del tempo; roba che vien da dimandarse come che à fato qualchedun a portar fòra, malgrado tuto, la pele: primo, gnente solassi! (manco mal). Po’… sanguate tacà ai busi del naso par far passar el mal de testa, quando che le foie de salata, de nintèa e de papavaro le lassava el tenpo che le trovava e, solo in casi estremi, ricòrar al ponsimento de le tenpie co n’ucia. Par inpedirghe de regatar (vomitare) inveçe, “no’ gh’è gnente da far”, el confessa l’ilustre medico e filosofo Francesco Pona. Come medissine, se racomanda el vin par via de le so virtù “spiritali”. Sui “bubòni” maùri, l’unico rimedio l’è metarghe, uso inpiastro, late, pan, ovi, buro e oio, missiadi insieme, opura radisa de crèn, serpentaria a calùsene.
Se ordina de serar le case infetà, brusar tuti i efèti che gh’è drento, sequestrar la gente sana e portar al lasareto tuti i “sospeti”. Oramai no’ gh’è più onbra de dubio; l’è peste fulminante e ‘l cavalier de la “màscara rossa”, cussi ben descritto da Allan Poe, el core desbrià a somenar morte dovunque el passa! In apriI no’ gh’è fameia che no’ la sia in luto e i çimiteri i è al “tuto esaurido”. In magio za se taca a portar i morti in riva a l’Adese, bandonàndogheli ai corvi e ai cani. Par tuta la provincia no’ se respira più, tanta l’è la spussa!

I “dosentovintiquatro” giorni de la “màscara rossa”

Francesco Pona, uno dei pochi dotori scampà a quel frael, ne la so relassion de l’otobre 1631 al Capitano, el descrive ‘na situassion che la fa parer grisociaro anca el pèso del film “neri” de i nostri giorni. In giugno, co’ i primi caldi estivi, no’ resta altro che scaricar el càrico dei “monàti” diretamente in acqua e sicome la magior parte de la popolassion la beea de quela, ci no’ è morto de pèste l’è ‘ndà a far “tèra da pitari” co’ ‘l colera. El contagio, co’ l’istà, el se spana anca fora provincia e l’esercito venessian, in ritirada da Mantova, passando el se lassa drio ‘na brigola de morti, difondendo a so volta’ la pestilensa.
Co’ l’autuno e le prime piove la febre par che la scominçia a calar che l’epidemia la gabia ‘na batuda de aresto.
Ma Verona la par ‘na çità de fantasmi! Se vede in òlta figure seche, giale de pele e co’ la testa pelà; i fa fadiga a star in piè ma i è fora pericolo, cussì i çerca de rèndarse utili.
L’inverno el trova cussì ‘na popolassion ridota a un terso de quela che risultava nel censimento del 1527; 20630 abitanti, al posto dei 53533 de prima e tuti tribuladi, pieni de fredo e de fame… desperadi, in çerca el più de le òlte de ‘na tonba che no’ gh’è. Durante la longa epidemia, oltre a la gente è morto anca le bestie cussì i contadini, che apena-apena i riesse a tegnerse driti, no’ i g’à gnànca la possibilità, in primavera, de tornar a laorar la tera. Lori, paraltro, i è senpre più fortunadi dei citadini parché qualche radisa, de qua o de là, i la trova. A Verona, sbregà dai morsegoni de ‘na fame cagna, òmeni, done, veci e buteleti, butà longo le strade, i slonga la man, sensa speransa contendendosse le foie dei albari e la pota erba che rebùta.
Solo el 30 de otobre 1631 Francesco Pona l’à podù dichiarar in tuta cossiensa che la peste l’era finida ma la coa de miseria che la s’à tirà drio l’è stà longa un pàssio!
Un par de ani fa, durante lavori de interamento de tubadure, i veronesi i à podù vedar co’ i so oci la prova teribile de quela tragedia distante; in piasseta S. Luca come nel chiostro de san Barnardin, le pareti de le buse scavà le ghe someiava a del mandolato, tanto i èra carghe de ossi, stratificà fissi fissi.
Resta, come testimoniansa, anca el lasareto co’ ‘l bel tempieto opera del Sanmicheli, in centro ai ruderi de le “cele”, messe in çèrcolo. El se trova al porto san Pancrassio, isolà da le case.

Wanda Girardi Castellani