L’Angolo de la Wanda – Marzo 1993 – “Omagio a Tito Gobi – ‘Na gloria veneta ne la gloria del mondo a 80 ani da la nassita”.

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“Omagio a Tito Gobbi – ‘Na gloria veneta ne la gloria del mondo a 80 ani da la nassita”.

La note del 18 dicembre 1992, tribulà da ‘na siàtica che no’ me lassava dormir, a le 3,30 son ‘ndà a consolarme davanti a la TV, vardàndome e scoltàndome in scufia el Rigoletto direto da Tullio Serafin, par la regia de Carmine Gallone (1947), interpretà da quel maraveioso baritono e ator che l’è sta’ el nostro Tito Gobbi. Digo “nostro” parché l’èra de Bassan del Grapa.
Pian a pian, involtolà ne la magia de quela voçe che me riportava ai primi ani del dopoguera, in un mondo “ruspante”, manco frenetico e ancora, malgrado tuto, pien de entusiasmi, me s’à stuà el mal.
Grassie, Tito, ànca se a quei tenpi no’ t’è mai risposto a le me letere, mandàndome la foto che t’ò dimandà. Sì, lo sò, de ronpiscàtole come mi ci-sa quante te ne capitava tra i pie e po’ te eri quasi sempre in òlta pa’ ‘l mondo, passando da un sucesso a l’altro, da un’opera lirica a un film. Ma quando che te vegnevi in ‘Rena, mi, sui scalini, un mocoleto ‘npissà fra altre meiara, ero là a scoltarte e a spelarme le mane par ti.
Nel 1954, ’55, ’56 e nel 1962, par I’ultima òlta, t’ò aplaudì ne I’Aida, la Tosca, l’Otello, ma el Rigoletto, l’opera ‘ndò t’è dado el meio, in ‘Rena no’ te l’è fata mai. L’è sta’ la me passion fin da I’infansia! Figurete che a 3, 4 ani me mama I’avea dovù farme par santa Lussia ‘na specie de costume da “gobo”, taiando a “merli” un par de calsetoni de me pare. Con tanto de capel inpiumado e tabarin cantavo mèsa opera a la “vateciava”.
EI Prof. Pasoli che ‘l me g’aveva in cura par ‘na bronchite cronica el me metea su la scrivania, po’ el se comodava in poltrona e ‘I me disèa, serio, co’ ‘i brassi conserti: “Canta!” Mi, me piegavo-zo a ponteso e tacavo: “Pari siamo…”.
Beh, ‘sta bela opera verdiana son riussì a vedarla, interpretà da ti, solo al cinematografo, alora, e ‘desso su rete “4”.
Par ricordarte su “Q.C.”, gò scrito a I’Assessorato a la cultura de Bassan ma spèto da più de ‘n’ano che i me daga notissie.
Pura i me dise che esiste un museo de i to vestiti de sèna; ghe sarà anca ‘na biografia. Possibile che ancora ‘na òlta se deva dir con Cristo: “nissun l’è profeta in patria”?
Sò che te eri nato 80 ani fa nel 1913 e che te sì ‘ndà fora de sèna, a 71 ani, nel marso de l”84. Sò che te vegnèi da la scola de Giulio Grimi e che te avei debutà a l’Opera de Roma nel 1938. Che ‘l to repertorio el conprendeva, oltre a Verdi, Rossini, Puccini, Mascagni, Donizetti, Montemezzi, Pizzetti, Rocca, Wagner, Strauss, Mozart ecc… Unanimemente, la critica la t’à definì “un cantante e un ator unico, de ‘na grande forsa interpretativa, dotà de ‘na perfeta formassion e ‘n’assoluta padronansa de la dission” e te eri anca un trucador de ‘na braùra ecessional! Po’, de i film che t’è interpretà me ricordo in particolar “O sole mio” (1946) de G. Gentilomo… ma par el resto, come èto passà i to ultimi ani, lontan da le luci de la ribalta?
L’amigo Luciano Pollini, inesauribile fonte de notissie par via de lirica, el m’a dito che te insegnavi canto e alora, quale altre bone voçi èto coltivà sul to model?
Nel 1983, co’ ‘l “Circolo Verdi” dovea vègnar a Asolo a conossarte, ma g’avea el fiol a l’ospedal e l’ano dopo l’è stà’ massa tardi.
In sti giorni ò sentì che è morta anca la “dama bianca” de Coppi; Dio, quanti ricordi m’è vegnù su dal posso fondo del tenpo! Le batalie fra mi e me marì; lu “coppista”, mi “bartaliana”. Le noti passade sul bordo de i bastioni par vedar passar le “Mile Milia” e la coa al cinematografo par Tito Gobbi, Begnamino Gigli, Feruccio Tagliavini, Gino Bechi.
A Recanati, nei ani ’70 so’ ‘ndà a pregar davanti a la tonba de Gigli; ‘na pirarnide con su la porta du angeli in costume egizio. Con Feruccio 6 ani fa son stà a Sella, e l’èra za pitosto malcunà. Ma Gino Bechi, premià par “na vita dedicà a la lirica”,3 ani fa l’ò visto ancora in ganba e drito come un fuso.
Quando con ti, Tito, i èra “su la çima”, in ‘Rena i fasea “porta” a le çinque e noialtri erimo là, con tanto de cussini, candeline, panetini e fiaschi de vin a cosarse su le piere de boio.
A ‘na rapresentassion de la Tosca nel ’56, ghe so’ ‘ndà tuta vestida de bianco come un gelatar, tirà a malta fina ne la speransa de incontrarte, fora nel vaI o a la porta de i artisti, ma sentandome su ‘n scalin, soto la fogara de agosto, ò spapare là un scartosso de fighi che ‘n càncaro l’avea postà-lì. Me ricordo che, dopo l’opera son corsa a casa co’ ‘na man nel “didietro”, come l’aretino Pietro.
Beh, avarìa volù saver tante robe, caro Tito, ma a pensarghe ben l’è stà mèio cussì; te sì restà fermo nel tenpo, eternamente giovane, ne l’aspeto come ne la voçe, fato-su ne la nebia rosa de i sogni come un “principe” da mile e una note, del qual a malapena se conosse el nome e da ‘ndò ‘l vien. Par el resto, seguitarò ancora, come alora, a inventare ne le sentenara de romanzi creà da la me (malgrado siàtica e ràpole) ancora viva fantasia.

Wanda Girardi Castellani

A TITO

Da la càneva fonda de le memorie
‘na nota longa,
sospesa su ‘l pentagrama del tenpo
t’à riportado a mi
sogno distante
ricamà sul telar de le rosarie.
Me lo ricordo… si, quel to soriso
che da ‘n schermo, ingrandì
parea el brilasse
solo par mi!
Me lo ricordo… sì, quel sguardo tenaro
‘ndò la malissiala faséa baeto
nei pensieri più sconti.
Ci-sà se in qualche lògo a la me ora
risentirò l’incanto
de la to voçe.
Sò che saremo ‘stessi, come ‘lora
ma sensa più distanse
da ‘na carega a ‘n palco.
Te parlarè, in risposta a le me letere
restade in fermoposta
e come ne la vecia cansoneta
de’ ‘l to Bassan
sul ponte de l’eterno a mèsa strada
se darem la man.