L’Angolo de la Wanda – Maggio bis 1994 – “La più bela storia d’amor”.
…a cura di Graziano M. Cobelli
gcobelli05@gmail.com
Quatro Ciàcoe: da Verona
“La più bela storia d’amor”.
A “Bea” (Beatrice Fiorillo), ‘na butèla coragiosa dal cor grando e da la mente agile ma che, purtropo, la ga da usar, al posto-de le ganbe, ‘na carega a rudèle, tanti ani fa go dedicà ‘na poesia:
“…aria de amor:.. che scalda i to pensieri
che te mena, ciapàndote par man
in corsa verso pra che no’ a fine…
un rèfolo de vento che te sbrega
a quel destin ligado a ‘na carega… “
Pensavo alora che ‘na dona cusì, come po’ la s’à rivelada, la podesse esìstar solo ne la fantasia de i poeti… ma, ecola qua: programatrice de aparechiature eletroniche… la va in volta co’ la so auto e a vedarla tirarse su e zo dal sentar de guida, cargando e desgargando anca la carega a rudèle, vien da dir che tuta sta fassenda la ga del miracoloso! Invesse, l’è tuto ‘n afar de volontà de fero, de corajo e de amor grando par la vita e l’è anca ‘na sberla mora!… par tuti quei che i se cucia par poco o gnente, desperandose a ogni paia che ghe casca sui pié.
Sarà che la Bea l’è fiola de ‘n maressial de i carabinieri; un omo, papà Salvatore, che in fato de corajo no’l ga serto da invidiar gnente a nissuno. Carabinier e poeta… cusì l’è riussì a fabricar sta poesia vivente che, oltretuto, la ga un facin de ‘na belessa dolse che a vardarlo te-te tiri su la petorina.
E sicome, quando che i ghe vol, Dio el fa i “descusì”, eco che par la Bea è vegnù anca l’amor co la “A” maiuscola. Lu l’è un butel che ‘l ga la so stessa crose, portà co’ la stessa forsa d’animo; Giacomo, unico fiol mas-cio del Conte Muraci Da La Corte. L’era, una tra le fameie più nobili de la nostra provincia. Anca Giacomo el fa el programista e i du i s’à conossudi, capidi e inamorà… po’ i à deciso de sposarse. Son stà a le so nosse anca mi, ne la tenuta del conte, tra sentenara de altri invitadi. La parea el final de la rosaria de Cenerentola! Ela l’è rivada tuta involtolà in ‘na nuvola candida, urtando la so carega. Giacomo, anca lu su la sua, l’è passà emossionando, tra i batimani de i presenti, tuti co i oci umidi e ‘l cor sgionfo de felissità riflessa.
Po’ i sposeti i è ‘ndà a vivar par conto suo e i gh’è riussidi benon, organisandosse in maniera parfeta. Come se no’ bastasse, el 17 marso del ’92 i à ciapà la patente nautica, prima in Italia tra i paraplegici, superando tute le baciere burocratiche e mentali. Amanti del mar (e come podea èssar altrimenti, specie par la Bea, fiola de ‘n napoletan?) i à fondà l’Ass. “I Tetragonauti” che la se propone de difondar tra i portatori de handicap la passion par la vela.
Wanda Girardi Castellani
