L’Angolo de la Wanda – Maggio bis 1993 – “El 1° de Magio… festa del laoro”

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“El 1° de Magio… festa del laoro”

La festa del laoro, che coincide co’ ‘l Calendemagio… festa de rose e de amori in bòcolo, la gà le so origini nel lontan 1889 quando el movimento socialista el I’à proclamà in tuto el mondo, in onor de le vitime de ‘n comissio sindacal al Haymarket Square de Chicago. L’èra giusto el 1° de magio de quel’ano quando, fin che la gente la stava scoltando un orador, qualche testa calda I’à fato scopiar ‘na bonba tra la polissia. ‘Sto fato I’à scadenà un vrespar de barufe, tale che a la fine de la giornada s’à podù contar in tera ‘na diesina de morti tra operai e polissioti.
A pagar el fio è stà ciapà 8 disgrassiadi che forsi i era tra quei che ghe n’avea manco colpa, come sucede de solito.
Durante el processo, infati, la giuria la ghe n’à spedì quatro a la forca sensa gnanca ‘na strassa de prova a carico. De i quatro che restava, un el s’à copà in cela par la desperassion mentre i altri tri, sete ani dopo, malcunadi in salute, tra polemiche roènti, i è stà infine liberà.
I era tenpi che i laoradori i èra tratà spesso pèso de le bestie, e l’Italia no’ la fasea certo ecession!
Par andar a sgòbo bastava, el più de le òlte, averghe i ani par star in pie, infati, la nostra lege del 1886 la fissava come età mìnima par el laoro ne le cave, ne le fabriche e ne le miniere, 9 ani par un massimo de 8 ore al giorno fin a 12 ani, dopo de che no’ gh’èra più limite. Solo nel 1902 gh’è stà un ritoco che à portà l’età minima a 12 ani, par un massimo de 12 ore al giorno. Paraltro, ne le canpagne se usava mandar i fioi nei campi za a 6/7 ani. Le paghe par i pori cani, in generale, i èra bastansa par impenir, una o do volte al giorno, la panara e sicome rente a la polenta se ghe vedèa de raro un qualcos’altro, el mal nassionale l’èra la pelagra che, co’ l’aiuto de la malaria e de la tubercolosi, la se industriava de destrigar via el risultato de l’unico divertimento a bon marcà che g’avea el “popolino”. Dise infati le statistiche de l’epoca che su cinque fioi ghe ne scanpava, sì e no, un par.
Ancò, el primo de magio che par tanti ani l’è stà el sinbolo de la rivolussion socialista e del rispeto del laoro, ‘na “rivolussion” assè mal vista dai paroni, l’à finì co’ ‘l pèrdar la so fisionomia ideologica par trasformarse ne la festa de l’operosità e de la speranza che ogni omo el sia stimà, miga par la scarsela o el titolo, onorifico o scolastico, ma par I’aporto che ‘l ghe dà a la comunità, a seconda de le so possibilità. Ànca la Cesa, che in prinçipio la gà ‘vù le so perplessità, pura se ‘l primo passo la lo aveva fato ela co’ I’Enciclica “Rerum Novarum” del 1891 (paraltro, Papa Leone XIII, tradendo le origini aristocratiche, l’avea dito: “La mercede non deve essere superiore al sostentamento dell’operaio; frugale, s’intende, e ben consumato”) I’à finì co’ I’acetar ‘sta festa consacràndoghela al primo tra i santi laoradori, San Giusepe, che fasendo el “marangon” el g’à procurà el pan a nostro Signor e a la Madona… par diversi ani.
Pio XII (Papa Pacelli) I’à istituì nel 1956 la festa, dunque, de San Giuseppe ” Artigiano” che sostituiva quela del patrocinio de ‘sto Santo su la Cesa universaI, prescrita da Pio XI nel 1874 a la tersa dominica dopo Pasqua e po’ da San Pio X, el mèrcoli prima. Con San Giusepe artigiano, Pio XII I’à volù proporghe al laorador cristian un model e un protetor, sotoliniando nel stesso tenpo la fusion del lavoro ne la vita de l’omo.

Wanda Girardi Castellani